حنعمل مع بعض برجر بيتى لذيذ ونحشى بيه اومليت مش حتصدقوا جماله
المقادير
150 جرام لحم مفروم
ملح وفلفل
معلقة زيت
فلفل رومى وبصل مخرطين رفيع
6 بيضات
ربع كوب جليب كامل الدسم
ملخ وفلفل وذرة شطة
طماطم مخرطة رفيع
بقدونس مفرى
الطريقة
نسخن طاسة تيفال مع بضع نقاط من الزيت
نقسم اللحمة المفرومة على 3 اجزاء – نعملهم كور ونبطط الكرة فى كف ايدنا عشان تبقى اقراص مفرودة ورفيعة مش تخينة
نحط الاقراص فى الطاسة السخنة 3 دقائق وبعدين نقلبهم على الوش التانى دقيقتين ونرفعهم من الطاسة
نحط البصل والفلفل الرومى على سوائل اللحمة فى الطاسة (مع قليل من الزيت اذا كانت السوائل قليلة) ونقلبهم على نار عالية بضع دقائق حسب الرغبة
فى هذه الاثناء نفرول البرجر فتافيت فى طبق غويط – وبعد شوى البصل والفلفل الرومى فى الطاسة نصبهم فى الطبق ونقلب معاهم طماطماية مخرطة رفيع والبقدونس المفرى
نخلط البيض مع الحليب ونضربهم جيدا مع فلفل اسود وفى الآخر نضيف الملح ونقلب تقليبة خفيفة
نضع قليل من الزيت فى الطاسة ونصب فيها خليط البيض
بعد ان يبدأ قعر البيض فى التماسك نضع البرجر والبصل والفلفل الرومى والطماطم على جنب فوق البيض ثم نقلب النصف الفاضى على النصف المليان ونصبه فى طبق التقديم
الجبنة القريش الفلاحى لا يعلى عليها – بشرط شراءها من الفلاحين – مش الجبنة القريش بتاعة السوبر ماركت دى مش جبنة قريش خالص – لكن اولادنا مش بيحبوها للأسف – عشان كدة حأقدم لكم هنا طريقة سهلة لتحضرها بطريقة تخللى كل افراد اسرتك يحبوها
المقادير
2 قالب جبنة قريش فلاحى
3 طماطم
2 فلفل رومى
1 بصلة
حزمة بقدونس مفرى
4 معالق كبيرة زيت
الطريقة
نهرس الجبنة مع الزيت بالشوكة جيداً
نضرب الطماطم والفلفل الرومى والبصل فى الكبة نبضات للحصول على فتافيت
نقلب الكل فى علبة مع البقدونس المفرى
تؤكل بالمعلقة لمتبعى انظمة التخسيس – او مع خبز ساخن للى معندهومش مشاكل مع الوزن – يا بختهم!
الاصابة بمرض السكر من النوع الثانى سببه دائما البدانة – عارفين ليه؟
كلنا الانسولين فى اجسامنا البنكرياس بيفرزه مش بس بعد ما ناكل – لأ دة كمان بيفرز انسولين حتى واحنا مش بناكل وحتى واثناء النوم – بمعنى ان الانسولين هناك حد أدنى لمستواه فى الجسم ثابت طول الوقت – يزيد بعد الاكل – ويرجع لمستواه اللى العلماء بيسموه Basal insulin secretion rate او baseline insulin level
الحد الادنى دة هو زى الارضية اللى احنا واقفين عليها – تعلى لما ناكل وبعدين ترجع تانى لنفس الارضية – اذن هذا الحد الادنى هو الثابت فى اجسامنا طول الوقت – عشان كدة فهو الأهم
الخطير هنا ان العلماء اكتشفوا ان اصحاب الوزن الزائد بيكون الحد الادنى دة عندهم أعلى طول الوقت من الاشخاص الغير سمان
طيب ليه احنا بنتكلم عن الانسولين – مش مريض السكر مشكلته فى ارتفاع السكر؟ – ايه اللى دخل الانسولين فى الموضوع؟
