جبنة كاسات وجبنة طرية بيتى

اليكم طريقة سهلة جدا لتحضير جبنة كاسات للفرد فى السندوتشات – وكمان لو عاملين ريجيم ممكن نعملها طرية حتبقى حلوة قوى لما نغمس فيها الخس او الجرجير – مع ملاحظة ان فى الحالة دى حتبقى اطرى من جبنة الكاسات – ودة مقصود عشان تبقى مناسبة للتغميس مع الخس والجرجير – الفرق الوحيد بين جبنة الكاسات والجبنة الطرية ان جبنة الكاسات حنعملها بالزبدة – اما الجبنة الطرية فحنستخدم زيت

المكونات

• ربع كيلو جبنة اسطمبولى ناشفة (لا تشتريها اذا كانت طرية) – او ربع كيلو جبنة شيدر مبشورة – او خليط شيدر ورومى مبشورين
• ربع كيلو حليب
• ثمن كيلو زبدة او زيت دوار شمس
• قرن فلفل حامى (اختيارى)

الطريقة

• لو عايزين جبنة كاسات متماسكة نستخدم زبدة – اما لو عايزين جبنة طرية للتغميس مع الخس والجرجير نستخدم زيت بدل الزبدة
• فى حالة استخدام جبنة شيدر او رومى: نسخن الحليب مع الجبنة المبشورة والزبدة على نار هادية لغاية ما يسيحوا خالص
• نفرم قرن الفلفل جيدا مع قليل من الحليب فى خلاط – ثم نصب باقى المكونات ونضربهم ضرب مبرح على أعلى سرعة لمدة 3 دقائق على الأقل
• نصب الخليط فى برطمان زجاجى او علبة بلاستيك ونضعه فى الفريزر نصف ساعة وبعدين فى الثلاجة
• فى اليوم التالى حيبقى متماسك أكتر وتقيل عن اليوم الاول
• نفرده بالمعلقة لعمل السندوتشات – او نغمس فيه اوراق خس او جرجير – او نرش منه على اطباق السلطة الخضراء مع حلقات زيتون لتعطى طعم السلطة اليونانى الرائعة

الطريقة دى موفرة جدا – فباستخدام تلك الالة الحاسبة نجد أن الكيلو من الجبنة الطرية الاسطمبولى يقف ب14ج و40 قرش فقط – والكيلو من الشيدر او الرومى ب27ج – قد يزيد او يقل حسب سعر شرائك للمكونات طبعا – ويمكنك استخدام تلك الالة الحاسبة بنفسك لمعرفة ما تكلفته بالضبط

دة غير ان الجبنة الطرية بتقعد اكثر بكتير ومش بتخلص بسرعة زى أى جبنة عادية – وطبعا ممكن تضاعفوا المقادير بنفس النسب – يعنى مثلا نص جبنة ونص حليب وربع زبدة او زيت حيدونا كيلو وربع جبنة كاسات او جبنة طرية

وبالف هنا وشفا

برنامج ريجيم صحى متكامل

اذا كنتم تبحثون عن أفضل طريقة للتخسيس بطريقة صحية للوصول الى جسم رشيق ومتناسق – لكن لا تريدون ان تعانوا من الجوع وزهقتوا من اكل الرجيم التقليدى اللى بلا طعم – فانتوا جيتوا للمكان المناسب – فهنا سأقدم لكم نظام ريجيم متكامل يتميز بأنه

• صحى
• لذيذ
• مشبع
• يستبدل الارهاق والخمول بالقوة والنشاط
• يعتبر اسلوب حياة وليس مجرد ريجيم وقتى

النظام يعتمد فى كلمتين على الغاء النشويات والسكريات من حياتك – والاعتماد فى امداد جسمنا بالطاقة والشبع على تناول الدهون الطبيعية والبروتينات والخضروات – معظم من يقرأ عن هذا النظام يستغرب ولا يصدق انه حيخس مع تناول الزبدة والسمن البلدى – لكن القليلين اللى كان عندهم الشجاعة انهم يجربوا ذهلوا من النتائج واستمروا على النظام بعد ان ثبت لهم بالتجربة العملية فوائده الرائعة سواءا من ناحية الرشاقة او من الناحية الصحية – واختفت مشاكلهم الصحية كلها تقريبا

لكى نبدأ فى اتباع هذا النظام الرائع نحتاج اولا الى شراء ما سنأكله – ثم نستعرض معا جدول الوجبات اليومية وطرق اعدادها وطهيها

قائمة المشتريات

• فراخ
• لحمة (كندوز ستيك – مكعبات – مفروم – ضانى)
• سمك – جمبرى – تونة – سلمون – سردين
• بيض
• خضروات: كوسة – باذنجان – قرنبيط – ملوخية – سبانخ – بروكلى – جزر – طماطم – خيار – خس – جرجير – بقدونس – شبت – كزبرة
• فاكهة: تفاح – برتقال – كمثرى – توت – فراولة
• منتجات البان: جبنة شيدر – قشطة – زبادى
• دهون: زبدة – سمن بلدى – زيت زيتون – زيت حار (زيت بذر كتان) – زيتون أخضر مخلل

جدول الوجبات اليومية

الافطار

• جرجير او خس – زيتون أخضر – مع واحد من الاختيارات التالية
  • بيض بالبسطرمة والزبدة
  • بيض باللحمة المفرومة المحمرة فى الزبدة
  • عجة بيض بالزبدة
  • كوسة بالبيض والزبدة

الغذاء

• خضروات سوتيه او متشوحة فى الزبدة
• طبق سلطة خضراء – زيتون أخضر – خس او جرجير
• واحد من الاختيارات التالية:
  • ربع فرخة محمرة او مشوية
  • لحمة ستيك محمرة أو مشوية
  • لحم كباب حلة
  • سمك مقلى او مشوى

العشاء

• طبق سلطة خضراء – جرجير او خس – زيتون أخضر
• واحد من الاختيارات التالية
  • هامبرجر بالجبنة والطماطم بدون خبز
  • شاورمة
  • باذنجان مقلى

وجبات خفيفة/سناكس

اذا شعرنا بالجوع بين الوجبات الرئيسية يمكننا تناول احد الاختيارات التالية بعد الاكل بساعتين أو أكثر

• قطعة فاكهة (مسموح بواحدة فقط فى اليوم)
• شريحة جبنة شيدر او رومى ملفوفة فى ورقة خس/جرجير
• بيضة مسلوقة ملفوفة فى ورقة خس/جرجير
• كوب زبادى نغمسه بورق خس او جرجير
• زيتون أخضر مخلل

المشروبات

• مسموح بأى مشروبات ساخنة لكن بدون أى سكر (شاى – قهوة الخ)
• يمكن تناول مشروبات غازية خالية من السكر لكن يفضل الاستغناء عنها بالتدريج

الرياضة

ضرورى جدا فى هذا النظام ممارسة أى نشاط رياضى حتى لو كان مجرد المشى نصف ساعة – و الافضل ساعة يومياً – او حتى ممارسة تدريبات ايروبيكس فى المنزل مرتين صباحا ومساءا

مع الرياضة توقعوا ان ينخفض الوزن من 10 الى 15 كيلو خلال 3 شهور – وأحيانا أكثر – اما بدون أى رياضة ولا أى نشاط حركى فسيكون فقد الوزن اقل بكثير – حوالى 3 كيلو فقط خلال نفس المدة

ملحوظات

• غير مسموح اطلاقا بالعيش  (ولا أى مخبوزات أو أى طعام يحتوى على دقيق) ولا الارز ولا المكرونة ولا البطاطس ولا السكر – كل الوجبات تؤكل المعلقة او الشوكة
• الاكلات المذكورة فى الجدول مجرد أمثلة – يمكنكم تنويع الاكلات كفيما شئتم – بشرط الا تحتوى على أى من الممنوعات المذكورة فى النقطة السابقة
• لا يوجد فى هذا النظام يوم أجازة – وجبة واحدة مخالفة تعيدنا أسبوع كامل للوراء
• يمكن تناول خس – جرجير – زيتون أخضر مخلل مع أى وجبة طوال اليوم – ويفضل نقع الزيتون فى ماء مع تغييره أكثر من مرة للتخلص من الملح الزائد
• استخدموا اوراق الخس والجرجير كبديل للعيش – سواءا فى الغموس او كسندوتشات وذلك بوضع الاكل فيها ثم لفها وكأنها سندوتشات سورى – سندوتشات بيض – سندوتشات شاورمة – سندوتشات هامبرج – سندوتشات جبنة وطماطم …
• بالنسبة للبيض نستخدم 3 بيضات فى الوجبة
• يمكن استبدال الزبدة بالسمنة البلدى فى أى وجبة
• الزبدة يجب ان تكون زبدة طبيعية وليست زبدة من دهون نباتية – معظم الزبدة السايبة بتكون نباتية فلا تشتروها – اشتروا الزبدة المغلفة وتأكدوا انها زبدة طبيعية ولا تحتوى على دهون نباتية – حتعرفوا من سعرها – فالزبدة الطبيعية 3 اضعاف سعر النباتية – اشتروا ماركة مثل روتانا مثلا او لوربارك
• نفس الشئ بالنسبة للسمن البلدى – ابتعدوا تماما عن شراء السمن المصنوع من دهون نباتية او زيوت مهدرجة – اشتروا فقط السمن المستورد مثلا من نيوزيلاندا – مثل ماركة افانتى – خشالة – روتانا
• مسموح باستخدام المستردة والكاتشب والمايونيز مع أى وجبة
• فى حالة عدم توفر زبدة طبيعية او سمن بلدى او زيت زيتون يمكن استخدام زيت دوار الشمس للتحمير والقلى – ممنوع تماما استخدام السمن او الزبدة النباتى المصنوعة من زيوت مهدرجة او دهون نباتية
• ممنوع استخدام الجبنة البيضاء المصنوعة من دهون نباتية – مثل الفيتا ودومتى وباندا وجرين لاند وغيرها – اشترى فقط جبنة شيدر مستوردة – فان لم تجد فاشترى جبنة رومى

فوائد صحية بالجملة

التخسيس ليس الميزة الوحيدة لهذا النظام – فبعد بضعة أيام من اتباعه ستكتشف الاتى

• اذا كنت حاليا تعانى من أى مشاكل فى الهضم – انتفاخ – امساك – ارتجاع المعدة/ارتجاع المرئ – فكل هذه المشاكل ستختفى
• اذا كنت تعانى من السكر او ارتفاع ضغط الدم فستقترب من المعدلات الطبيعية وتصبح اقل اعتمادا على الادوية
• اذا كنت كثير العدوى بامراض البرد والزكام واللوز واحتقان الزور – فستجد ان كل تلك الامراض ستصبح ذكريات من الماضى ولن تهاجمك مرة أخرى – الا اذا عدت الى طريقة أكلك القديمة
• اذا كنت حاليا تعانى من الارهاق والتعب من أقل مجهود – او تشعر بالنعاس بعد الأكل – فستفاجأ ان كامل نشاطك وحيويتك قد عادوا اليك بقدرة قادر! وستلاحظ انك أصبحت مفعم الطاقة والنشاط
• اذا كانت رائحة العرق لديك كريهة – او رائحة الحمام بعد استخدامه منفرة – فكل ذلك سيختفى
• اذا كنت تعانى من صدور ريح كريهة تسبب لك الاحراج بصفة متكررة – فستصبح من الذكريات – بالاضافة لاختفاء التجشوء (التكريع) تقريبا – وذلك كله بفضل عدم تكون غازات فى جهازك الهضمى بعد التوقف عن تناول النشويات والسكريات
• لو بتنام كتير حاليا وتقوم تعبان – حتلاحظ انك مبقيتش محتاج تنام كتير زى الاول – ومع ذلك تصحى فى كامل نشاطك وحيويتك
• أى التهابات يعانى منها الجسم حاليا ستختفى او على الأقل تتحسن كثيرا – التهابات فى المفاصل – روماتيزم/روماتويد – التهابات جلدية – اورام – الزهايمر – التصلب المتعدد MS – حتى مرضى الاورام السرطانية يستفيدون كثيرا من اتباع هذا النظام

