برجر مجمد بيتى احلى من الجاهز بكتييييير

تحديث: استخدم الان طريقة أحدث وأسهل يمكنكم قراءة تفاصيلها بالضغط هنا

————————————————

البيف برجر أكلة لذيذة وسريعة التحضير – والطريقة اللى حأقولهالكم برجر من لحم 100% بدون فول صويا ولا بقسماط – انا دايما باعمله واشيله عندى فى الفريزر – تحفة وولادى بيتهبلوا على طعمه – يشبه طعم كفتة الحاتى – طعم تانى خالص غير البرجر الجاهز – صحى وخالى من أى اضافات كيماوية ضارة – وكربوهيدراته قليلة خالص: قرص البرجر دة يحتوى على 1 جرام فقط كربوهيدرات

انا باعمل كمية واشكلها اقراص واجمدها فى الفريزر – وفى أى يوم وأى وقت عايزين برجر 3 دقائق ويكون الاكل جاهز

المقادير

• 1800جم لحم مفروم
• 200جم لية ضانى
• نصف كيلو بصل
• 40جم فصوص ثوم مقشر
• 40جم ملح بونو
• 2 معلقة صغيرة فلفل اسود مطحون
• 1 معلقة صغيرة كبابة صينى
• 1 معلقة صغيرة ملح صينى (جلوتامات صوديوم)
• 1/2 معلقة صغيرة قرفة مطحونة
• 4 بيضات كبار

الطريقة

• نجيب اكياس بلاستيك – يفضل تكون شفافة سادة مش مطبوع عليها كلام – نقص الطرف السفلى لكل كيس وكمان نقص اعلى الايدين بتوع الكيس عند مكان التصاق طرفيه ببعض – لنحصل على كيس مفتوح من تحت وفوق زى الجيبة كدة – وبعدين نحطهم فوق بعض ونقصهم بالطول من النصف وبعدين بالعرض من النصف برضه – كدة حيبقى عندنا مستطيلات بلاستيك كتير حنحطها بين اقراص البرجر طبقات قبل تجميده عشان ما يلزقش ويبقى سهل الفك – كل قطعة تاخد 3 برجر جنب بعض
• من أى صندوق كرتون عندنا نقص قطع كرتون مستطيلة لنضعها تحت البرجر المفرود على قطع البلاستيك
• نحضر طبق زجاج شفاف مسلطح (حنضغط بيه على الكيس عشان كرة اللحمة تتفرد وتتحول الى قرص مستدير سمكه رفيع)
• نقشر البصل والثوم ونقطع اللية شرائح وبعدين نضربهم فى الكبة مع الملح وكل التوابل لغاية ما ينعموا خالص خالص ويبقوا عجينة طرية
• نضرب البيض فى طبق ضرب خفيف
• نصب الخلطة والبيض على اللحمة فى طبق كبير ونقلبهم كويس قوى لغاية ما يتجانسوا ويبقوا كلهم لون واحد
• نشيل الطبق فى الثلاجة ساعتين او فى الفريزر نصف ساعة عشان اللحمة تتماسك وتتشرب السوائل
• نحط شوية زيت فى طبق صغير (حوالى نصف كوب)
• نقطع اللحمة بسكينة وهى فى الطبق زى ما بنقطع البيتزا – الاول نقسم اللحمة 4 ارباع – وكل ربع نقسمة نصفين – كدة يبقى عندنا 8 اجزاء – نقسم كل جزء نصفين – كدة يبقى عندنا 16 جزء – كل جزء نقسمه 4 اجزاء متساوية (لعمل 4 كرات لحم – يعنى حيبقى فى الاخر عندنا 64 قطعة برجر)
• نفرد قطعة بلاستيك على رخامة المطبخ
• نبل ايدنا بشوية زيت وندهن بيها على قطعة البلاستيك بحيث نفردها على رخامة المطبخ لغاية ما تبقىلازقة فى الرخامة
• ناخذ وايدنا مطرحها زيت جزء لحمة ونكوره بين ايدينا
• نحط 3 كرات لحم – واحدة فى وسط قطعة البلاستيك وواحدة على اليمين والثالثة على الشمال – ونبطهها خفيف ببطن ايدنا – وبعدين نغطيها بقطعة بلاستيك ثانية
• نحط الطبق الزجاجى الشفاف فوق كرة لحم وهى متغطية بحيث يبقى مركز الطبق فوق كرة اللحم – ونضغط الطبق لاسفل ممسكين طرفيه بايدينا الاثنين لغاية ما تتحول كرة اللحم الى شكل قرص برجر مستدير ورفيع – ونكرر مع الاثنين اللى جنبهم – عايزين نحصل على اقراص واسعة لكن رفيعة (اقل من سمك عملة معدنية من فئة الجنيه)
• نشيل قطعة اللاستيك بالبرجر اللى عليها بالقطعة الى فوقهم مع بعض وننقلهم الى القطعة الكرتون اللى محضرينها – وبعدين ناخذ قطعة البلاستيك اللى مغطية البرجر ونفردها على الرخامة عشان نعمل عليها ال3 برجرات التاليين – وهكذا – وكل مرة نضع ال3 برجرات فوق ال3 اللى قبلهم على القطعة الكرتون
• نكرر نفس الخطوات بنفس الترتيب – وكل مرة نبل ايدنا زيت خفيف عشان اللحمة ما تلزقش فى ايدينا وكمان عشان البرجر ما يلزقش فى البلاستيك
• لما نخلص حيبقى عندنا 64 قرص برجر بالتمام والكمال – مرصوصين على 3 او 4 قطع كرتون – وكل ما نحط 5 صفوف على قطعة كرتون ندخلها الفريزر على طول مفرودة زى ماهيا
• حنط البرجر فى الفريزر بدون اكياس – عايزينهم عريانين عشان يجمدوا أسرع
• فى اليوم التالى او لما البرجر يتجمد ممكن بقى نحطهم فى أكياس