فى الحقيقة ان ارتفاع السكر فى الدم هو مجرد عرض مش هو المرض نفسه – ولو احنا بناخد ادوية نخفض بيها نسبة السكر فاحنا كدة بنتعامل مع الاعراض وسايبين المرض نفسه – المرض الفعلى هو مقاومة خلايا الجسم للانسولين – او بمعنى أخر ان حساسية خلايا الجسم للانسولين بدأت تقل – ودة بيكون سببه كثرة افراز الانسولين – اللى هو سبب مباشر لكثرة تناولنا للنشويات والسكريات – عمالين طول عمرنا سنين ورا سنين بناكل فى نشويات وسكريات زيادة عن اللزوم ليل ونهار – عيش ورز ومكرونة وبطاطس وحلويات (كل واحد مننا عنده نقطة ضعف – تختلف من واحد للتانى – تجاه حاجة من دول) والنتيجة ان البنكرياس عمال يفرز انسولين اكتر للتعامل مع الجلوكوز اللى امعاءنا حولت النشويات والسكريات اليه – ولما الخلايا يصلها انسولين كتير تبدأ حساسيتها ناحيته تقل – زى مثلا شارب الخمرة والعياذ بالله – اول كاس راسه بتلف ويسكر على طول – لان حساسيته من ناحية الخمرة عالية جدا – بينما السكير المدمن تلاقيه بيشرب كتير ومش بتأثر فيه – وبرضه السجاير – لو عمرك ما شربت سيجارة وجربت تاخد نفس واحد حتكح ويبقى حالك حال – بينما مدمن السجاير مش بتأثر فيه ولا 20 سيجارة ودايما عايز اكتر – والمدمن كلنا عارفين انه بييجى عليه وقت المخدرات مش بتأثر فيه فيبدأ ينتقل الى ادمان حاجة أقوى وهكذا – نفس الشئ بيحدث لخلايا جسمنا لما يصلها انسولين كتير نتيجة لاكل نشويات كتير – كانت الاول حساسة جدا ناحية الانسولين وكمية بسيطة منه بتخليها تحرق على طول الجلوكوز اللى الانسولين خده من الدم وجابهولها – وبالتالى الجلوكوز يقل بسرعة بعد الاكل فى دمنا لان الخلايا حرقته وحولته الى طاقة – لكن لما الخلايا يجيلها انسولين كتير كل شوية حتبدا تتعود وتأثير الانسولين عليها يقل – تبقى بالبلدى كدة متنحة – جلدها تخين – ما بتحسش – زى المدمن بالظبط – يعنى الانسولين مبقاش يأثر فيها – والنتيجة؟ الوظيفة اللى المفروض الانسولين ينفذها – وهى مساعدة الخلايا على حرق الجلوكوز لتحويله الى طاقة – لا تتم بالكفاءة السابقة – وبالتالى يرجع جزء من الجلوكوز يمشى فى دمنا بعد ما فشلت خلايانا فى حرقه والاستفادة منه – وبعدين ناكل نشويات تانى فيعلى الجلوكوز مرتين – مرة من الجلوكوز اللى رجع للدم ومرة من الجلوكوز الجديد لما اكلنا – فلما البنكرياس ياخد خبر بان الجلوكوز زاد كدة فى الدم يقوم الراجل الطيب دة يعمل ايه – يفرز انسولين اكتر – فيروح للخلايا انسولين اكتر فتزداد تناحة وتقل حساسيتها للانسولين اكتر – وبالتالى يزيد الجلوكوز الغير محترق فى الدم اكتر واكتر – وهكذا يقع جسمنا فريسة لتلك الحلقة المفرغة المدمرة وتزداد المشكلة تعقيداً مع الوقت – تلك هى المشكلة الحقيقية لمريض السكر من النوع الثانى – اذن لو عايزين علاج حقيقى لازم نتعامل مع اصل المشكلة: قلة حساسية وتناحة وادمان خلايا جسمنا للانسولين او قلة كفاءة الخلايا للتعامل مع الانسولين – او ما يطلق عليه مقاومة الانسولين insulin resistence
نرجع تانى لموضوعنا عن الحد الادنى للانسولين فى الدم – فى تجربة لقياس كمية الانسولين التى يفرزها البنكرياس فى حدها الادنى basal secretion وجدوا انها تمثل من 45 الى 50% من اجمالى كمية الانسولين التى يفرزها البنكرياس خلال 24 ساعة
اذن تقريبا نصف ما ينتجه جسمك من الانسولين موجود وماشى فى دمك بصفة دائمة طوال الوقت – بغض النظر عما اذا كنت اكلت ام لا – صاحى ام نايم