وصفات الاكل

حتلاقوا وصفات اكل صحى كثيرة ومتنوعة كتبتها لكم فى قائمة طعامى الصحى

باذنجان مقلى بالثوم والخل

الباذنجان المقلى من أحلى الاطعمة – وهى مناسبة جدا لمن يتبع نظام LCHF

المقادير

• 2 كيلو باذنجان رومى
• كوب خل
• 4 فصوص ثوم
• 2 حبة فلفل رومى اخضر
• 1 قرن صغير فلفل حامى (اختيارى)
• معلقة صغيرة ملح
• معلقة صغيرة كمون
• نصف معلقة صغيرة ملح صينى – جلوتامات صوديوم

الطريقة

• نقطع عناقيد الباذنجان الخضراء ثم نغسله جيدا
• نسخن طاسة القلى
• نقطعه حلقات طولية – بمعنى ان مكان العنقود المقطوع يكون تحت نسند عليه الباذنجانة ونقطع حلقات بالطول من فوق لتحت (نتجنب تقطيعه بالعرض والا حيشرب زيت كتير جدا)
• نحمر الحلقات بمجرد تقطيعها اولا بأول – بدون نقع فى ملح ولا أى شئ – يشترط فقط اننا نقطع بالطول واننا نحمر الحلقات فورا بلا ركن
• نخرج الحلقات عندما يصبح لونها وردى – نصفيها جيدا من الزيت ونضعها فى حلة
• نضرب باقى المقادير كلها فى الخلاط لغاية مايبقوا عصير
• نصب العصير على الباذنجان المقلى فى الحلة – ونقلبه من فوق لتحت عشان كل الحلقات تنغمس فى العصير
• ممكن ناكل منه فى نفس اليوم – لكن لو حطينا الحلة مغطاه فى الثلاجة – عشان الباذنجان يتخدًع فى الثوم والخل – فى اليوم التالى الطعم حيكون خطيييييييييير وما لوش حل
• ممكن يفضل فى الثلاجة أسبوع وبكدة يبقى وجبة جاهزة فى أى وقت
• ينفع يتعمل سندوتشات لذيذة للولاد مع لحسة جبنة بيضاء
• انا شخصيا بآكله بالشوكة مع هامبرجر مشوى بطريقتى المفضلة وحلقات الطماطم وعيدان الجرجير الطازجة – بتبقى وجبة مشبعة تماما التمام

فراخ ولحمة طرية بطريقة الطهى البطئ

لما تجربوا الطريقة دى مش حتصدقوا طعامة الفراخ وحتبقى اطرى فراخ اكلتوها فى حياتكوا

المقادير

• فرخة
• ثمرة طماطم
• بصلة صغيرة
• 1 فلفل اخضر رومى
• فصين ثوم
• معلقة صغيرة ملح
• 3 معالق كبار خل
• معلقة كبيرة بهارات كارى من كارفور

الطريقة

• نضع الفرخة صحيحة او مقطعة فى حلة
• نضرب الخضروات مع الملح والخل فى الخلاط لغاية ما ينعموا ثم نصبهم فوق الفرخة ونقلب كويس (لا نضع البهارات الان)
• نغطى الحلة فى الثلاجة 6 ساعات
• نضع الحلة على اصغر عين بوتاجاز على نار عالية لدقائق – واول ما حتبدأ تبقلل نوطى النار جدا جدا – وكاننا بندمس فول – ونتركها متغطية 40 دقيقة – عايزينها تستوى نصف سوا عشان يفضل اللحم محتفظ بطعامته ولا يخرج منه كل البهريز
• نخرج قطع الفراخ من الحلة ونرصها فى صينية فرن
• نرش عليها بهارات الكارى – انصحكم ببهارات الكارى بتاعة كارفور تحفة – او اى بهارات متوفرة لديكم
• نضع صينية الفراخ على الرف السفلى ونشغل الشواية العلوية بشعلة متوسطة مش عالية لمدة ربع ساعة حتى يبقى لون الفراخ ذهبى – ثم نخرج الصينية ونقلب قطع الفراخ ونرش البهارات على الوجع الاخر ثم ندخلها تحت الشواية 8 دقائق حتى يصبح لونها ايضا ذهبى

لاحظوا الآتى:

• الفراخ فى الطريقة دى لا نضع معها أى سوائل – ولا نقطة – لان الفرخة حتنزل بهريز منها فيها وحتستوى فيه وفى البخار بتاعه
• مش عايزين نوصل لدرجة الغليان – قبل ما تبدأ تغلى نوطى النار خالص – دة سر الفراخ الطرية التى تذوب فى الفم – اما لو غليناها على نار عالية انسجة الفرخة حتمسك فى بعضها وتبقى صعبة فى المضغ – وكمان عشان احنا مش حاطين سوائل وعايزين الفرخة تستوى على مهلها نص سوا فقط مش كتير
• الفراخ بتطلع ذائبة ذوبان – ودة بفضل الطهى البطئ اللى بيخلى انسجة البروتين تتراخى وتطرى – ودى افضل طريقة لطهى اللحوم عموما – بعكس طريقة الغلى فى سوائل على نار عالية فى البداية – اللى بتخلى جزيئات البروتين تتماسك أكثر فتطلع الفراخ واللحوم بتشد فى الاكل
• الخضروات بتضفى نكهة جميلة للفرخة
• الفرخة بعد طهيها حتترك بهريز فى الحلة ممكن نستخدمه فى عمل أى خضروات – نحط معاها مثلا ملوخية – كوسة – سبانخ – بامية – أى خضروات بنحبها – او نعمل بيهم احلى صينية بطاطس فى الفرن
• نفس الطريقة ممكن نطهى بيها مكعبات اللحم – بس نزود مدة الطهى فى الكندوز الى 3-4ساعات
• فى حالة الرغبة فى عمل شوربة على اللحمة او الفراخ هنا فقط نضيف ماء – وممكن نعلى النار فى البداية وبمجرد ما تقرب من درجة الغلى – وقبل ان تبدأ فى الغليان – نوطى النار اقل درجة ونتركها تستوى ببطء حتى تمام السوا
• انا كنت باستخدم طريقة نقع الفراخ فى محلول ملحى من قبلها بيوم واشيلها فى الثلاجة – لكن بطلت اعمل كدة ولقيت ان طريقة الطهى البطئ اسهل وعملية اكتر لانها لا تحتاج تحضير اى شئ من قبلها بيوم
• توجد حلل مخصوصة للطهى البطئ slow cookers مصنوعة من الفخار وبتشتغل بالكهرباء – ما اعتقدش انها بيتباع فى مصر – ومش لازم نشترى النوع دة – لو عندنا عين بوتاجاز صغيرة نقدر نوطيها خاااااالص يبقى أى حلة حنحطها عليها حتتحول ببساطة الى slow cooker – انا باستخدم حلل ستانلس ستيل

وبالف هنا وشفا

كوسة محمرة بالبيض والجبنة الشيدر

اليكم طبق لذيذ جدا ومغذى ومشبع جدا

المقادير (كمية تكفى وجبتين)

• 500جم كوسة
• 60جم زبدة
• 4 بيضات كبار
• 100جم جبنة رومى او شيدر مبشورة
• 4 حبات طماطم
• 2 حبة فلفل رومى اخضر
• ملح وفلفل

الطريقة

• نغسل الكوسة ونقطعها حلقات رفيعة
• نضعها مع الزبدة والملح والفلفل فى حلة على نار متوسطة ونغطى الحلة حوالى 15 دقيقة – نقلبهم خلالها مرتين ثلاثة حتى تحمر الكوسة
• نقطع فى طبق الطماطم مكعبات متوسطة والفلفل الرومى قطع صغيرة
• بعد ما تحمر الكوسة وتبقى طرية نطفى النار
• نكسر البيض ونصبه فى الحلة مع التقليب السريع – ونضيف ايضا الجبنة المبشورة – الكوسة والزبدة السخنة كافيين لتسوية البيض وتطرية الجبنة بدون نار عشان عايزينهم طراى
• نضيف الطماطم والفلفل الرومى للحلة ونقلب الكل مع بعض
• تقدم ساخنة مع اوراق الجرجير الطازجة

الطبق دة لذيذ ومشبع – وممكن ناكله كفطار – ولو غدا او عشاء ممكن نعمل جنبه قطعتين برجر مشوى (اضغط هنا للطريقة)

والف هنا وشفا

برجر مجمد بيتى احلى من الجاهز بكتييييير

تحديث: استخدم الان طريقة أحدث وأسهل يمكنكم قراءة تفاصيلها بالضغط هنا

————————————————

البيف برجر أكلة لذيذة وسريعة التحضير – والطريقة اللى حأقولهالكم برجر من لحم 100% بدون فول صويا ولا بقسماط – انا دايما باعمله واشيله عندى فى الفريزر – تحفة وولادى بيتهبلوا على طعمه – يشبه طعم كفتة الحاتى – طعم تانى خالص غير البرجر الجاهز – صحى وخالى من أى اضافات كيماوية ضارة – وكربوهيدراته قليلة خالص: قرص البرجر دة يحتوى على 1 جرام فقط كربوهيدرات

انا باعمل كمية واشكلها اقراص واجمدها فى الفريزر – وفى أى يوم وأى وقت عايزين برجر 3 دقائق ويكون الاكل جاهز

المقادير

• 1800جم لحم مفروم
• 200جم لية ضانى
• نصف كيلو بصل
• 40جم فصوص ثوم مقشر
• 40جم ملح بونو
• 2 معلقة صغيرة فلفل اسود مطحون
• 1 معلقة صغيرة كبابة صينى
• 1 معلقة صغيرة ملح صينى (جلوتامات صوديوم)
• 1/2 معلقة صغيرة قرفة مطحونة
• 4 بيضات كبار