برجر مشوى

• أنا جربت طرق كتير لطهى البرجر – وتوصلت الى ان أحسن طريقة هى طهيه فى طاسة تيفال ناشفة صغيرة سخنة جداً عشان تشمع البرجر اول ما تلمس الطاسة وبالتالى لا تخرج اللحمة عصارتها – حنعمل البرجر واحدة واحدة – الواحدة مش حتاخد اكتر من دقيقة او 90 ثانية – والطريقة المثالية لبرجر طعمه خطير هى كالتالى:
  • نحط الطاسة الصغيرة ناشفة بدون زيت على أعلى نار بس اصغر عين بوتاجاز
  • بعد ما الطاسة تسخن جدا نحط فيها قرص برجر واحد فقط
  • حنقلب البرجر 3 مرات
    • اول مرة بعد 20 ثانية نمسك يد الطاسة ونلف القرص بحركة دائرية وبعدين نقلبه فى الهوا عشان ينزل على وشه التانى
    • بعد 10 ثوانى نقلبه تانى على وشة الاول
    • بعد نصف دقيقة نقلبه آخر مرة على وشه التانى
    • بعد نصف دقيقة يبقى كدة جاهز – نزحلقه فى الطبق على طول
  • يعنى كلهم على بعض 90 ثانية (20+10+30+30)
  • الطريقة دى حتدينا برجر مستوى عالسريع وطرى جدا لانه محتفظ بعصارته ولم يفقدها – ودة عشان سويناه على نار عالية فحصل تشميع للحمة ولم تنز خارج القرص – ودة حيخلى حجمه ما يكشش زى ما لو سويناه على نار هادية – وكمان تقليبه فى الهوا بدون استخدام مساكة المقصود منه عدم الضغط على اللحم عشان ما يفقدش سوائله – وطبعا اللى ساعدنا على سرعة طهيه اننا عاملينه رفيع – لو كان تخين كان يبقى نى من جوة وكنا نضطر نسيبه على نار هادية كتير فيفقد عصارته ويجلد ويتحروق من الطروف وما يبقاش طرى
  • وكونه رفيع بيساعد على تشميع اللحمة بسرعة فتحتفظ بأغلب عصارتها
• يقدم مع حلقات الطماطم ومستردة بيتى وكيتشب بيتى خالى من السكر – انا باجيب طبق صغير واخلط فيه شوية مستردة على كتشب كتير – بالنسبة اللى بتفصلوها – كدة بيبقى طعمه احلى من لو حطينا كل واحد لوحده – وكمان بيبقى اسهل فى الفرد مع البرجر فى خطوة واحدة
• انصحكم اذا كنتم حتعملوا سندوتشات برجر لاولادكم انكم تجهزوا السندوتشات قبل طهى البرجر – تفتحو العيش وتحطوا فيه كل حاجة – نفرد الكتشب المخلوط بالمستردة – وحلقات الطماطم – وشريحة جبنة شيدر – بحيث تبقى السندوتشات جاهزة جنبنا فى طبق – وكل ما واحداية برجر تتشوى نروح مزحلقينها مباشرةً من الطاسة للسندوتش عشان ما تبردش وعشان سخونتها تسيح الجبنة – الولاد بيحبوا قوى الجبنة سايحة