اذا كان وزنك مثالى فهذا الحد الادنى بيكون منخفض – اما اذا كان وزنك زائد فالحد الادنى للانسولين بيكون مرتفع طول الوقت حتى وانت مش واكل – حتى وانت نايم
اذن – اذا كان وزنك زائد – وخصوصا لو عندك كرش او مقاس وسطك كبير – حتبقى نصف مشكلتك ليست من الاكل ولا نوعه – طبعاً تغيير انواع الاكل اللى بتاكله مهم جدا لضبط مستوى السكر لو انت مريض سكر – لكن دة لوحده مش كفاية – لانك طول ما انت وزنك زائد حيفضل دايما الحد الادنى من الانسولين عندك عالى حتى وانت نايم او مبتاكلش أى حاجة
اذن المشكلة مش بس فى نوع الاكل – المشكلة فى الوزن الزائد – وكما ترى من الرسم البيانى التالى – ستجد انه كلما كان وزنك اكثر كلما كان الحد الادنى للانسولين (او انسولين الصيام) أكثر
وكلما كان الحد الادنى للانسولين لديك اكبر كلما كان الانسولين عالى فى جسمك طوال الوقت – وللاسف هناك اشخاص بسبب وزنهم الزائد تجد مستوى الانسولين فى دمهم وهما مش واكلين حاجة اعلى من مستواه بعد الاكل عند الاشخاص ذوى الاوزان العادية – انظر مثلا الى هذا الرسم البيانى من اعداد Dr. Joseph Kraft
ذوى الوزن الزائد باللون الاحمر وذوى الاوزان العادية باللون اللبنى – ستلاحظ انه عند الصيام مستوى الجلوكوز 8 عند الاشخاص العاديين و56 عند ذوى الوزن الزائد – وبعد الاكل بساعتين اصبح الرقمين 30 و 185 – أى اكثر من 6 اضعاف
لذلك مهم جدا عشان نعالج السكر اننا نخس – بالاضافة لتجنب النشويات والسكريات طبعاً – لان تجنبهم بيحل نصف المشكلة – والتخسيس بيحل النصف الثانى
ومهم اننا نعرف كمان ان الوزن الزائد بيخلى الانسولين بعد الاكل يعلى اكتر بكتير من الشخص اللى وزنه عادى – والسبب ان مستوى الانسولين بعد الاكل بساعة بيعلى من 5 الى 7 اضعاف مستواه قبل الاكل – ودة عند كل الناس بغض النظر عن وزنهم – لكن بما ان الحد الادنى للانسولين (انسولين الصيام) بيكون اكتر طول الوقت عند اصحاب الوزن الزائد – اذن 7 اضعاف حيبقوا اكثر جدا عندهم مقارنةً باصحاب الوزن العادى
اذن مدى ارتفاع الانسولين بعد الاكل يتوقف على مستوى الحد الادنى للانسولين عندك – ودة زى ما وضحت لكم بيحدده وزنك – وبالتالى كل ما كان وزنك زائد كل ما حتلاقى الانسولين بيرتفع بمعدلات اكبر بعد الاكل
كما ترون هنا – الناس اللى وزنهم زائد بيكون الانسولين عندهم مرتفع قبل وبعد الاكل مقارنةً بالاشخاص الرفيعين
اذا كلنا نشويات الانسولين بيعلى كتير – لكن دة نصف المشكلة – النصف الثانى فى التخن – الوزن الزائد بيخلى الانسولين عالى طول الوقت حتى من غير اكل
والحل؟
الحل هو اضافة عنصر أخر بجانب عنصر تجنب النشويات والسكريات – عنصر الوقت – او امتى ناكل
الصيام هو الحل
الصيام هو احسن استراتيجية عشان نعكس مشكلة مقاومة خلايا جسمنا للانسولين – لان الصيام حيخلى الخلايا تخف من ادمان الانسولين اللى مبقاش يأثر فيها – تاخد اجازة منه فتبدأ تبطل تناحة من ناحيته – وترجع بالتدريج تبقى حساسة ليه زى الاول وبيأثر فيها من أقل كمية زى الناس الاصحاء
صوم يوم ويوم – او يومين فى الاسبوع – او كل يوم – كل ما صمت اكتر كل ما العلاج يبقى احسن واسرع – وفى نفس الوقت طبعا تجنب كل النشويات والسكريات – كل كل اللى تقدر عليه من خضروات خصوصا الخضروات الورقية – مع دهون طبيعية وبروتينات