الطريقة

• نجيب اكياس بلاستيك – يفضل تكون شفافة سادة مش مطبوع عليها كلام – نقص الطرف السفلى لكل كيس وكمان نقص اعلى الايدين بتوع الكيس عند مكان التصاق طرفيه ببعض – لنحصل على كيس مفتوح من تحت وفوق زى الجيبة كدة – وبعدين نحطهم فوق بعض ونقصهم بالطول من النصف وبعدين بالعرض من النصف برضه – كدة حيبقى عندنا مستطيلات بلاستيك كتير حنحطها بين اقراص البرجر طبقات قبل تجميده عشان ما يلزقش ويبقى سهل الفك – كل قطعة تاخد 3 برجر جنب بعض
• من أى صندوق كرتون عندنا نقص قطع كرتون مستطيلة لنضعها تحت البرجر المفرود على قطع البلاستيك
• نحضر طبق زجاج شفاف مسلطح (حنضغط بيه على الكيس عشان كرة اللحمة تتفرد وتتحول الى قرص مستدير سمكه رفيع)
• نقشر البصل والثوم ونقطع اللية شرائح وبعدين نضربهم فى الكبة مع الملح وكل التوابل لغاية ما ينعموا خالص خالص ويبقوا عجينة طرية
• نضرب البيض فى طبق ضرب خفيف
• نصب الخلطة والبيض على اللحمة فى طبق كبير ونقلبهم كويس قوى لغاية ما يتجانسوا ويبقوا كلهم لون واحد
• نشيل الطبق فى الثلاجة ساعتين او فى الفريزر نصف ساعة عشان اللحمة تتماسك وتتشرب السوائل
• نحط شوية زيت فى طبق صغير (حوالى نصف كوب)
• نقطع اللحمة بسكينة وهى فى الطبق زى ما بنقطع البيتزا – الاول نقسم اللحمة 4 ارباع – وكل ربع نقسمة نصفين – كدة يبقى عندنا 8 اجزاء – نقسم كل جزء نصفين – كدة يبقى عندنا 16 جزء – كل جزء نقسمه 4 اجزاء متساوية (لعمل 4 كرات لحم – يعنى حيبقى فى الاخر عندنا 64 قطعة برجر)
• نفرد قطعة بلاستيك على رخامة المطبخ
• نبل ايدنا بشوية زيت وندهن بيها على قطعة البلاستيك بحيث نفردها على رخامة المطبخ لغاية ما تبقىلازقة فى الرخامة
• ناخذ وايدنا مطرحها زيت جزء لحمة ونكوره بين ايدينا
• نحط 3 كرات لحم – واحدة فى وسط قطعة البلاستيك وواحدة على اليمين والثالثة على الشمال – ونبطهها خفيف ببطن ايدنا – وبعدين نغطيها بقطعة بلاستيك ثانية
• نحط الطبق الزجاجى الشفاف فوق كرة لحم وهى متغطية بحيث يبقى مركز الطبق فوق كرة اللحم – ونضغط الطبق لاسفل ممسكين طرفيه بايدينا الاثنين لغاية ما تتحول كرة اللحم الى شكل قرص برجر مستدير ورفيع – ونكرر مع الاثنين اللى جنبهم – عايزين نحصل على اقراص واسعة لكن رفيعة (اقل من سمك عملة معدنية من فئة الجنيه)
• نشيل قطعة اللاستيك بالبرجر اللى عليها بالقطعة الى فوقهم مع بعض وننقلهم الى القطعة الكرتون اللى محضرينها – وبعدين ناخذ قطعة البلاستيك اللى مغطية البرجر ونفردها على الرخامة عشان نعمل عليها ال3 برجرات التاليين – وهكذا – وكل مرة نضع ال3 برجرات فوق ال3 اللى قبلهم على القطعة الكرتون
• نكرر نفس الخطوات بنفس الترتيب – وكل مرة نبل ايدنا زيت خفيف عشان اللحمة ما تلزقش فى ايدينا وكمان عشان البرجر ما يلزقش فى البلاستيك
• لما نخلص حيبقى عندنا 64 قرص برجر بالتمام والكمال – مرصوصين على 3 او 4 قطع كرتون – وكل ما نحط 5 صفوف على قطعة كرتون ندخلها الفريزر على طول مفرودة زى ماهيا
• حنط البرجر فى الفريزر بدون اكياس – عايزينهم عريانين عشان يجمدوا أسرع
• فى اليوم التالى او لما البرجر يتجمد ممكن بقى نحطهم فى أكياس

برجر مشوى

• أنا جربت طرق كتير لطهى البرجر – وتوصلت الى ان أحسن طريقة هى طهيه فى طاسة تيفال ناشفة صغيرة سخنة جداً عشان تشمع البرجر اول ما تلمس الطاسة وبالتالى لا تخرج اللحمة عصارتها – حنعمل البرجر واحدة واحدة – الواحدة مش حتاخد اكتر من دقيقة او 90 ثانية – والطريقة المثالية لبرجر طعمه خطير هى كالتالى:
  • نحط الطاسة الصغيرة ناشفة بدون زيت على أعلى نار بس اصغر عين بوتاجاز
  • بعد ما الطاسة تسخن جدا نحط فيها قرص برجر واحد فقط
  • حنقلب البرجر 3 مرات
    • اول مرة بعد 20 ثانية نمسك يد الطاسة ونلف القرص بحركة دائرية وبعدين نقلبه فى الهوا عشان ينزل على وشه التانى
    • بعد 10 ثوانى نقلبه تانى على وشة الاول
    • بعد نصف دقيقة نقلبه آخر مرة على وشه التانى
    • بعد نصف دقيقة يبقى كدة جاهز – نزحلقه فى الطبق على طول
  • يعنى كلهم على بعض 90 ثانية (20+10+30+30)
  • الطريقة دى حتدينا برجر مستوى عالسريع وطرى جدا لانه محتفظ بعصارته ولم يفقدها – ودة عشان سويناه على نار عالية فحصل تشميع للحمة ولم تنز خارج القرص – ودة حيخلى حجمه ما يكشش زى ما لو سويناه على نار هادية – وكمان تقليبه فى الهوا بدون استخدام مساكة المقصود منه عدم الضغط على اللحم عشان ما يفقدش سوائله – وطبعا اللى ساعدنا على سرعة طهيه اننا عاملينه رفيع – لو كان تخين كان يبقى نى من جوة وكنا نضطر نسيبه على نار هادية كتير فيفقد عصارته ويجلد ويتحروق من الطروف وما يبقاش طرى
  • وكونه رفيع بيساعد على تشميع اللحمة بسرعة فتحتفظ بأغلب عصارتها
• يقدم مع حلقات الطماطم ومستردة بيتى وكيتشب بيتى خالى من السكر – انا باجيب طبق صغير واخلط فيه شوية مستردة على كتشب كتير – بالنسبة اللى بتفصلوها – كدة بيبقى طعمه احلى من لو حطينا كل واحد لوحده – وكمان بيبقى اسهل فى الفرد مع البرجر فى خطوة واحدة
• انصحكم اذا كنتم حتعملوا سندوتشات برجر لاولادكم انكم تجهزوا السندوتشات قبل طهى البرجر – تفتحو العيش وتحطوا فيه كل حاجة – نفرد الكتشب المخلوط بالمستردة – وحلقات الطماطم – وشريحة جبنة شيدر – بحيث تبقى السندوتشات جاهزة جنبنا فى طبق – وكل ما واحداية برجر تتشوى نروح مزحلقينها مباشرةً من الطاسة للسندوتش عشان ما تبردش وعشان سخونتها تسيح الجبنة – الولاد بيحبوا قوى الجبنة سايحة

لاحظوا ان احنا بنعمل اقراص البرجر رفيعة جدا – ودة ليه عدة مزايا: اولا سرعة التجميد – ثانيا: سرعة الفك اول ما تلمس الطاسة السخنة جدا – ثالثا السمك الرفيع بيخليها تستوى من برة وجوة كويس قوى – رابعا البرجر لما بيكون من لحم 100% بيكش جدا عن البرجر الجاهز اللى المصانع بتملاه اضافات تخليه ما يكشش ويفضل زى ماهو – بس على حساب صحتك طبعا – وخامسا لما البرجر بتاعنا نطهيه فى الطاسة ويكش حتلاقوه بقى سميك و ما بقاش رفيع – ومش بيتحرق زى الجاهز ذو الاضافات الغريبة واللى بيكون شبه العجينة

بعد ما تجربوا البرجر دة عمركوا ما حتشتروا جاهز تانى لان طعمه لا يقارن بأى ماركة من الماركات المشهورة الجاهزة – حتحسوا انكوا بتاكلو كفتة حاتى مش برجر

وبالف هنا وشفا

carb/protein/fat grams to calories/ratio converter

طريقة هايلة لعلاج مرضى السكر بدون ادوية

الطريقة اللى حاشرحها لكم هنا انا جربتها على نفسى قبل ما اكتبها لكم – وجابت نتائج هايلة

انا كان السكر عندى صايم 180 – وبعد الاكل كان بيوصل 230 – وبعد اتباع النظام اللى حاكتبه لكم بفضل الله السكر صايم عندى بقى 87 ولله الحمد – يعنى بقيت طبيعى (الطبيعى من 60-100)

عن طريق النظام التالى بالاكل فقط تقدروا تنزلوا السكر عندكم – وتستغنوا عن أى ادوية – نظام الاكل لذيذ جدا ومشبع جدا – يعنى مش حتحسوا بأى جوع ولا حرمان

كمان اللى وزنه زايد وعايز يخس حيلاقى انه بيخس كويس قوى على نفس النظام دة – النظام دة على فكرة مفيد لكل اللى بيبحث عن الصحة والحيوية والرشاقة – مش بس المرضى – اما اللى بيشتكوا من اى حاجة حيلاقوا تحسن مذهل برضه – مرضى ضغط الدم والكزليسترول ودهون الدم – كله بيتظبط

النظام دة اسمه LCHF وبدأه علماء فى السويد – وبعد ما حقق نجاح مذهل لمرضى السكر والباحثين عن الرشاقة والصحة والحيوية انتشر فى باقى دول اوروبا وامريكا

ودلوقتى تعالوا تخش فى التفاصيل

الممنوعات

عليكم الغاء الاصناف التالية من حياتكم

• كل ما هو مصنوع من الدقيق (العيش – المكرونة – المخبوزات والعجائن والفطائر والبيتزا)
• الارز
• البطاطس
• الحلويات والفواكه والعصائر والمشروبات الغازية – كل ما يحتوى على سكر طبيعى او مضاف
• البقوليات كالفول والفاصوليا البيضاء والبسلة

كل ما سبق ممنوع تناوله منعا باتا – ولا حتى قطمة واحدة ولا لقمة ولا شفطة – انسى هذه الاصناف تماماً وكأنها لا وجود لها فى هذا الكوكب

المسموحات

• الزبدة الطبيعية 100% (مش النباتية ولا الخليط) والسمن البلدى
• اللحوم بجميع انواعها ويفضل اللحوم الدسمة
• الفراخ وجميع انواع الطيور
• الاسماك وخصوصا عالية الدسم مثل الماكريل والتونة والسالمون والسردين
• البيض
• الجبن الناشفة عالية الدهون مثل الشيدر والرومى
• الخضروات وخصوصاُ الورقية

الكميات والنسب

لو مريض بالسكر وعايز تخف منه وعايز كمان تخس – او لو مش مريض لكن فقط عايز تخس – حتحدد لنفسك عدد معين من السعرات – انا مشيت على 1600 سعر فى اليوم وجاب نتائج هايلة

اما لو مش محتاج تخس يبقى كل بدون حساب السعرات خالص

المهم هو نسب الاكل – احنا كلنا اكلنا مكون من

• كربوهيدرات (النشويات والسكريات)
• بروتينات
• دهون

عايزين فى النظام دة يكون اكلنا مكون من النسب الاتيه:

• كربوهيدرات 5%
• بروتينات 15%
• دهون 80%

حتستغربوا وتقولوا: ازاى ناكل كل الدهون دى ونخس – هناك اسباب علمية وطبية يطول شرحها ومش عايز اطول عليكم (لو حد عايز يتعمق ويقرأ كتب ومراجع طبية فى هذا الامر يقول لى) – لكن انا حأقول لكم حاجة واحدة بس: التجربة خير دليل – جرب اسبوعين بس – وحتذهل من النتيجة اللى حتكون عكس كل التوقعات والنصائح الطبية اللى بيكرروها علينا من ساعة ما اتولدنا – صدقنى حتدعيلى

لو تحبوا تحسبوا لنفسكم تاكلوا ايه بالظبط كل يوم وايه الكميات المناسبة يبقى ممكن تستخدموا الموقع دة: MyFitnessPal – دة موقع هايل بيحفظ لك مذكرة يومية باكلاتك – كل يوم صفحة – وتقدر تعرف كلت ايه امبارح او من شهر او سنة – وبتدخل بنفسك كل مكونات اكلك وهو يحسب لك كل حاجة سعراتها كام وفيها كام كربوهيدرات وكام بروتين وكام دهون – ويجمع لك حصيلة كل اللى بتاكله او ناوى تاكله عشان تقدر تزود او تنقص الكميات بحيث تحقق هدفك بالنسب اللى اتفقنا عليها فوق

اما لو مش غاويين غلبة وعايزين من الاخر – اليكم مثال لأكل يوم واحد – عبارة عن كل المقادير اللى حتاكلها فى اليوم دة – وانت حر تطبخها بالطريقة اللى تعجبك بس فى حدود الاصناف والكميات الموضحة:

مثال لطعام يوم واحد

بتناول الاصناف والكميات التالية ستستهلك 1600 سعر – 5% منهم كربوهيدرات و15% بروتينات و80% دهون:

• 2 بيضة
• 40جم جبنة رومى (شريحتين تقريبا)
• 110جم زبدة طبيعية
• 100جم طماطم (طماطماية متوسطة او 2 صغيرين خالص)
• 100جم فلفل رومى اخضر (3 حبات صغار)
• نصف اللحم والشوربة التالية (يعنى الطبخة التالية تؤكل على يومين)
  • 300جم لحم كندوز دسم
  • فص ثوم
  • بصلة صغيرة 50جم
  • قرن فلفل حامى صغير 10جم (اختيارى)
  • 200جم طماطم
  • 40جم ففل رومى اخضر
  • بهارات وملح وفلفل وكبابة صينى وورق لورا
  • نقطع الخضروات قطع كبيرة ارباع ونضيفها لماء سلق اللحم
  • نفس المقادير يمكن عملها مع نصف فرخة وناكلها برضه على يومين – كل يوم ربع فرخة مع نصف الشوربة – مع ملاحظة زيادة الزبدة 10جم لتصبح 120جم فى اليوم اللى حناكل فيه ربع فرخة بدل اللحمة

الكميات دى تقدروا تقسموها خلال اليوم زى مانتوا عاوزين – وتطبخوها بالطريقة المفضلة ليكم – بشرط عدم تغيير الاصناف او الكميات – لاحظوا ان انا كاتب لكم كل حاجة بالجرام عشان الدقة الحسابية – وحاولت اكتبها بالبلدى برضه عشان اللى معندوش ميزان – لكن لو تقدروا تشتروا ميزان مطبخ يبقى احسن

اما اللى عايز يغير ويختار بنفسه اصناف وكميات مختلفة ممكن طبعا بس فى الحالة دى روح الموقع اللى ذكرته لك فوق واعمل حساب جديد وخطط وجباتك اليومية زى ما تحب

اذا جربتم طريقتى وكتب الله لكم الشفاء ارجو ان تدفعوا أجرتى – وهى ان تطلعوا حاجة لله – تتصدقوا بأى مبلغ للفقراء والمساكين – وان شاء الله الاجر والثواب لكم وان شاء الله أفوز معكم بجزء من الثواب

 

ياريت اللى يجرب الطريقة دى يكتب لنا هنا تجربته عشان يشجع الاخرين على اتباعها – لانى بلاقى صعوبة شديدة فى اقناع الناس بتغيير نمط اكلهم اللى متعودين عليه طول حياتهم – مع اننا طول عمرنا بناكل عيش ورز ومكرونة خدنا منهم ايه؟ ولا حاجة – بالعكس دول هما سبب المشاكل كلها – جرب بنفسك تلغيهم من حياتك واستمتع بالفرق الشاسع مع احلى صحة ورشاقة وحيوية باذن الله – وماتنسوش تدعولى!

شوربة فراخ خطيرة

يتميز نظام LCHF الغذائى بانه يسمح لنا بتناول كل ما نشتهى من بروتينات ودهون طبيعية بكميات مفتوحة – بشرط الامتناع تماما عن أى نشويات او سكريات

الوصفة التالية هى من أطباقى المفضلة – وجبة مشبعة تشعرك بالامتلاء والطاقة والحيوية والدفء خصوصا فى الشتاء – بالرغم من اننى احبها طوال شهور السنة – ممكن ناكلها فى الفطار او الغدا او العشا – زى ما نحب

المقادير

• بصلة صغيرة
• ثمرة فلفل رومى اخضر
• قرن فلفل حامى
• 3 حبات طماطم متوسطين
• 2 فص ثوم
• ربع كوب خل
• فرخة مقطعة 4 ارباع ومنقوعة فى محلول ملحى (3 م ص ملح مذاب فى ماء يكفى لتغطية قطع الفرخة فى حلة) وبايتة من اليوم السابق فى الثلاجة
• 1 م ص ورق لورا مطحون
• 1 م ص فلفل اسود مطحون
• 1/2 م ص كبابة صينى
• 1/2 م ص بهارات
• 1/8 م ص حبهان مطحون

الطريقة

• فى اليوم السابق ندوب 3 م ص ملح فى حلة بها بعض الماء – ونقطع الفرخة 4 ارباع ونغمرها فى المحلول الملحى بحيث يغطيها الماء – ثم نتركها فى الثلاجة لليوم التالى
• ندلق ماء نقع الفرخة ونشطفها جيدا ثم نضع ماء جديد يغطيها ونضع الحلة على النار
• نضرب اول 6 مكونات فى الخلاط مع قليل من الماء حتى يصيروا عصير ناعم خالص – ثم نصبهم على الفرخة فى الحلة
• نضيف كل التوابل ونقلب – ثم نغطى الحلة ونتركها تغلى 20 دقيقة من بداية الغليان
• نطفى النار ونترك الحلة مغطاه 20 دقيقة أخرى على الاقل
• نأخذ ربع فرخة ونصفيها جيدا من الشوربة ثم نحمرها فى ملعقة سمنة بلدى او زبدة فى طاسة صغيرة تيفال حتى يصبح الوجهين لونهم ذهبى
• يقدم طبق الشوربة ساخنا مع ربع الفرخة المحمر وشريحة جبنة رومى

وجبة مشبعة خالية من النشويات – وتكفى لاربعة ايام او لاربعة اشخاص

وبالف هنا وشفا

فراخ تندورى مشوى

اقدم كم اليوم فراخ تندورى مشوى سهلة جداً وطعم وبتدوب فى الفم دوبان

تعديل: كتبت لكم طريقة احسن هنا

المقادير

• فرخة مقطعة 4 ارباع
• 4 معلقة صغيرة ملح – مليانين هرم اعلى حاجة
• بصلة صغيرة
• 4 فص ثوم
• قرن فلفل حامى
• معلقة كبيرة معجون صلصة
• 5 معلقة كبيرة خل
• 2 معلقة كبيرة كزبرة ناشفة مطحونة
• كوب زبادى او لبن رايب

الطريقة

• ندوب الملح فى ماء وننقع فيه قطع الفراخ 6 ساعات على الاقل – نقع الفراخ فى محلول ملحى يجعل الفراخ تدوب فى الفم وتبقى سهلة فى الشوى
• نشطف الفرخة جيدا 3 مرات وبعدين ننقعها فى ماء للتخلص من الملح الزائد
• نضرب باقى المقادير فى الخلاط ثم نصب الخليط على قطع الفراخ ونقلب كويس
• نرص قطع الفراخ فى صينية فرن بحيث يكون الجلد تحت – ونفرد بمعلقة الخليط على وش الفراخ
• نشعل شواية الفرن العلوية
• نسخن الصينية 5 دقائق على نار بوتاجاز عالية
• نضع الصينية فى الفرن على الرف الاوسط تحت الشواية لكن المرة دى نهدى نار الشواية – لمدة 20 دقيقة
• نخرج الفراخ ونقلبها على الوش التانى ونضع باقى الخليط عليها ثم نعيدها تحت الشواية 20 دقيقة كمان

وبالف هنا وشفا

طاجن ورقة لحمة فى الفرن

لا أنسى ابدا الطعم الرائع لورقة اللحمة الى كان ابى الله يرحمه بيعملها لنا زمان – لحمة وبصل وطماطم ويلفهم فى ورقة لحمة سميكة – نوع ورق كان الجزارين زمان بيستخدموه فى لف اللحمة اعتقد عشان توزن اكتر على حساب وزن اللحمة – المهم بابا كان بيجيب ورقة لحمة من الجزار ويلف فيها اللحمة والبصل والطماطم ويوديها الفرن الافرنجى – وتطلع والورقة لونها مسود شوية والريحة ما حصلتش والطعم حكاية

النهاردة ورق اللحمة دة لم يعد موجود – وماحدش فاضى يروح الفرن عشان يشوى لحمة وما اعتقدش الافران حتى حتوافق دلوقتى زى زمان ايام الروقان – عشان كدة حأجرب النهاردة اعملها فى البيت بس بتعديلات من عندى – فى تجربة جديدة من تجاربى ى المطبخ – ويارب تطلع حلوة – حأقول لكم على المقادير والطريقة – وبعد الفطار حابقى اكتب لكم النتيجة فى التعليقات

المقادير

• معلقتين سمن
• نص كيلو مكعبات لحمة كندوز برازيلى
• 3 بصلات كبار
• قرن فلفل حامى
• 3 فصوص ثوم
• 3 حبات طماطم كبار
• 3 حبات فلفل رومى
• ملح وفلفل وكبابة صينى وورق لورا مطحونين
• كيلو بطاطس (اختيارى)

الطريقة

• نشوح مكعبات اللحمة فى السمن على نار عالية ونقلب معاها بصلتين كبار بعد تقطيعهم ارباع ثم حلقات رفيعة
• نضيف التوابل نقلب بضع دقائق لتشويح اللحمة ثم نضيف 3 كوب ماء ونضيف قرن الفلفل الحامى مقطع 3 حتت
• بعد ماء اللحم ما يغلى نغطى الحلة ونوطى النار خالص اقل حاجة ونتركها 4-5 ساعات لغاية ما تستوى (3 ساعات فقط لو نقعنا اللحمة فى ماء وملح ليلة قبلها – 3 معالق ملح صغيرة هرم ندوبهم فى ماء وننقع فيهم اللحمة بحيث يغطى المحلول الملحى اللحمة ونشيلها فى الثلاجة لليوم التالى – وتانى يوم ندلق الماء ونشطف اللحم ونبدأ فى طهيه – دة حيخلى اللحمة تستوى اسرع وتبقى طرية زى الملبن فى الأكل وما تشدش خالص)
• بعد ما اللحمة تستوى لو كان صوص اللحم كتير نتركها على النار بدون غطاء عشان نقصر الصوص بحيث يبقى تقيل وقليل – دة حيضاعف طعامة الصوص جدا
• فى هذه الاثناء نقطع البصلة الثالثة والطماطم جوانح بالطول ونقطع الفلفل مربعات – ونحطهم فى طاجن فخار او صينية فرن – وبعد ما الصوص يقل ويبقى ثقيل ناخد معلقتين منه ونرشهم على الخضروات ونقلب – ما نحطش صوص كتير – يادوبك صوص يدهن الخضروات من غير ما يعوم فى قعر الطاجن – عايزين نشويهم مش نسلقهم – وبعدين نرفع اللحمة والبصل من الصوص باستخدام مقصوصة ونحطهم مع الخضروات ونقلبهم مع بعض – ونغطى باقى الصوص فى الحلة على نار هادية جدا عشان ما تبردش – وهنا لو عايزين نكتر الطاجن ممكن نضيف فى الحلة بطاطس مكعبات تستوى فى الصوص 20 دقيقة مع التقليب مرة فى نص الوقت عشان تستوى من فوق وتحت وتاخد طعمه اللذيذ
• نحط الطاجن تحت الشواية العلوية للفرن حتى تأخذ لون الشوى اللذيذ – حوالى 20 دقيقة
• بعد ما نطلع الطاجن من الفرن نصب الصوص الساخن على الوش ونقدمها – اما لو كنا حطينا بطاطس فى الصوص يبقى بعد ما نفردها على وش الصينية ندخلها الفرن 20 دقيقة تحت الشواية تانى لحد ما البطاطس تتشوى ويبقى لونها ذهبى – بالف هنا وشفا

ايه رأيكم؟ تفتكروا حتطلع حلوة؟ – حأقول لكم النتيجة فى التعليقات بعد الفطار باذن الله

علاج ارتجاع المرئ والحموضة والقولون العصبي بدون ادوية - المرحلة البديلة

هل بعد ما تتعشى وتنام بتلاقى عصارة طعمها مر تطلع فى زورك او احيانا الى فمك وربما أنفك؟ وتشعر باختناق يصحيك من النوم؟ هل بعد تناول الطعام تشعر بحموضة وتتجشأ (تتكرع) كثيراً – هل يتكرر شعورك بانتفاخ وخروج غازات محرجة؟ هل تعاني من اسهال او امساك متكرر؟ هل تشعر بالارهاق والتعب والخمول؟ هل تشعر بالتوتر او الاكتئاب او القلق العصبي ؟

هذه كلها أعراض مجموعة من أمراض الجهاز الهضمي تندرج تحت اسم متلازمة الأيض او مقاومة الانسولين.. تشمل ارتجاع المرئ والقولون العصبي وحموضة المعدة  وضغط الدم المرتفع والدهون الثلاثية والكبد الدهني – وعندى لكم علاج سحرى وفورى فعال لكل ما سبق وبدون ادوية

هذا النظام ليس فقط لعلاج امراض اجهاز الهضمي – لكنه ايضا علاج فعال للنقرس والتهابات المفاصل والضغط والسكر وتصلب الشرايين والجلطات وامراض الدم والقلب المختلفة

العلاج بسيط جدا – بدون أى ادوية ولا أى حاجة. مجرد وقف النشويات والسكريات
كل التفاصيل حتلاقوها في جروب الفيسبوك التالي:

https://www.facebook.com/groups/lchf4u

بعد الاشتراك في الجروب يسعدني ان اجيب على كل استفساراتكم من خلال #بوست_الاسئلة اللي حتلاقوه في الرابط التالي:

https://tiny.cc/qna4u

شفاكم الله وعافاكم

دمتم في رعاية الله وحفظه

حاج محمد

جروب علاج السكر بدون ادوية

---

اضغط هنا لتصفح كل موضوعات علاج السكر بدون ادوية

بيض بجبنة الروكفور والطماطم والفلفل

اليكم طبق بيض لذيذ ومبتكر بطريقة جديدة – سر النكهة الطيبة فيه تأتى من الجبنة الروكفور – طبعا الطماطم والفلفل الرومى – الفلفل الحامى اختيارى وان كان بصراحة بيخلى الطعم خطييييير!

