سلطة بيض

سلطة البيض طبق مشبع لذيذ ومغذى يصلح للفطار او العشاء

المقادير

• 3 بيضات مسلوقين
• 4 ثمرات طماطم
• ثمرتين خيار مقشر
• معلقة كبيرة مايونيز او سلطة طحينة
• ذرة ملح وكمون وشطة وبودرة ثوم
• معلقة كبيرة جبنة رومى مبشورة (اختيارى)

الطريقة

• نسلق البيض ونقشره
• نغسل الطماطم جيدا ونقطعها مكعبات
• نغسل الخيار جيدا ونقشرة ونقطعه مكعبات صغيرة
• نقطع البيض قطع صغيرة فى طبق ونخلط معه مكعبات الطماطم والخيار
• نقلب معهم المايونيز – ولو غير متوفر نضع معلقة كبيرة طحينة ومعلقة كبيرة خل وشوية ملح وكمون وبودرة ثوم وذرة شطة ونقلب الكل – او ممكن نحط معلقة صغيرة مستردة بدلا من المايونيز و الطحينة

ويا سلام بقى لو نشرب مع الطبق دة كباية لبن رايب مشبرة – تبقى تمام التمام

طريقة حفظ الثوم المفروم طرى فى الفريزر

آخر تحديث: 26-06-2018

عند فرم الثوم وتجميده فى الفريزر كان بيجمد ويبقى مثل الاسمنت – واخيرا توصلت لاكتشاف خطير اتعلمته من بائعة ثوم فى السوق تجعل الثوم فى الفريزر يحتفظ بقوامه الطرى كما هو فيسهل الاخذ منه بالمعلقة بمنتهى السهولة فى اى وقت – ويفضل طرى ومحتفظ بنكهته ولونه لمدة سنة – وقد بحثت فى هذا الامر ووجدت له سبب علمى – فبينما الماء يتجمد عند درجة صفر – لا يتجمد المحلول الملحى الا عند درجة -21  بينما اقصى درجة للفريزر هى -18 وبالتالى لا يصل الى درجة تجمده – وهذا هو سر عدم تجمد الثوم اذا خلطناه بالملح

المقادير

• مقدار ثوم مفروم
• عشر مقدار ملح

يعنى مثلا لو:

• كيلو ثوم مقشر نضع عليه 100جم ملح
• 2 كيلو مقشر نضع عليه 200جم ملح او مقدار كوب
• كل 5 كيلو مقشر نضع عليه كيس ملح 500جم
  (يوزن الثوم هنا بعد تقشيره وتجهيزه للفرم)

الطريقة

• نضرب فصوص الثوم المقشر مع الملح فى الخلاط او الكبة – لا نضرب كثيرا – عايزينه خشن شوية وليس ناعم كالمرهم
• اذا كان الثوم جديد ممكن نضرب معاه جزء من العنق الأخضر بعد غسله جيدًا تقشيره – ففيه نفس نكهة الثوم
• نحفظه فى برطمان او علبة محكمة الغلق فى الفريزر
• عند الاستخدام نغرف منه بملعقة حنلاقيه طرى وجميل

وممكن نضرب جنزبيل طازج مع الثوم بيدى الاكل طعم رائع بنكهة هندية محببة – المقادير بنفس النسبة ايضاً – يعنى لو كيلو فصوص ثوم وكيلو جنزبيل طازج نضع عليهم 200جم ملح – بيفضل برضه طرى فى الفريزر وجاهز للأخذ بالمعلقة فى اى وقت

وبالف هنا وشفا