عملوا دراسة عن تأثير الصيام يوم ويوم لمدة 22 يوم فكانت النتيجة كالاتى:
الصيام يوم اه ويوم لأ لمدة 3 اسابيع رفع حساسية خلايا الجسم للانسولين 7 اضعاف – وانخفض الحد الادنى للانسولين (انسولين الصيام) فى اخر يوم صيام بنسبة 57% مقارنة باليوم اللى قبله اللى مكانش فيه صيام
والصيام دة نتج عنه كمان ان معدل حرق الدهون فى الجسم ارتفع بنسبة 58%
وفى دراسة أخرى وجد ان الامتناع عن تناول النشويات لمدة 3 ايام نتج عنه انخفاض فى الانسولين بنسبة 50% بينما الصيام لمدة 3 ايام بدون أى طعام خفض الانسولين بنسبة 75%
ومعظم الانخفاض فى الانسولين يحدث فى يوم الصيام الاول
اذن حتى لو صمنا يوم واحد 24 ساعة دون اكل – يعنى من المغرب لمغرب اليوم التانى – حنكون حققنا 70% من الانخفاض
بعد 11 ساعة فقط من الصيام تسيح الدهون المخزنة فى اجسامنا فنرى زيادة جدا فى الاحماض الدهنية فى الدم – دة الكرش والمناطق المدهننة فى اجسامنا بتسيح وتتحول الى احماض دهنية فى الدم كما نرى فى هذا الرسم البيانى:
وبهد 13 ساعة من الصيام تزيد نسبة الكيتونات ايضاً – والكيتونات تأتى من دهون الجسم ويستخدمها الجسم لتوليد الطاقة بدلا من الجلوكوز
يهتم متبعى نظام LCHF الغذائى دائما بالكيتونات – لان وجودها فى الدم معناه ان الجسم يحرق الدهون بدلا من الجلوكوز الغير موجود تقريبا لان طعامهم خالى تقريبا من النشويات والسكريات – اما فى الصيام فليست هناك خاجة للقلق من عدم وجود الكيتونات – لان الصيام يجعلها موجودة بكثرة بعد 5 ساعات ثم تتزايد بقوة بعد 13 ساعة من الصيام كما نرى فى الرسم التالى:
وبعد الاكل ب3 او 4 ساعات يقل الانسولين – ثم يقل اكثر بعد 10 ساعات
وفى النهاية نصيحتى لكم ان تواظبوا على كل من:
الصيام عن الطعام لمدة 20 ساعة (الافطار وقت المغرب كالصيام العادى – ومسوح بالاكل خلال 4 ساعات فقط – اما الماء فمسموح من المغرب الى ما قبل الفجر)
الامتناع عن النشويات والسكريات – والتركيز على الخضروات – خصوصا الورقية منها – والدهون الطبيعية والبروتينات
معظم ما ورد فى هذا الموضوع مأخوذ عن Bob Briggs لقراءة الموضوع الاصلى باللغة الانجليزية اضغط هنا <<
كما اقترح عليكم لمزيد من التفاصيل قراءة سلسلة مقالات دكتور Dr. Jason Fung وسلسلة مقالاته ال 26 عن الصيام بالضغط هنا << او قراءة الموضوع الذى كتبته لكم عن نظام دكتور فنج المدهش عن علاج السمنة والسكر بدون ادوية بالضغط هنا <<
واليكم فيديو لبوب بريدجز عن نفس الموضوع
وهذا فيديو لدكنور فنج ونظامه المدهش والفعال جدا لعلاج كل من السمنة والسكر بدون ادوية
كما يمكنكم متابعة يومياتى الشخصية مع السمنة والسكر لعلكم تستفيدوا من تجربتى فى تطبيق هذا النظام الرائع – اضغط هنا <<
100جم سبانخ طازجة او مجمدة (ممكن نجمدها فى البيت – الطريقة هنا << )
كوب كزبرة خضراء مفرية
بصلة مقطعة فتافيت صغيرة
فص ثوم مفروم
معلقة صغيرة كزبرة ناشفة
ربع معلقة صغيرة ملح وكبابة صينى
معلقة زبدة او سمن او زيت
حلقات طماطم – فلفل رومى – بصل اخضر
الطريقة
نضرب البيض فى طبق ثم نضيف كل المقادير ونقلب
نضع الزبدة فى طاسة تيفال على النار ونصب فيها الخليط ونفرده ليملأ الطاسة