المقادير

• معلقة كبيرة سمن بلدى او زبدة
• 3 ثمرات طماطم
• 2 ثمرة فلفل رومى أخضر
• 2 قرن فلفل حامى
• 30 جرام جبنة روكفور
• معلقة صغيرة فلفل اسود مطحون
• نصف معلقة صغيرة ملح
• بعض الخضرة لتجميل الطبق

الطريقة

• نسخن السمن فى طاسة كبيرة
• نضرب الطماطم والفلفل بنوعيه فى الكبة ضربات قصيرة بحيث نحصل على قطع صغيرة وليس عصير – ثم نصبهم فى الطاسة ونقلبهم مع السمن
• نضرب البيض مع الملح والفلفل فى الخلاط ثم نصبهم فى الطاسة ونقلب الكل على نار عالية – او نغطى الطاسة ونتركها على نار هادية جداً مع التقليب بين الحين والآخر

نرش قليل من الخضرة على وش الطبق وتقدم ساخنة – مناسبة للفطار او العشاء – وممكن تتعمل منها ساندوتشات روعة

الطبق دة هو فطارى المفضل – لذيذ وصحى ومشبع

ياريت تجربوه وتكتبوا هنا تعليق عشان اعرف رأيكم – وبالهنا والشفا

كبدة بانيه لوووووز

اليكم طريقة عمل أحلى كبدة بانيه – حتاكلوا صوابعكوا وراها – حتى الى مبيحبش الكبدة حيلاقيها تحفة

المقادير

 

• بصلة صغيرة
• 3 فصوص ثوم
• معلقة صغيرة فلفل اسود
• معلقة صغيرة كمون
• ثمرة فلفل رومى اخضر
• قرن فلفل حامى
• 3 معالق كبيرة خل
• ربع كوب ماء
• نصف كيلو كبدة شرائح
• ردة مع خلطة فيجيتار بنسبة 3 الى 1

الطريقة

• نضرب كل المكونات – ما عدا آخر حاجتين وبدون ماء – فى الخلاط لغاية مايبقوا عجينة – وبعدين نضيف الماء ونضربهم تانى ونصبهم على الكبدة ونقلبها كويس ونتركها بالخلطة فى الثلاجة بضعة ساعات
• نقلب فى طبق 3 معالق كبيرة ردة مع معلقة كبيرة خلطة فيجيتار ومعلقة صغيرة ملح وفلفل
• نخرج شرائح الكبدة وننطر منها الخليط ثم نتبلها بخلطة الردة
• نحمر الكبدة فى زيت ساخن لغاية مايبقى لونها ذهبى – حوالى دقيقتين على كل جانب

تقدم ساخنة مع سلطة طحينة وشرائح الطماطم

لعمل خلطة فيجيتار بيتى هايلة اضغط هنا

كبدة بالطماطم

الكبدة من الأكلات اللذيذة وكمان موفرة لأنها أرخص بكتير من اللحمة – ومليانة فوائد وحديد وزنك وفوسفور وماغنيسيوم وبوتاسيوم وفيتامينات بكميات رهيبة – وايضا مفيدة جدا لمن يشتكون من الضعف العام او فقر الدم او متاعب فترة الطمث – لكن لاحظوا اننا يجب الابتعاد عن شراء الكبدة البلدى – لان المواشى عندنا تتغذى على نباتات مرشوشة بالمبيدات واعلاف غير صحية – واعضاء المواشى كالكبدة والمخ تتركز فيها السموم – بينما الكبدة المستوردة من البرازيل – نيوزيلندا – استراليا – بلاد كلها مراعى خضراء طبيعية تنمو حشائشها على ماء المطر

المقادير

• نصف كيلو كبدة مكعبات صغيرة (اسكندرانى)
• بصلة متوسطة
• معلقتين سمن
• ربع كيلو فلفل اخضر حامى على فلفل رومى
• ربع كوب خل
• 4 فصوص ثوم
• نصف كيلو طماطم حمراء
• ملح وفلفل اسود وكمون
• 4 معالق طحينة خام
• بضع ورقات من البقدونس

الطريقة

• نضرب البصلة فى الكبة ثم نشوحها فى السمن – وبعد ما لونها يصفر نضيف الكبدة ونقلب لمجرد ان يتغير لونها
• نضرب الفلفل الحامى والرومى فى الكبة ثم نضيفهم للحلة ونقلب
• نضرب الثوم مع الخل فى الكبة ثم نضيفه للحلة – ونضيف والفلفل الاسود ونقلب الكل على النار
• عندما يبدأوا فى الغليان نغطى الحلة ونتركها على نار هادية 20 دقيقة – وقبل ما نطفى النار بدقيقتين نضيف الملح (2 معلقة صغيرة) ونقلب
• نقطع الطماطم مكعبات صغيرة ونضعها فى طبق
• نطفى النار ثم نضيف الطماطم والكمون والطحينة ونقلبهم مع بعض – ولو مش حناكلها كلها نحط على الكمية اللى حناكلها دلوقتى فقط طماطم وكمون وطحينة – ونشيل الباقى فى الثلاجة بحيث نسخن الكبدة اولا وبعد ما نطفى النار عليها نضيف لها مكعبات الطماطم وطحينة وكمون
• لاضفاء لمسة جمالية نرش بضع ورقات من البقدونس على وش الطبق عند التقديم

والف هنا وشفا

 

فراخ و صدور فيليه بيرى بيرى

فراخ بيرى بيرى اللى بتقدمها سلسلة مطاعم ناندوز الشهيرة طعمها شهى ولذيذ – وهنا حنعملها فى البيت بطريقة تخلينا ناخذ شوربة الفرخة قبل ما نشويها فى صوص البيرى بيرى فى الفرن

أول حاجة نقطع الفرخة 6 قطع وننقعها فى محلول ملحى ليلة وبعدين نسلقها ربع ساعة وبعدين نطفى النار ونسيبها متغطية 20 دقيقة – بالطريقة اللى شرحتهالكوا قبل كدة هنا

بعد كدة نشيل قطع الفراخ بالمساكة ونصفيها كويس من السوائل (شوربة الفراخ نعمل عليها ملوخية أو أى حاجة بنحبها عادى)

فى طبق عميق نقلب قطع الفراخ كويس فى صوص البيرى بيرى بحيث يغطى كل الجوانب وتحت الجلد ونتركها فى الثلاجة ساعة او أكثر (كل ما نسيبها فى الخلطة كل ما طعمها يبقى أحلى – انا بسيبها 6 ساعات او ليلة)

وبعدين نرص قطع الفراخ على شبكة تحتها صينية ونشويها تحت شواية الفرن العلوية لغاية مالونها يحمر – حوالى 10 دقائق على كل جنب

صدور فيليه البيرى بيرى

بنفس صوص البيرى بيرى ممكن نعمل أحلى صدور فراخ بانيه – نقطع صدور الفراخ أصابع رفيعة ونغطيها بالدقيق واحدة واحدة – ونشيلها من طبق الدقيق نحطها فى طبق به صوص البيرى بيرى –   وبعدين نشيلها من الصوص نحطها فى طبق بقسماط مطحون – وفى الآخر نرصهم فى صينية او طبق مسطح ونتركهم فى الثلاجة ربع ساعة عشان البقسماط يمسك فى الفراخ كويس – وبعدين نحمرهم فى الزيت على الجنبين لغاية ما تبقى الاصابع ذهبية ومقرمشة

صوص البيرى بيرى يباع جاهز فى زجاجات – أو ممكن يتعمل فى البيت بطريقة سهلة – للمكونات والطريقة اضغط هنا

طريقة سحرية لجعل اللحمة طرية تذوب فى الفم

تحديث

لم أعد اتبع الطريقة المذكورة هنا – فهناك طريقة أفضل هى الطهى البطئ للفراخ واللحم

اللحمة الكندوز غالباً بتبقى صعبة فى المضغ مهما قعدنا نغلى فيها – اليكم طريقة سحرية حتخلى اللحمة طرية وتذوب فى الفم

الطريقة ببساطة هى اننا ننقع اللحمة فى ماء وملح 24 ساعة قبل طبخها – نجيب حلة ونضع بها قليل من الماء و3 معالق صغيرة ملح – ونمسك الحلة ونحركها حركات دائرية عشان نلف الماء فى الحلة حتى يذوب الملح – وبعدين نحط مكعبات اللحمة فى الحلة ونكمل ماء اذا احتجنا بحيث يادوب يغطى اللحمة – ونغطى الحلة ونتركها فى الثلاجة لليوم التالى – وتانى يوم نطلع الحلة من الثلاجة ونضيف مقاديرنا المعتادة مثل البصل والتوابل اللى احنا عايزينها فى طبختنا – ماعدا الماء والملح طبعاً لانهم موجودين فى الحلة من امبارح – ونضع الحلة على نار عالية وأول ما تغلى نغطيها ونتركها على نار واطية خالص 3 او 4 ساعات لغاية ما تستوى – حتلاقوها فى الأكل طرية على الأسنان وبتذوب فى الفم ذوبان – واليافها مش بتشد زى الأول خالص – الطريقة دى بتنفع حتى مع اللحمة العجوزة وبتخليها طرية كإنها بتلو صغير

الف هنا وشفا

طريقة سحرية لعمل فراخ طرية تذوب فى الفم

كلنا بنسلق الفراخ – ومهما سيبناها على النار بنلاقيها برضه بتشد – وخصوصاً الصدر

اليكم طريقة كالسحر حتخلى الفراخ تذوب فى بقك ذوبان – وفى نفس الوقت بتبقى الفرخة متماسكة ومش مهرية

الطريقة سهلة جداً

تعديل: كتبت لكم طريقة احسن هنا

طريقة عمل بولوبيف فى البيت بمنتهى السهولة

كلنا بنحب البولوبيف لكن بنخاف من المواد الحافظة اللى فيه – عشان كدة احسن حاجة نعمله بنفسنا فى البيت – وطريقنه سهلة جداً – فقط محتاجة وقت

البولوبيف الفكرة الرئيسية فى عمله هى عملية تخليل اللحمة – تماماً مثل تخليل الطرشى – مع فرق واحد اننا نضعه أثناء التخليل فى الثلاجة – وهو اسمه بالانجليزية corned beef أى اللحم المملح – وقد استخدم الانسان طريقة حفظ اللحم بالتمليح من الاف السنين