لاحظوا ان احنا بنعمل اقراص البرجر رفيعة جدا – ودة ليه عدة مزايا: اولا سرعة التجميد – ثانيا: سرعة الفك اول ما تلمس الطاسة السخنة جدا – ثالثا السمك الرفيع بيخليها تستوى من برة وجوة كويس قوى – رابعا البرجر لما بيكون من لحم 100% بيكش جدا عن البرجر الجاهز اللى المصانع بتملاه اضافات تخليه ما يكشش ويفضل زى ماهو – بس على حساب صحتك طبعا – وخامسا لما البرجر بتاعنا نطهيه فى الطاسة ويكش حتلاقوه بقى سميك و ما بقاش رفيع – ومش بيتحرق زى الجاهز ذو الاضافات الغريبة واللى بيكون شبه العجينة

بعد ما تجربوا البرجر دة عمركوا ما حتشتروا جاهز تانى لان طعمه لا يقارن بأى ماركة من الماركات المشهورة الجاهزة – حتحسوا انكوا بتاكلو كفتة حاتى مش برجر

وبالف هنا وشفا

carb/protein/fat grams to calories/ratio converter

طريقة هايلة لعلاج مرضى السكر بدون ادوية

الطريقة اللى حاشرحها لكم هنا انا جربتها على نفسى قبل ما اكتبها لكم – وجابت نتائج هايلة

انا كان السكر عندى صايم 180 – وبعد الاكل كان بيوصل 230 – وبعد اتباع النظام اللى حاكتبه لكم بفضل الله السكر صايم عندى بقى 87 ولله الحمد – يعنى بقيت طبيعى (الطبيعى من 60-100)

عن طريق النظام التالى بالاكل فقط تقدروا تنزلوا السكر عندكم – وتستغنوا عن أى ادوية – نظام الاكل لذيذ جدا ومشبع جدا – يعنى مش حتحسوا بأى جوع ولا حرمان

كمان اللى وزنه زايد وعايز يخس حيلاقى انه بيخس كويس قوى على نفس النظام دة – النظام دة على فكرة مفيد لكل اللى بيبحث عن الصحة والحيوية والرشاقة – مش بس المرضى – اما اللى بيشتكوا من اى حاجة حيلاقوا تحسن مذهل برضه – مرضى ضغط الدم والكزليسترول ودهون الدم – كله بيتظبط

النظام دة اسمه LCHF وبدأه علماء فى السويد – وبعد ما حقق نجاح مذهل لمرضى السكر والباحثين عن الرشاقة والصحة والحيوية انتشر فى باقى دول اوروبا وامريكا

ودلوقتى تعالوا تخش فى التفاصيل

الممنوعات

عليكم الغاء الاصناف التالية من حياتكم

• كل ما هو مصنوع من الدقيق (العيش – المكرونة – المخبوزات والعجائن والفطائر والبيتزا)
• الارز
• البطاطس
• الحلويات والفواكه والعصائر والمشروبات الغازية – كل ما يحتوى على سكر طبيعى او مضاف
• البقوليات كالفول والفاصوليا البيضاء والبسلة

كل ما سبق ممنوع تناوله منعا باتا – ولا حتى قطمة واحدة ولا لقمة ولا شفطة – انسى هذه الاصناف تماماً وكأنها لا وجود لها فى هذا الكوكب