لما البيض يتماسك من الاسفل : نطبق الاومليت نصفين على نفسه – دقيقة ونقلبه على ظهره دقيقة كمان ثم نزحلقه فى طبق التقديم ونزينه بحلقات طماطم فلفل رومى – بصل اخضر
بما ان مرض السكر صديق لدود – دايما ضميرى بيأنبنى لو شربت شاى – ولو شربته بدون سكر بيبقى طعمه صعب – لكن امبارح اكتشفت بديل رائع : مشروب البصل
المشروب التالى سهل التحضير – وبه فوائد صحية عديدة – ومفيد كمان لو عندك برد – كحة – بلغم – التهاب فى الحلق او اللوز – وهو مشروب لذيذ جداً طعمه زى طعم ماء كوب حمص الشام (حلبسة) – واهم حاجة انه مش بيخلى صديقى يزعل منى – بالعكس – فالبصل يخفض الكوليسترول وسكر الدم << ويقلل من مخاطر الاصابة بحصوات المرارة وتصلب الشرايين وامراض القلب بفضل احتوائه على مادة Quercetin المضادة للأكسدة – ولاحتوائه على allyl propyl disulphide فقد وجد الباحثين ان البصل الاحمر يخفض من سكر الدم لمدى 4 ساعات من تناوله نيئا او مطهياً
المقادير لتحضير 4 اكواب
بصلة حمراء كبيرة او بصلتين متوسطين
4 كوب ماء (1 لتر)
معلقة كبيرة خل
معلقة صغيرة ملح
2 معلقة صغيرة كمون
4 ليمونات
الطريقة
نضع الماء والخل والملح فى وعاء
نقشر البصلة ونقطعها حلقات ونضعها مع الماء
نغلى الوعاء ثم نغطيه ونتركه على نار هادية ربع ساعة
نطفى النار ثم نضيف الكمون ونقلب
نعصر ليمونة فى كوب ثم نصب عليها المشروب من خلال مصفاة
نشربه ساخناً
نترك باقى المشروب مغطى فى الحلة وفى أى وقت نسخنه ولا ننسى فى كل مرة ان نعصر ليمونة فى الكوب قبل صب المشروب الساخن
انصحكم باستبدال الشاى والقهوة بهذا المشروب الصحى اللذيذ فى الصباح وبعد الوجبات وفى أى وقت – وقولوا باى باى لنزلات البرد والرشح والكحة والتهابات الحلق واللوز والبلغم – وما تنسوش تدعولى !
محلات الفول اصبحت تبيع الفول وكأنه الماظ – كمية صغيرة جدا لا تكفى طفل باسعار مبالغ فيها وتزيد كل يوم – دة غير خطورته على الصحة لان عربيات الفول وبعض المحلات بتستخدم مادة كيماوية خطيرة عشان الفول يستوى بسرعة ويوفروا فى ثمن انابيب البوتاجاز – بينما الفول المستورد سعره رخيص ويتراوح بين 5 و6ج للكيلو – تعالوا ندمس الفول فى البيت باسهل طريقة ومش حيكلفنا ربع ثمنه من المحلات
ملاحظات قبل البدء
انا كنت لما ادمس فول يطلع وشه مسود كانه محروق فطعمه يبقى مر – لغاية ما توصلت الى السبب : الهواء – فالفول يبدو انه يتأكسد بتعرضه للهواء – لذلك مهم اننا ندمس الفول فى حلة حجمها مناسب على قد الفول وماؤه – بحيث يملوا الحلة قرب الحافة فميبقاش فيه مكان للهواء اثناء الطهى – ويفضل كمان يكون غطاء الحلة به خرم لتنفيس البخار
مش لازم تعمل كيلو فول مرة واحدة – خصوصا لو احنا اسرة صغيرة – ممكن نعمل ربع الكمية – يعنى نعمل الكيلو على 4 مرات – كدة حيبقى الفول طازة فى الثلاجة اول باول من غير ما نحتاج نشيله فى الفريزر – المهم ان مقدار الماء يكون 4 اضعاف وزن الفول الجاف – يعنى الربع كيلو فول يحتاج لتر ماء للنقع ويحتاج لتر ماء للتدميس على النار
عند شراء الفول المستورد ابحث عن الفول الفاتح اللون وتجنب شراء الفول البنى الغامق
المقادير
كيلو فول تدميس مستورد
4 لتر ماء للنقع
4 لتر ماء للتدميس
الطريقة