هناك طريقتان لتخليل اللحمة – طريقة الماء المملح وطريقة التمليح على الناشف ودى اللى انا بافضلها – لكن حاكتب لكم الطريقتين

طريقة التمليح على الناشف

المقادير

• كيلو مكعبات لحم كندوز – به نسبة من الدهن (انا باستخدم لحم كندوز برازيلى او سودانى بيطلع جميل جداً)
• 20جم ملح (تمليح بنسبة 2%)
• ذرة ورق لورا مطحون
• فص ثوم مهروس
• ملعقة صغيرة فلفل اسود
• معلقة صغيرة مستردة
• معلقة صغيرة بهارات
• ذرة قرفة
• ربع معلقة صغيرة كبابة صينى
• 3 معالق كبار خل

الطريقة

• نضع مكعبات اللحمة فى حلة ونرش عليها الملح ونقلبهم فى بعض – ونغطى الحلة ونحفظها فى الثلاجة 5 أيام
• بعد 5 ايام نخرج حلة اللحمة ونضيف لها باقى المقادير ونقلبهم مع بعض – ثم نضعها  بدون ماء على نار هادية جدا شمعة (مثل تسوية الارز) – بحيث لا تصل الى الغليان ابداً – لمدة 3-4 ساعات او حتى يستوى اللحم – اثناء الطهى ستخرج عصارة كثيرة من اللحمة وحتستوى فيها – لذلك لا نحتاج لوضع أى ماء
• نرفع غطاء الحلة ونتركها على النار بعض الوقت حتى يتبخر جزء من السوائل ويزيد تركيز الشوربة – يعنى نقصرها – لكن نترك شوية شوربة عشان حنستخدمها مع اللحمة عند ضربها فى الكبة
• ممكن ناكل البولوبيف صحيح – وفى الحالة دى نقصر الشوربة خالص لغاية ما يبقى صوص تقيل – وأثناء التقديم ممكن نصب قليل من صوص اللحم على الشرائح – حنقطع اللحمة شرائح رفيعة – نقطع فقط الجزء اللى حنستخدمه خلال يومين ثلاثة – والباقى نشيله صحيح فى الفريزر – ونبقى نقطعه شرائح عند الاستخدام
• أو لو عايزينه زى علب البولوبيف نفرم مكعبات اللحم وهى سخنة مع الدهن والشوربة المركزة فرمة قصيرة فى الكبة – 3 او 4 نبضات قصيرة  تكفى – ثم نضع كيس فى قالب او علبة بلاستيك ونصب فيه البولوبيف ثم نضعه فى الثلاجة 3 ساعات حتى يبرد ويتماسك
• بعد ما القالب يتصلب نقلبه فى صينية ونقطعه قطع مناسبة – نحفظ بعضه فى علبة بالثلاجة فى حدود 3-4 ايام – وما زاد عن ذلك نرصه فى طبق فويل ونضع كيس بلاستيك بين الطبقات وبعدين نلف الطبق فى كيس بلاستيك ونحفظه فى الفريزر حتى شهر

توجد طرق عدة لتحضير البولوبيف لعمل سندوتشات ساخنة او اطباق البولوبيف مع الارز والخضروات – لقراءة تفاصيل الوصفة اضغط هنا

---

طريقة الماء المملح :

المقادير

• 3 كيلو مكعبات لحم كندوز – به نسبة من الدهن
• 2 لتر ماء مثلج
• 100جم ملح (لعمل محلول ملحى بنسبة 5%)
• 5 ورق لورا
• 3 فص ثوم مهروس
• ملعقة صغيرة فلفل اسود صحيح
• معلقة كبيرة مستردة
• معلقة صغيرة بهارات
• نصف معلقة صغيرة قرفة
• نصف معلقة صغيرة كبابة صينى
• نصف كوب خل

الطريقة

• نأخذ قليل من الماء ونذيب فيه الملح – أسهل طريقة اننا نمسك الحلة فى ايدينا ونلفها بحركة دائرية حتى يذوب الملح
• نضع مكعبات اللحمة فى برطمان او علبة او كيس ونصب عليها الماء المملح والخل – ونتأكد من أن الماء يغطى كل اللحمة ويعلو فوقها – ونغلقه ونحفظه فى الثلاجة 5 أيام
• اذا احتجنا ماء اضافى لتغطية اللحم نذيب فيه ملح بنسبة 5% برضه – أى كل 100جم ماء يحتاج 5جم ملح – يعنى مثلاً كوب ماء 200حم نذيب فيه 10جم ملح
• بعد 5 ايام نخرج اللحمة ونشطفها جيداً بالماء – ثم نضعها  بدون ماء فى حلة ونقلب معها الثوم المهروس والتوابل – ولما السوائل اللى خرجت من اللحمة تسخن نغطى الحلة ونتركها على نار هادية جداً – اقل درجة ممكنة – بحيث لا تصل الى الغليان ابداً – لمدة 3-4 ساعات او حتى يستوى اللحم – اثناء الطهى ستخرج عصارة كثيرة من اللحمة وحتستوى فيها – لذلك لا نحتاج لوضع أى ماء
• نرفع غطاء الحلة ونتركها على النار بعض الوقت حتى يتبخر جزء من السوائل ويزيد تركيز الشوربة – يعنى نقصرها – لكن نترك شوية شوربة عشان حنستخدمها مع اللحمة عند ضربها فى الكبة
• ممكن ناكل البولوبيف صحيح – وفى الحالة دى نقصر الشوربة خالص لغاية ما يبقى صوص تقيل – وأثناء التقديم ممكن نصب قليل من صوص اللحم على الشرائح – حنقطع اللحمة شرائح رفيعة – نقطع فقط الجزء اللى حنستخدمه خلال يومين ثلاثة – والباقى نشيله صحيح فى الفريزر – ونبقى نقطعه شرائح عند الاستخدام
• أو لو عايزينه زى علب البولوبيف نفرم مكعبات اللحم وهى سخنة مع الدهن والشوربة المركزة فرمة قصيرة فى الكبة – 3 او 4 نبضات قصيرة  تكفى – ثم نضع كيس فى قالب او علبة بلاستيك ونصب فيه البولوبيف ثم نضعه فى الثلاجة 3 ساعات حتى يبرد ويتماسك
• بعد ما القالب يتصلب نقلبه فى صينية ونقطعه قطع مناسبة – نحفظ بعضه فى علبة بالثلاجة فى حدود 3-4 ايام – وما زاد عن ذلك نرصه فى طبق فويل ونضع كيس بلاستيك بين الطبقات وبعدين نلف الطبق فى كيس بلاستيك ونحفظه فى الفريزر حتى شهر

والف هنا وشفا

بولوبيف فراخ ؟

بما ان اسعار اللحمة بقت نار – حأجرب اعمل بولوبيف فراخ

• نقطع الفرخة 8 قطع ونحفظهم فى الثلاجة 5 ايام فى كيس مملوء بمحلول ملحى 5% زى طريقة اللحمة بالظبط
• بعد 5 ايام نشطف قطع الفراخ بالماء جيدا ونحطها مع الثوم والتوابل فى حلة بدون ماء على نار هادية جدا شمعة لمدة ساعتين
• نخرج القطع من شوربتها – ونترك الشوربة على النار بدون غطاء لتقصر (تقل كميتها للنصف) – وبعد ما تبرد نخليها من العظم ثم نضربها فى الكبة مع شوربتها الدافية
• نصب الخليط فى كيس موضوع فى علبة او قالب ونتركه فى الثلاجة حتى يتماسك

للعلم بولوبيف الفراخ مجربتوش – ومش عارف حيمسك وللا لأ – لو حد جرب طريقتى ياريت يقول لنا النتيجة – وانا لو عملته حأقول لكم طبعاً

 

طريقة سهلة لعمل البسطرمة فى البيت بالفيديو

أقدم لكم اليوم أسهل طريقة مع شرح بالفيديو لعمل بسطرمة هايلة فى البيت – صحية ونظيفة وكمان موفرة – وأطعم من أى سوبرماركت – المقادير هنا مناسبة لعمل كيلو واحد من اللحم – لكن ممكن عمل أى كمية مع زيادة المقادير بنفس نسبة الزيادة فى وزن اللحم

المقادير

• قطعة أو أكثر من اللحمة سمكها لا يزيد عن 3-4 سم – وطولها من 10 الى 30 سم – المفروض تكون وش فخدة او عرق تريبيانكو لكن أى لحم كندوز صغير او حتى كبير بلدى او مستورد برضه ينفع عادى
• ملح بنسبة 10% من وزن اللحمة (أى 100جم بالنسبة لكيلو لحم)

وللخلطة (تكفى لكيلو واحد من اللحم)

• حلبه حصي بنسبة 10% من وزن اللحم
• 2 معلقة كبيرة بابريكا (فلفل حلو مطحون)
• معلقة صغيرة فلفل اسود
• معلقة صغيرة ورق لورا مطحون
• معلقة صغيرة كبابة صينى
• نصف معلقه صغيرة ملح ناعم
• 1 راس ثوم
• 4 كوب ماء

 الطريقة

البسطرمة تحتاج الى 3 مراحل مجموعها 9 ايام لتكون جاهزة

• يوم تمليح فى الثلاجة
• ويوم تجفيف فى الهواء غير مغطاة
• 7 ايام تجفيف فى الهواء مغطاة بالحلبة

التعليق يكون فى مكان جيد التهوية لكن بعيد عن الأتربة – لو اللحمة تخينة حتحتاج وقت أطول – وكمان حنضطر نعمل شقوق فيها عشان نحشيها ملح – لكن دة ممكن يخليها حادقة قوى – عشان كدة الأفضل اننا نطلب من الجزار ان قطعية اللحمة تكون رفيعة مش تخينة – سمك 3 او 4سم مناسب قوى – وبكدة مش حنحتاج نعمل شقوق ولا نطول المدة

• أول حاجة حنحضر خلطة الحلبة: نطحن الحلبة كويس لتصبح ناعمة جداً ونخلط معها الملح والتوابل ونفرم الثوم مع قليل من الماء ونرش الكل فى وعاء الماء بالتدريج ونقلب كويس بمعلقة – ونغطيها ونتركها فى الثلاجة يومين
• نرص اللحمة فى علبة بلاستيك او صينية وبعدين نرش الملح عليها ونضغط بايدنا عشان الملح يلزق فى اللحمة – ولو بنعمل اكتر من قطعة لحم واعلبة مش مكفية ممكن نضع طبقة لحم تانية فوق الاولى – ونترك العلبة فى الثلاجة 24 ساعة
• احنا مش محتاجين اننا نضع ثقل على اللحمة ولا نضع اللحمة فى صفاية – بالعكس احنا محتاجين الماء المملح – كل شوية الملح حيطرد السوائل من اللحمة والعلبة حتتملى سوائل اكتر لغاية ماتغمر اللحمة – ودة مفيد عشان الملح يتغلغل فى كل انسجة اللحمة – وبعد مرور نصف الوقت – لو اللحم طبقتين – نبدل اللحمة فنضع الطبقة اللى تحت فوق واللى فوق نحطها تحت عشان تتنقع فى ماء الملح هى كمان
• فى اليوم الثانى نصفيها من كل السوائل اللى خرجت منها وننطر الملح جيدا من اللحم ثم نشطفها بماء الحنفية للتخلص تماما من بقايا الملح
• ننقع اللحم فى ماء لبعض الوقت لاخراج الملوحة الزائدة (غالبا ساعة واحدة تكفى – وممكن ندوق ماء النقع على طرف لسانا ولو لسة حادقة نغير ماء النقع ونترك اللحم فيه وقت اضافى حتى يصبح الملح مظبوط – بس بشرط الا نتركها حتى تصبح دلعة حتى لا تتعرض للتلف)
• نعمل خرم فى أعلى اللحمة نضع فيه قطعة حبل بلاستيك او دوبارة سميكة ونعلقها 24 ساعة لتجف تماما
• نغمس قطعة اللحمة فى خلطة الحلبة بحيث تغطيها تماما ثم نعلقها وتحتها صينية لالتقاط ما قد يتساقط منها
• بعد كام ساعة لما الحلبة تنشف عليها نغطيها بطبقة ثانية من الحلبة من كل النواحى ونرجع نعلقها تانى – ونستخدم ما تبقى من الخلطة فى تغطية أى أجزاء مكشوفة من اللحم – وفى الآخر نبل ايدنا ماء ونملس عليها لاغلاق أى فتحات او تشققات
• نعلق اللحمة فى مكان جيد التهوية – بجوار شباك المطبخ مثلا – ونتركها أسبوع لتمام التسوية والتشبع بطعم خلطة البسطرمة
• نقطع البسطرمة شرائح رقيقة وتقدم كما هى او تطهى مع البيض او البيتزا او الفطائر المتنوعة
• البسطرمة اللى قطعنا منها نحفظ بقيتها فى الثلاجة – أما القطع اللى لم نقطع منها يمكننا تركها معلقة شهور – لكن لو بدأت تنشف وعايزينها تفضل طرية نحفظها فى الثلاجة