المسموحات

• الزبدة الطبيعية 100% (مش النباتية ولا الخليط) والسمن البلدى
• اللحوم بجميع انواعها ويفضل اللحوم الدسمة
• الفراخ وجميع انواع الطيور
• الاسماك وخصوصا عالية الدسم مثل الماكريل والتونة والسالمون والسردين
• البيض
• الجبن الناشفة عالية الدهون مثل الشيدر والرومى
• الخضروات وخصوصاُ الورقية

الكميات والنسب

لو مريض بالسكر وعايز تخف منه وعايز كمان تخس – او لو مش مريض لكن فقط عايز تخس – حتحدد لنفسك عدد معين من السعرات – انا مشيت على 1600 سعر فى اليوم وجاب نتائج هايلة

اما لو مش محتاج تخس يبقى كل بدون حساب السعرات خالص

المهم هو نسب الاكل – احنا كلنا اكلنا مكون من

• كربوهيدرات (النشويات والسكريات)
• بروتينات
• دهون

عايزين فى النظام دة يكون اكلنا مكون من النسب الاتيه:

• كربوهيدرات 5%
• بروتينات 15%
• دهون 80%

حتستغربوا وتقولوا: ازاى ناكل كل الدهون دى ونخس – هناك اسباب علمية وطبية يطول شرحها ومش عايز اطول عليكم (لو حد عايز يتعمق ويقرأ كتب ومراجع طبية فى هذا الامر يقول لى) – لكن انا حأقول لكم حاجة واحدة بس: التجربة خير دليل – جرب اسبوعين بس – وحتذهل من النتيجة اللى حتكون عكس كل التوقعات والنصائح الطبية اللى بيكرروها علينا من ساعة ما اتولدنا – صدقنى حتدعيلى

لو تحبوا تحسبوا لنفسكم تاكلوا ايه بالظبط كل يوم وايه الكميات المناسبة يبقى ممكن تستخدموا الموقع دة: MyFitnessPal – دة موقع هايل بيحفظ لك مذكرة يومية باكلاتك – كل يوم صفحة – وتقدر تعرف كلت ايه امبارح او من شهر او سنة – وبتدخل بنفسك كل مكونات اكلك وهو يحسب لك كل حاجة سعراتها كام وفيها كام كربوهيدرات وكام بروتين وكام دهون – ويجمع لك حصيلة كل اللى بتاكله او ناوى تاكله عشان تقدر تزود او تنقص الكميات بحيث تحقق هدفك بالنسب اللى اتفقنا عليها فوق

اما لو مش غاويين غلبة وعايزين من الاخر – اليكم مثال لأكل يوم واحد – عبارة عن كل المقادير اللى حتاكلها فى اليوم دة – وانت حر تطبخها بالطريقة اللى تعجبك بس فى حدود الاصناف والكميات الموضحة:

مثال لطعام يوم واحد

بتناول الاصناف والكميات التالية ستستهلك 1600 سعر – 5% منهم كربوهيدرات و15% بروتينات و80% دهون:

• 2 بيضة
• 40جم جبنة رومى (شريحتين تقريبا)
• 110جم زبدة طبيعية
• 100جم طماطم (طماطماية متوسطة او 2 صغيرين خالص)
• 100جم فلفل رومى اخضر (3 حبات صغار)
• نصف اللحم والشوربة التالية (يعنى الطبخة التالية تؤكل على يومين)
  • 300جم لحم كندوز دسم
  • فص ثوم
  • بصلة صغيرة 50جم
  • قرن فلفل حامى صغير 10جم (اختيارى)
  • 200جم طماطم
  • 40جم ففل رومى اخضر
  • بهارات وملح وفلفل وكبابة صينى وورق لورا
  • نقطع الخضروات قطع كبيرة ارباع ونضيفها لماء سلق اللحم
  • نفس المقادير يمكن عملها مع نصف فرخة وناكلها برضه على يومين – كل يوم ربع فرخة مع نصف الشوربة – مع ملاحظة زيادة الزبدة 10جم لتصبح 120جم فى اليوم اللى حناكل فيه ربع فرخة بدل اللحمة