ننقى الفول للتخلص من أى فولة بها ثقب او بقعة سوداء
نغسل الفول ونصفيه 3 مرات ثم ننقعه فى ماء 4 اضعاف وزنه ماء لمدة 6 ساعات
نصفى الفول من ماء النقع (يمكن استخدام الماء فى سقى النباتات لانه مغذى ممتاز لها) ثم نغسل الفول ونصفيه 3 مرات تماما من الماء
نضع ماء يعادل 4 اضعاف وزن الفول الخام فى حلة مغطاه على النار
بعد ما الماء يغلى نسقط فيه الفول ونغطيه مرة أخرى
بعد ما الماء يرجع يغلى تانى (حوالى 3 دقائق) نوطى النار أقل حاجة كانها شمعة
بعد ساعتين حيكون الفول استوى وجاهز للأكل – لكن انا باحب اسيبه على النار ساعة زيادة عشان ماؤه يتقل
ناخد من على الوش ما نحتاجه للأكل طازة ونضع الباقى فى الثلاجة بدون غطاء
واحنا بنسخن الفول نحط عليه ملح وخل ونقلب – وبعد ما نطفى النار نضيف زيت وكمون ومعلقة طحينة خام – ما نحطش ابدا الزيت الا بعد ما نطفى النار
يقدم مع سلطة بلدى – بصل (مقطع ومتقلب فى شوية خل) – خيار مخلل – سلطة طحينة
وجدت فى مجمعات “فاميلى ماركت” فراخ كبيرة جدا لم اراها من قبل – وزن الفرخة 2000جم – ماركة اوكرانى اسمها كواليكو Qualiko (طلعت شركة مشهورة وبتنتج كل حاجة بنفسها – مراعى خضراء ومصنع انتاج غذاءهم ومعامل تفريخ الكتاكيت وكل شئ شوف الفيديو دة)
المهم انى لما لقيت الفرخة قريبة من حجم الديك الرومى جت لى فكرة انى اشويها زى ما الامريكان بيشووا ديك الكريسماس – بس اضفت اللمسة الشرقية بتاعتنا – والنتيجة طلعت تحفة بجد – لازم تجربوها – مناسبة جدا للعزومات وحتزين السفرة – او يوم الجمعة مع اللمة – او تتاكل على يومين لو لوحدكو
السر الوصفة دى فى حاجتين – ان الفرخة تبات محشية ملح وبصل وخل فيطرى لحم الفرخة – وانها تستوى بطريقة الطهى البطئ: 3 ساعات فى فرن 140 درجة (بدلا من ساعة فى فرن حامى يحرقها من الخارج وتفضل نية فى الداخل)
المقادير
فرخة مجمدة 2000جم
4 بصلات كبار
2 فلفل رومى
معلقة ونصف صغيرة ملح
معلقة صغيرة فلفل اسود
معلقة صغيرة كبابة صينى او بهارات
نصف معلقة صغيرة قرفة
3 معلقة كبيرة خل
2 كيلو كوسة (او بطاطس+بصل+حلقات طماطم)
2 كوب ماء فى حالة الكوسة (5 اكواب فى حالة البطاطس)
خلطة الدهان (اختيارى)
معلقة كبيرة سمن بلدى
معلقة كبيرة خل
معلقة صغيرة صلصة
ملح وفلفل وبهارات وذرة قرفة
الطريقة
نفك الفرخة من التجمد بوضعها فى ماء
فى الوقت دة نحضر الحشو بوضع كل المكونات فى الخلاط ونضربهم خفيف – عايزين البصل فتافيت لكن مش عصير طبعا
بعد ما الفرخة تفك نبدأ تدخل صباعين من ايدنا بالراحة تحت الجلد وشوية بشوية نتوغل فى منطقة الصدر من الامام ثم الوراك ثم ظهر الفرخة – بس بشويش خالص عشان ما نخرمش الجلد عايزينه صحيح عشان يحتفظ بالحشو
نبدأ نحشى الفرخة بالخلطة بتاعتنا فى كل الاماكن اللى فتحناها – برضه بالراحة عشان منقطعش الجلد – وباقى الخلطة نحطها فى تجويف الفرخة الداخلى
ناخد معلقة صغيرة ملح نرشها على الفرخة من الامام والخلف وندعك الملح بادينا على الجلد كله وتحت الوراك والاجنحة
نضع شبكة فوق صينية ثم نضع الفرخة على الشبكة وندخلهم فى الثلاجة 24 ساعة (يعنى نعمل الخطوات السابقة فى اليوم السابق ليوم الشوى)
فى اليوم التالى نخرج صينية الفرخة من الثلاجة لتهدأ