وبالف هنا وشفا

لمشاهدة الخطوات بالفيديو اضغط هنا

استمتع بالصحة والحيوية مع LCHF

LCHF نظام غذائى مثالى لمرضى السكر والضغط والكوليسترول والقلب وتصلب الشرايين وكثير من الأمراض – ليس هذا فقط ولكنه أيضاً مفيد لكل من يريد ان يحافظ على صحته ويتمتع بنشاط وحيوية دائمة ومقاومة عالية لكل الأمراض

LCHF اختصار لاربع كلمات Low Carb High Fat – أى كربوهايدرات قليلة دهون كثيرة – وهو نظام نشأ فى السويد وأعتمدته الحكومة السويدية مؤخرا كأحسن نظام صحى لمواطنيها – وانتشر فى اوروبا وأمريكا

طوال ال80 عام الماضية كان الاطباء دائما يحذروننا من الدهون – لكن بالرغم من اتباع تلك النصائح طوال تلك السنوات الا انه ظهرت – وبالتزامن مع نفس تلك السنوات الثمانين –  أمراض لم يكن اجدادنا يعرفونها من قبل – مثل السمنة والسكر والضغط والكوليسترول والجلطات وتصلب الشرايين وباقى قائمة أمراض العصر التى اصبحت تصيب حتى الأطفال – بالرغم من اتباع نصائح الاطباء والابتعاد عن الدهون – بينما كان جدودنا يتناولون الدهون كل يوم مثل السمن البلدى وغيرها بكثرة ولم يصابوا بتلك الامراض وقتها – من هنا بدأ علماء السويد يدرسون السر وراء انتشار كل تلك الأمراض برغم ابتعادنا عن الدهون – والمفاجأة أن  أحدث الدراسات والابحاث العلمية أثبتت أن كل تلك الامراض العصرية سببها ليس تناول الدهون ولكن الكربوهيدرات – وخصوصا الكربوهيدرات المنقاة refined carbohydrates وهى التى ظهرت من خلال نشأة شركات التصنيع الغذائى العملاقة التى قدمت لنا منتجات صناعية حديثة خالية من فوائد الطبيعة مثل الدقيق الابيض والارز الابيض والسكر الابيض – ومن وقتها بدأت تهاجمنا الأمراض الفتاكة وبدأت مناعتنا الطبيعية تضعف لأن تلك المصانع حرمتنا من فوائد الحبوب الكاملة المليئة بالفيتامينات والمعادن – وانتجت لنا القلب النشوى فقط – واثبتت التجارب أن الانسان عندما يتوقف عن تناول كل تلك الكربوهيدرات ويتناول الدهون الطبيعية والبروتينات تتحسن صحته بدرجة مذهلة ويتعافى من كثير من الأمراض – بل وتزداد مناعته الطبيعية ويصبح أقل عرضى للعدوى عن ذى قبل – كما بدأت شركات التصنيع الغذائى فى انتاج المسلى الصناعى الذى هو عبارة عن زيوت مهدرجة يتم حقنها فى المصانع بغاز الهيدروجين تحت درجة حرارة غير طبيعية – 400 درجة مئوية – مما يحول الزيوت النباتية النافعة الى دهون متحولة – trans fats – وهى أم المصائب لان اجسامنا غير مؤهلة لهضم تلك الدهون الصناعية – فتتخزن فى اجسامنا وتصيبنا بالكوليسترول وامراض الدم المختلفة والسمنة المفرطة والاورام الخبيثة والعياذ بالله – لذا انصحكم جميعا بعدم شراء اى سمن مصنع من زيوت مهدرجة مثل تلك الانواع التى يعلنون عنها ليل نهار: سمن كريستال – روابى – جنة وكل انواع السمن الرخيص – ابتعدوا كذلك عن شراء الزبدة السائبة فمعظمها مغشوش بزيوت مهدرجة – اشتروا فقط سمن بلدى – وهناك فى السوق نوع اسمه افانتى وهو سمن طبيعى نيوزيلاندى ممتاز

لكن ما هو الضرر الناتج من تناول الكربوهيدرات؟ لقد اتضح لنا مؤخراً من خلال أحدث الدراسات اننا كلما اكثرنا من تناول النشويات والسكريات يضطر جسمنا الى ان يفرز انسولين أكثر من خلال البنكرياس حتى يستطيع ان يحرق الجلوكوز الناتج عن تناول الكربوهيدرات – ولكن كثرة الانسولين فى دمنا يسبب مشاكل – فذلك يقلل من تجاوب خلايا الجسم مع الانسولين فنصاب بالسكر – بالاضافة الى كون الانسولين مادة حارقة بطبعها – لذا أثناء مرورها بكميات كبيرة فى الشرايين والشعيرات الدموية تحدث التهابات فى جدرانها – وهنا يأتى دور الكوليسترول ليسد مكان أى جروح اوالتهابات حدثت فى جدران تلك الشرايين – فالكوليسترول يقوم هنا بدور سيارة الاسعاف التى تحاول ان تنقذ المريض من حدوث نزيف داخلى – لكن كثرة تكرار هذه العلمية يؤدى الى تراكم الكوليسترول – ولكونه مادة صلبة فهو يسبب مع الوقت ضيق بتلك الشرايين – وهنا لا يجب ان نلوم الكوليسترول الذى يقوم فقط بدور المنقذ ولكن السبب الأصلى هو كثرة تناولنا للكربوهيدرات – التى تسبب كثرة افراز الانسولين – الذى يسبب كثرة مروره فى الشرايين الى التهابها – فيأتى الكوليسترول ليسد مكان تلك الالتهابات ليمنع النزيف – كل تلك المشاكل تتوقف فى اللحظة التى نقرر فيها الامتناع عن تناول تلك الكربوهيدرات (النشويات والسكريات)

اليكم الخطوط العريضة لهذا النظام الصحى

الغى من حياتك تماماً كل من الاتى:

• الخبز بجميع انواعه – والمخبوزات وكل ماهو مصنوع من الدقيق
• المكرونة
• الارز
• أى طعام او شراب يحتوى على سكر – طبيعى أو مضاف

أما مرضى السكر فعليهم بالاضافة لما سبق ان يتمنعوا أيضاً عن تناول الاتى لاحتوائه على نشويات عالية:

• البقوليات بانواعها (الفول المدمس – الطعمية (الفلافل) – الفاصوليا البيضاء – اللوبيا – الحمص – العدس – البسلة)
• البطاطس والقلقاس والجزر (كل ما هو مزروع تحت الأرض)
• الفواكه – ماعدا التوت والافوكادو – ويمكن تناول نصف برتقالة فقط كل كام يوم
• المكسرات والتسالى كاللب والسوادنى
• البصل والطماطم والجزر – او الاقلال منهم بقدر المستطاع
• الالبان ومنتجاتها – فيما عدا الاجبان الصلبة كالرومى والشيدر

اليكم مثال لوجبات مناسبة لمرضى السكر

الفطار

• بيضتين مسلوقين مع مايونيز – او بيضتين بالبسطرمة مقليين بالسمن البلدى – او ربع فرخة محمرة فى السمن البلدى
• لحوم باردة – بسطرمة – بولوبيف – سلامى
• جبنة شيدر او رومى
• 5 حبات زيتون أخضر

الغذاء والعشاء

• فراخ محمرة بالسمن البلدى – او كباب وكفتة – لحم كباب حلة – سمك ماكريل او سلمون
• أى طيور او لحوم او اسماك
• شوربة لحوم او طيور
• مايونيز
• جبنة شيدر او رومى

يمكنكم ان تتناولوا أى طعام آخر بشرط أن يحتوى على دهون عالية وبروتينات حيوانية – انصحكم بالاشتراك فى موقع يستطيع ان يساعدكم فى اختيار الوجبات المناسبة من الاصناف الخالية من الكربوهيدرات او التى تحتوى على اقل القليل منها – كما تستطيعون من خلال ذلك الموقع ان تحسبوا لانفسكم كمية الكربوهيدرات والدهون والبروتينات المستهلكة كل يوم فى طعامكم – للذهاب الى الموقع المجانى اضغط هنا

اذا جربتم طريقتى وكتب الله لكم الشفاء ارجو ان تدفعوا أجرتى – وهى ان تطلعوا حاجة لله – تتصدقوا بأى مبلغ للفقراء والمساكين – وان شاء الله الاجر والثواب لكم وان شاء الله أفوز معكم بجزء من الثواب

 

طريقة عمل مستردة ديجون حلال

المستردة الجاهزة فى مصر غالبا بتكون خفيفة وبيستخدموا نشا لجعلها سميكة

اما عشاق المستردة الفرنسية الاصلية Dijon Mustard فاليكم طريقة سهلة جدا لعملها فى البيت بنفس الطعم الرائع:

المقادير (لعمل برطمان مستردة 340جم – برطمان زجاجي لا تستخدموا ابدا أى عبوة بلاستيكية)

• 60 جم حب خردل
• 50 جم خل
• كوب ماء 230 جم
• ثلاثة ارباع ملعقة صغيرة ملح لا أكثر
• 2 معلقة صغيرة كركم
• معلقة صغيرة بابريكا

الطريقة

• نضع حبوب الخردل فى برطمان صلصة فاضى 370جم – سيملأ ربعه – ثم نغطيه بمصفاه شاي صغيرة ونملأه بالماء ونرجه لشطفه ثم نصفي الماء من خلال المصفاه في حوض المطبخ – ونكررشطفه وتصفيته مرتين
• بعد تصفيته تماما 3 مرات نضيف مقدار الماء ونترك البرطمان مغطى 6 ساعات
• نصفي الخردل ونحتفظ بماء النقع
• نضع الخردل ومعلقة من ماء النقع فى كبة او خلاط صغير ونضربهم حتى نحصل على عجينة ناعمة – اذا وجدناها مرملة نضرب مدة أطول
• نضيف نصف ماء النقع ونضرب مرة ثانية
• نترك الكبة وفيها المستردة ربع ساعة حتى تتشرب الماء ويغلظ قوامها
• نضرب مرة أخرى ثم نضيف باقي ماء النقع مع الخل والملح والكركم والبابريكا ونضربهم كلهم حتى نحصل على مستردة قوامها طرى وناعم (لو عندكوا كبة صغيرة قوية – براون مثلاً – ممكن تحصلوا على مستردة ناعمة تماما – غير كدة حتبقى مرملة شوية – لكن دة لا يقلل من طعامتها)
• الكركم والبابريكا اختيارى – لكن حبوب الخردل لوحدها بيكون لونها أصفر باهت – لذلك نضيف الكركم ليعطى المستردة لونها الأصفر المفضل –  ونضيف البابريكا لجعله أصفر داكن – هذه التوابل الملونة تفتح الشهية ولها فوائد صحية كثيرة
• المستردة بعد ضربها فى الكبة حنلاقيها طرية بزيادة – لكن هذا مؤقتا فقط – فبعد يوم سنجدها متماسكة أكثر
• نصب المستردة فى برطمان صلصة 370جم فاضى او برطمان عسل نحل فاضي 400جم – ونحفظه فى الثلاجة
• فى اليوم التالى حتكون المستردة جاهزة ومتماسكة – طعم المستردة سيصبح رائع فى اليوم التالى لحفظه – وكل يوم يصبح أروع

