الاكلة دى طعمها تحفة – بجد لازم تجربوها – حتبقى من اطباقكم المفضلة دائماً ان شاء الله – وحتلاقوا الكل بيحبها كبار وصغيرين
المقادير
- كيلو باذنجان رومى
- زيت للتحمير
- ربع كوب خل
- 3 فصوص ثوم مهروس
- قرن فلفل اخضر حامى
- فلفلاية رومى
- معلقة صغيرة كمون
- معلقة صغيرة ملح
- معلقة طحينة خام
- كزبرة وبقدونس مفرى
الطريقة
- نغسل الباذنجان وننشفه
- نسخن الزيت فى حلة التحمير او طاسة عميقة
- اثناء تسخين الزيت نقطع باذنجانة واحدة شرائح بالطول وبعدين نقطع الشرائح صوابع مثل البطاطس وبعدين نقطع الصوابع مكعبات مربعة بحجم عقلة الصباع
- لما الزيت يسخن جدا نضع الكمية اللى قطعناها من الباذنجان فى الزيت – كلما كان الزيت ساخن قوى وكمية الباذنجان قليلة كدة يتحمر أسرع ويشرب زيت أقل
- فى هذه الاثناء نضع الخل فى حلة ونقلب فيه الفلفل الحامى والرومى – مقطع قطع صغيرة جدا – والثوم والملح والكمون والخضرة
- بعد ان يصبح الباذنجان لونه بنى فاتح نضعه فى صفاية تحتها وعاء لاستقبال الزيت المتصفى ثم نعيد الزيت من الوعاء لحلة التحمير على النار – ونقطع باذنجانة أخرى مكعبات ونقليها فى الزيت الساخن جدا – وهكذا حتى ننتهى من تحمير كل الكمية
- ننقل مكعبات الباذجان المقلى بعد ما اتصفى الى حلة الخلطة ونقلبه فيها كويس
- يقدم دافئ او بارد
الزيت اسعاره بقت نار طبعا كلنا عارفين – انا باذن الله حأبقى احسب لكم بالظبط تحمير الباذنجان بيستهلك زيت أد ايه واكتب لكم النسبة – وكمان تحمير البطاطس
بالهنا والشفا