الكميات دى تقدروا تقسموها خلال اليوم زى مانتوا عاوزين – وتطبخوها بالطريقة المفضلة ليكم – بشرط عدم تغيير الاصناف او الكميات – لاحظوا ان انا كاتب لكم كل حاجة بالجرام عشان الدقة الحسابية – وحاولت اكتبها بالبلدى برضه عشان اللى معندوش ميزان – لكن لو تقدروا تشتروا ميزان مطبخ يبقى احسن

اما اللى عايز يغير ويختار بنفسه اصناف وكميات مختلفة ممكن طبعا بس فى الحالة دى روح الموقع اللى ذكرته لك فوق واعمل حساب جديد وخطط وجباتك اليومية زى ما تحب

اذا جربتم طريقتى وكتب الله لكم الشفاء ارجو ان تدفعوا أجرتى – وهى ان تطلعوا حاجة لله – تتصدقوا بأى مبلغ للفقراء والمساكين – وان شاء الله الاجر والثواب لكم وان شاء الله أفوز معكم بجزء من الثواب

 

ياريت اللى يجرب الطريقة دى يكتب لنا هنا تجربته عشان يشجع الاخرين على اتباعها – لانى بلاقى صعوبة شديدة فى اقناع الناس بتغيير نمط اكلهم اللى متعودين عليه طول حياتهم – مع اننا طول عمرنا بناكل عيش ورز ومكرونة خدنا منهم ايه؟ ولا حاجة – بالعكس دول هما سبب المشاكل كلها – جرب بنفسك تلغيهم من حياتك واستمتع بالفرق الشاسع مع احلى صحة ورشاقة وحيوية باذن الله – وماتنسوش تدعولى!

شوربة فراخ خطيرة

يتميز نظام LCHF الغذائى بانه يسمح لنا بتناول كل ما نشتهى من بروتينات ودهون طبيعية بكميات مفتوحة – بشرط الامتناع تماما عن أى نشويات او سكريات

الوصفة التالية هى من أطباقى المفضلة – وجبة مشبعة تشعرك بالامتلاء والطاقة والحيوية والدفء خصوصا فى الشتاء – بالرغم من اننى احبها طوال شهور السنة – ممكن ناكلها فى الفطار او الغدا او العشا – زى ما نحب

المقادير

• بصلة صغيرة
• ثمرة فلفل رومى اخضر
• قرن فلفل حامى
• 3 حبات طماطم متوسطين
• 2 فص ثوم
• ربع كوب خل
• فرخة مقطعة 4 ارباع ومنقوعة فى محلول ملحى (3 م ص ملح مذاب فى ماء يكفى لتغطية قطع الفرخة فى حلة) وبايتة من اليوم السابق فى الثلاجة
• 1 م ص ورق لورا مطحون
• 1 م ص فلفل اسود مطحون
• 1/2 م ص كبابة صينى
• 1/2 م ص بهارات
• 1/8 م ص حبهان مطحون

الطريقة

• فى اليوم السابق ندوب 3 م ص ملح فى حلة بها بعض الماء – ونقطع الفرخة 4 ارباع ونغمرها فى المحلول الملحى بحيث يغطيها الماء – ثم نتركها فى الثلاجة لليوم التالى
• ندلق ماء نقع الفرخة ونشطفها جيدا ثم نضع ماء جديد يغطيها ونضع الحلة على النار
• نضرب اول 6 مكونات فى الخلاط مع قليل من الماء حتى يصيروا عصير ناعم خالص – ثم نصبهم على الفرخة فى الحلة
• نضيف كل التوابل ونقلب – ثم نغطى الحلة ونتركها تغلى 20 دقيقة من بداية الغليان
• نطفى النار ونترك الحلة مغطاه 20 دقيقة أخرى على الاقل
• نأخذ ربع فرخة ونصفيها جيدا من الشوربة ثم نحمرها فى ملعقة سمنة بلدى او زبدة فى طاسة صغيرة تيفال حتى يصبح الوجهين لونهم ذهبى
• يقدم طبق الشوربة ساخنا مع ربع الفرخة المحمر وشريحة جبنة رومى

وجبة مشبعة خالية من النشويات – وتكفى لاربعة ايام او لاربعة اشخاص

وبالف هنا وشفا