يمكن حفظه فى الثلاجة 3 شهور أو أكثر – لكن من طعامته بيتنسف غالبا فى أقل من كدة بكتيييير

عمل المستردة فى البيت بيوفر كثير – فالبرطمان لا يكلف سوى 60جم حب خردل بحوالى جنيه وربع (الكيلو ب20ج) (تعديل: الكيلو في يناير 2019 اصبح ب35 جنيه وبالتالي تكلفة ال60 جرام خردل = 2.10ج) بينما البرطمان الجاهز لا يقل عن ستة أضعاف هذا المبلغ – وياريته مصنوع بذمة انما معمول بقليل من الخردل والباقى ماء ونشا – اما البيتى فهو المذاق الفرنسى الأصلى للمستردة وفى الاستخدام نجد أن مسحة قليلة من البيتى تعادل ملعقة كبيرة من الجاهز لأن مستردة ديجون البيتى طعمها بيكون مركز جداً عن المستردة المصرية الجاهزة

نصيحة: النت مليان وصفات خاطئة لعمل المستردة – فنجد الخطوات تشمل تسخين حب الخردل مع نشا او دقيق حتى يتقل- وهذا ما يستخدم تجاريا ويعتبر غش لا يصح ان نتبعه فى بيوتنا – بالاضافى لأن من الخطأ تماماً تسخين حبوب الخردل لأن تسخينها يطلق انزيم الرنين rennin مما يضيع طعم المستردة ويجعل طعمها مر وغريب كما لو كانت فاسدة

حبوب الخردل – تلك الحبوب  الصفراء الصغيرة – تحمل فوائد كبيرة جداً – فآخر الابحاث اثبتت ان لها دور كبير فى الوقاية من السرطان لاحتوائها على كميات كبيرة من الفيتو نيوترينتس (مغذيات نباتية) من مادة glucosinolates  وعلى انزيمات myrosinase  التى تحولها الى isothiocyanates  الواقى من السرطان – وهى أيضاً مصدر غنى بالسيلينيوم الذى يحمى من الالتهابات والروماتيزم والربو والسرطان – وهى ايضا غنية بالماغنسيوم مما يعالج الام الدورة الشهرية ويخفض ضغط الدم وهو علاج للأرق والصداع النصفى وامراض القلب الناتجة عن تصلب الشرايين والسكر – كما ان حبوب الخردل تعتبر مصدر ممتاز لأوميجا 3 والمنجنيز والفسفور والنحاس وفيتامين ب1

مستردة “ديجون” جاء اسمها نسبة الى مدينة Dijon التى تقع فى منطقة بورجندى شمال شرق فرنسا – حيث قام Jean Naigeon عام 1856 بعصر العنب الحصرم (الذى لم يستوى بعد) واستخدم عصيره الأخضر المزز فى عمل المستردة بدلاً من الخل – ثم تطور الأمر وحاليا يستخدم النبيذ الأبيض – أما نحن فطبعاً استبدلناه بالخل الحلال

لمزيد من المعلومات عن حبوب الخردل وفوائدها الصحية الهائلة اضغط هنا

طريقة عمل المايونيز والثومية

بعد سنوات من الفشل قدرت مؤخراً اتقن عمل المايونيز – بطريقة سهلة جداً – بل زادت خبرتى فى صنعه حتى عرفت ازاى اجعله جامد مش طرى وبكمية أقل من الزيت – اليكم الطريقة بالتفصيل

المقادير لعمل 700جم مايونيز

• 2 بيضة
• نصف ملعقة صغيرة ملح
• ربع ملعقة صغيرة شطة
• 3 ملعقة صغيرة حب مستردة مطحون
• 2 ملعقة صغيرة فلفل اسود
• 600جم زيت زيتون (3 كوب)
• ملعقتين خل
• عصير ليمونة

الادوات

• خلاط صغير او كبة يكون لها فتحة علوية – والأفضل الميكسر اللى بيتمسك باليد وسلاحه مبطط فى القعر

الطريقة

• نضرب اولا البيض لوحده لغاية ما يعمل رغاوى ويبقى هش
• نضيف الملح والشطة ونضربهم قليلا
• اثناء دوران الخلاط نضيف سرسوب من الزيت من الفتحة العلوية
• نستمر في اضافة الزيت ببطء حتى نفرغ من كمية الزيت كلها – سنلاحظ اننا كلما اضفنا مزيد من الزيت يتجمد المايونيز اكثر
• في النهاية نضيف باقي المقادير ونضرب مرة أخيرة

ملاحظات

• ضرب البيض لوحده اولا يجعل المايونيز هش وجميل
• ضرب البيض والملح والشطة لوحدهم مع قليل من الزيت يخللى المايونيز يتقل ومايبقاش طرى –  بكمية أقل من الزيت

ثومية

ممكن نعمل بنفس الطريقة ثومية garlic sauce خطيرة وذلك باضافة معلقة كبيرة ثوم مقروم في الخطوة الأخيرة السابقة

---

وهناك ثومية بطريقة ثانية المقادير فيها 6 فقط: بيض وملح وثوم وزيت وليمون وخل

• نضرب البيضة والملح لغاية ما تتكون فقاعات
• نضيف زيت زيتون بالتدريج ولما يبدأ يتقل نحط 5 فصوص ثوم كبار مهروسين ونضرب لغلية ما يبقوا ناعمين
• نستمر فى اضافة زيت بالتدريج بنفس طريقة المايونيز لغلية ما يجمد
• فى الآخر نضيف عصير ليمونة كبيرة ومعلقة كبيرة خل ونضرب مرة أخيرة
• لا نستخدم مستردة ولا شطة ولا فلفل اسود
• نحفظ المايونيز والثومية فى الثلاجة

ثومية أصلية

الطريقى التقليدية الاصلية للثومية اللبنانى تختلف عن الطريقة السابقة – انا لسة ما جربتهاش بس باذن الله ناوى اجربها قريب

المقادير

• كوب فصوص ثوم
• كوب وربع زيت زيتون
• عصير ليمونة بنزهير
• ربع معلقة صغيرة ملح

الطريقة

• نضرب الثوم مع الملح فى الكبة او الخلاط
• نضيف الزيت قطرات بالتدريج اثناء تشغيل الخلاط
• نضيف قليل من عصير الليمون من حين لاخر
• نستمر فى وضع الزيت سرسوب اثناء ما الخلاط شغال لغاية ما نخلص الزيت – حنلاقى الثومية تقلت وبقت جاهزة
• نحط الثومية فى علبة بلاستيك فى الثلاجة ويفضل ان تبات فى الثلاجة لليوم التالى عشان يبقى طعمها احلى
• ممكن تتحفظ فى الثلاجة اسابيع

تحديث – ثومية بطريقة اسهل واسرع

الطريقة الاصلية بتستخدم كمية رهيبة من الثوم – انا وجدت طريقة احسن واسهل واسرع وهى الطريقة اللى بتستخدمها المطاعم اللبنانية والخليجية

المقادير

• 5 فصوص ثوم كبيرة مهروسة
• نصف معلقة صغيرة ملح
• ربع كوب عصير ليمون بنزهير-ايطالى-اضاليا (او معلقتين كبار خل)
• كوب زيت زيتون
• بياض 2 بيضة مثلجة
• من 2 الى 4 معلقة كبيرة ماء مثلج

الطريقة

• نضرب الثوم مع الملح ومعلقة عصير ليمون وربع الزيت فى الخلاط
• بعد ما ينعم الخليط نضيف بالتبادل مرة سرسوب زيت ومرة معلقة صغيرة عصير ليمون
• اثناء دوران الخلاط نضيف بياض البيض يكون مثلج (انا باحطها فى الفريزر 10 دقائق قبل ما ابدأ) وبعدين نضيف باقى الزيت سرسوب برضه لغاية ما الثومية تتقل
• فى الاخر نضيف معلقتين ماء مثلج (باحطهم 10 دقائق برضه فى طبق معدن فى الفريزر) ونضرب حنلاقى الماء المثلج عمل مفعول السحر: خلى الثومية لونها ابيض كالحليب وناعمة كالحرير وتقيلة كالمايونيز

وبالف هنا وشفا

دمتم في رعاية الله وحفظه

حاج محمد

جروب علاج السكر بدون ادوية

---

اضغط هنا لتصفح كل موضوعات علاج السكر بدون ادوية

طريقة سلق البيض بدون ما يتكسر

تحديث:

استخدم الان طريقة افضل – لقراءتها اضغط هنا

كتير لما نسلق بيض نلاقى بيضة اتكسرت وطلعت البياض برة القشرة واتملت ماء داخلها – اليكم طريقة مثالية لسلق البيض بدون خسائر كل مرة

نضع قشر برتقال او يوسفى او ليمون فى قعر حلة السلق – ثم نرص البيض فوق القشر – ثم نغطى البيض بماء بارد من الحنفية – قشر البرتقال بيخلى الماء حامضى ودة بيمنع سوائل البيض من الخروج من القشرة – لو مفيش قشر نضع قليل من الخل – لكن قشر البرتقال افضل وكمان بيخللى رائحة السلق جميلة ولونها برتقالى

نضع البيض على النار – وبعد بضع ثوانى نوطى النار ونترك البيض على نار هادية – البيض لو فيه اى شرخ غير ظاهر لو على نار عالية اللى بيحصل ان الماء بيغلى قبل البيض – واحنا عارفين ان السائل لما يغلى تقل كثافته – وبالتالى البياض البارد حتبقى كثافته وقتها اعلى من الماء المغلى – فيحدث ضغط من البياض على القشرة – ولو القشرة ضعيفة فى أى جزء ينكسر هذا الجزء ويخرج البياض فى ماء الغلى – أما عندما نسخن الماء على نار هادية فدة بيعطى البياض وقت كافى لكى ترتفع درجة حرارته بالتدريج بنفس القدر مع الماء – وبالتالى لا يحدث فرق فى الكثافة مما يجنب القشرة من مشكلة الانفجار من الداخل الى الخارج – وحتى لو فى القشرة شرخ فبمجرد ما البياض يسخن بيكون طبقة عازلة ملاصقة للقشرة تحمى سوائل البيض من الخروج من أى شرخ

عند وصول الماء للغليان نغطى الوعاء ونرفعه من على النار – ونتركه مغطى ربع ساعة بدون نار – البيض حيكمل سواه على مهله فى الماء الساخن – وبكدة نحصل على بيض مثالى – وحنلاحظ ان الصفار كله بنفس اللون الاصفر الجميل – بعكس السلق على نار عالية اللى بينتج عنه صفار محاط بطبقة من اللون الرمادى الغامق حول الصفار بيجعل الطعم مش لذيذ – اما طريقة السلق الهادئ فينتج عنها بيض طعم ولذيذ ومتساوى النضج من الداخل مثل الخارج

واليكم طريقة سهلى لتقشير البيض

نضع البيض الساخن بعد سلقه فى ماء بارد – ودة بيخللى القشرة الملتصقة بالبياض تنفصل عنه وتبقى فيه مسافة بينهم

نخبط البيضة على الترابيزة – على قعرها وبعدين نخبط بوزها – وبعدين ننيمها على جنبها ونضع بطن ايدنا عليها وندحرجها للامام والخلف مع الضغط عليها بكف اليد لاحداث شروخ فى كل جوانبها

نضع البيضة فى طبق به بعض الماء ونقشرها داخل الماء – سنجد القشر طلع فى ثانية

وبالف هنا وشفا