كلنا طبعا بنحبك المشاوي على الفحم لكن الشوي على الفحم في البيت غلبه. عشان كده هقول كم على طريقه هايله نعمل بها مشويات من غير شوايه و بنفس طعم الشوي على الفحم
كل اللي محتاجينه:
- علبة صغيره صفيح . مثلا علبه تونه فاضيه
- فحم على قد العلبه فاضيه
- معلقه زيت
الطريقه
- لو مثلا حنعمل شيش طاووق نقطع الفراخ والطماطم والبصل والفلفل الاخضر و نتبلهم بملح وفلفل وبهارات وزبادي ومعلقه صلصه. ونشيلهم في الثلاجه ليلة قبل الشوي
- في اليوم التالي نحطهم اسياخ خشب ونرصهم في صينيه فرن ونحط في وسطها علبه التونه الفاضيه
- نكون محضرين غطا مناسب للصينيه يغطيها كويس. او ممكن ورق فويل
- نسخن الفحم على عين البوتاجاز لحد ما يحمر خالص وبالمساكة نحطه في علبه التونه
- نهوي على الفحم عشان يحمر اكثر وبعدين نصب عليه معلقه الزيت
- هيطلع من الفحم دخان ابيض نروح على طول مغطيين الصينيه عشان نكتم الدخان و ما يهربش
- بعد خمس دقايق لما الدخان يخلص نكرر الخطوات كمان مره
- بعد كده نحط الصينيه في الفرن على نار متوسطه 180 درجه لغايه ما الفراخ تستوى حوالي 40 دقيقه- وفي نصف الوقت نقلب الاسياخ على ظهرها
هتذهلوا من طعم الشوي الجميل محدش هيصدق ان دي مش مشويه على الفحم في الشوايه
نفس الطريقه دي نقدر نستخدمها في شوي الفراخ و الدبابيس و الوراك و الصدور و كفته الحاتي و السمك المشوي
اما لو عايزين نعمل كباب من لحمه كندوز عاديه فلازم بعد خطوة الفحم نسوي اللحمه في حله متغطيه على نار هاديه شمعه خمس ساعات عشان تاخد وقتها وتستوي كويس
وبالف هنا وشفا
ليست هناك تعليقات:
إرسال تعليق