نرفع الشبكة وعليها الفرخة – حنلاقى سائل فى قعر الصينية نسيبه ونحط معاه حلقات كوسة – جزر – بطاطس – طماطم – بصل – فلفل رومى او تشكيلة حسب الرغبة – ونصف كوب ماء
نعيد الشبكة وعليها الفرخة فوق الصينية
ندهن اذا اردنا وش الفرخة بخلطة الدهان باستخدام فرشة سليكون (خطوة اختيارية – ممكن من غير دهان)
ندخلها الفرن على 140 درجة لمدة ساعة ونصف
نخرج الصينية وننقل الشبكة بالفرخة على صينية اخرى فاضية
نصب كوب ماء على الخضار ونقلبه من تحت لفوق – حنلاقيه اخذ لسعة شوى لذيذة – عشان كدة دلوقتى ضرورى نزود كوب ماء عشان مايتحرقش فى الساعة الثانية
نعيد الشبكة بالفرخة على صينية الخضار مرة اخرى – ونقلب الفرخة على ظهرها وندهنها بالخلطة – ونصب البهريز اللى نقط فى الصينية الفاضية على الفرخة – ثم ندخلها الفرن ساعة ونصف اخرى
نخرج الصينية من الفرن على السفرة على طول – وسّع وسّع – أحلى شيف فى الدنيا داخل بأحلى فرخة مشوية محشية لأحلى ناس – بس حاسبوا على صوابعكوا لتاكلوها وراها
لو الفرخة اللى معانا وزنها 1200جم نسويها فى الفرن على 140 درجة برضه لكن لمدة ساعتين ونصف (ساعة وربع لكل وش)
لو الفرخة اللى معانا وزنها 1000جم نسويها فى الفرن على 140 درجة برضه لكن لمدة ساعتين (ساعة لكل وش)
أقدم لكم قريبا ان شاء الله خدمة جديدة مفيدة لكل محبى الرشاقة وكذلك لمرضى السكر وارتجاع المرئ والضغط والكوليسترول والقلب والاورام – وجبات LCHF منخفضة النشويات – والتوصيل مجانى داخل القاهرة
طماطم مخللة تحفة تقدم مع أى أكلة فتضيف لها طعامة رائعة وفوائد صحية بالجملة
المقادير
كيلو طماطم
معلقة صغيرة كمون
1/2 معلقة صغيرة ملح
1/2 معلقة صغيرة شطة
معلقة كبيرة ثوم مفروم
4 معالق كبيرة خل
عصير ليمونة
الطريقة
فى طبق كبير غويط نخلط كل المكونات جيدا ماعدا الطماطم
نقطع الطماطم نصفين بالعرض ثم نقطع كل نصف 4 ارباع ونضعهم فى الطبق ونقلبهم جيدا
تقدم فوراً او نغطيها فى الثلاجة لحين تقديمها
تقدم مع المشويات والمحمرات والسندوتشات والبيتزا والمحاشى وعلى الافطار مع الفول والفلافل ومع الكشرى – الحقيقة هى مناسبة تقريبا مع جميع الاكلات – وطعمها خطيييير ومغذية جداً – انصحكم بتناولها كل يوم
اللقيمات نظام غذائى مأخوذ عن سنة سيدنا محمد صلى الله عليه وسلم – فهو من قال “ما ملأ ابن آدم وعاء شراً من بطنه، بحسب ابن آدم لقيمات يقمن صلبه، فإن كان لابد فاعلاً فثلث لطعامه وثلث لشرابه وثلث لنفسه”
وهو نظام غذائى وليس ريجيم مؤقت – بمعنى اننا يجب ان نتبعه طوال حياتنا من أجل الاستمتاع بصحة جيدة وتجنب الامراض – سأعرض لكم النظام الاصلى ثم اعرض لكم النظام المعدل الذى قمت بوضعه ليتوافق مع مرضى السكر ومن يتبعون نظام LCHF الصحى
النظام الاصلى الذى ابتكره الاستاذ الدكتور محمد الهاشمى أستاذ السمنة بكلية الطب جامعة القاهرة واستشاري علاج السمنة المفرطة – تجدونه هنا – يتلخص فى كلمتين : تعويد البطن على الا تمتلئ ابداً – وان نتناول لقيمة (أى وجبة صغيرة او سناك) مرة كل ساعتين او ثلاث ساعات – كل لقيمة حجمها لا يزيد عن ملء نصف كوب – الفكرة أن الكميات القليلة سيهضمها الجسم بسرعة فلا يخزن شئ منها – ثم نتناول كمية صغيرة تالية يهضمها ايضا وهكذا – وبما اننا نستطيع ان نأكل كل ساعتين فلن نكون قلقانين من الكمية الصغيرة لاننا مش حنلحق نجوع – ولا يهم نوع الاكل (فى النظام الاصلى) – المهم الكمية – بمعنى اننا يمكننا أى طعام موجود – تناول نشويات بروتينات دهون – عيش ارز مكرونات محاشى حلويات – المهم الا تزيد الكمية عن مقدار نصف كوب فى المرة الواحدة حتى تتعود المعدة على الكميات الصغيرة فلا نشعر بالجوع كما كنا من قبل – مع ملاحظة انه يجب شرب 2 كوب ماء على الريق – و2 كوب ماء 10 دقائق قبل كل لقيمة طوال اليوم – وبعد اللقيمة مباشرةً نأكل 3 حبات لوز او 5 حبات سودانى غير مملح
ويمكن تناول وجبة رئيسية واحدة فى اليوم – يسمونها الوجبة المرحة – البعض يفضلها مساءا حتى ينام شبعان – لكن الافضل تناولها قبل النوم ببضع ساعات حتى لا تسبب تعب فى الهضم – وفى هذه الوجبة مسموح بثلاث اضعاف حجم اللقيمة – أى مقدار كوب ونصف – من النشويات او الخضار – ومقدار كوب ونصف من السلطات – وقطعة لحم او فراخ او سمك فى حجم الكف – ومعلقة حلوى (شوكولاتة او ايس كريم مثلا)
النظام المعدل
نظامى المعدل يركز على الاقلال من النشويات بقدر الامكان – يمكن تناول النشويات المركبة فى صورتها الكاملة لكن ليس فى صورتها البسيطة – فمثلا لا تتناول الخبز لكن تناول البليلة لانها تصنع من حبة القمح الكاملة – والابتعاد عن السكريات و الحلويات اواستخدام السكر فى أى شئ
أمثلة للقيمات:
2 بيضة مسلوقة مع شريحة جبن شيدر
3 معالق فول بالزيت والطحينة مع قطعة صغيرة جبن بيضاء
3 معالق فاصوليا بيضاء
قطعة جبن قريش مهروسة بالزيت والطماطم
قطعتين برجر مع شريحة جبن شيدر
نصف كوب بليلة
نصف كوب عدس
نصف سمكة مشوية
ربع فرخة
قطعة لحم 100جم
نصف كوب خضار
ثمرة فاكهة
نصف كوب زبادى اولبن رايب مع 3 تمرات
نصف علبة تونة
نصف كوب فول نابت
نصف كوب شوربة
يمكن تناول الاتى فى أى وقت:
خيار
طماطم
خس
جرجير
بقدونس
فلفل رومى
مع ملاحظة ضرورة شرب 2 كوب ماء قبل كل وجبة ب10 دقائق – وبعد الوجبة مباشرةً نتناول 3 حبات لوز او 5 حبات سودانى غير مملح
اليكم فيديو يشرح لكم فيه دكتور رافل عبد الوهاب كيفية تخفيض سكر الدم بدون أدوية – فقط من خلال النظام الغذائى LCHF – وهو باختصار الامتناع تماما عن تناول النشويات والسكريات – وتناول الكثير من الخضروات الطازجة وخصوصا الورقية وكذلك الخضروات المطبوخة وبعض الفواكه مع الدهون الطبيعية والبروتينات الحيوانية والنباتية وتناول الردة مع الاكثار من شرب الماء طوال اليوم
حنعمل مع بعض برجر بيتى لذيذ ونحشى بيه اومليت مش حتصدقوا جماله
بما ان مرض السكر صديق لدود – دايما ضميرى بيأنبنى لو شربت شاى – ولو شربته بدون سكر بيبقى طعمه صعب – لكن امبارح اكتشفت بديل رائع : مشروب البصل
وجدت فى مجمعات “فاميلى ماركت” فراخ كبيرة جدا لم اراها من قبل – وزن الفرخة 2000جم – ماركة اوكرانى اسمها كواليكو 
أقدم لكم قريبا ان شاء الله خدمة جديدة مفيدة لكل محبى الرشاقة وكذلك لمرضى السكر وارتجاع المرئ والضغط والكوليسترول والقلب والاورام – وجبات LCHF منخفضة النشويات – والتوصيل مجانى داخل القاهرة
طماطم مخللة تحفة تقدم مع أى أكلة فتضيف لها طعامة رائعة وفوائد صحية بالجملة