زى ما وعدتكم حنتكلم عن كيف تنصح حبايبك ازاى يمنعوا مرض السكر قبل حدوثه
الاول محتاجين نفهم ان مرض السكر من النوع الثاني او سكر الكبار بوادره بتبدأ مبكرا جدا.. سنوات قبل الاصابة الفعلية.. بعض الدراسات بتقول من 10 الى 20 سنة
السكر وقتها بيكون طبيعي والارقام تحت 100 صايم و120 فاطر
لكن الناس اللي سكرهم مظبوط نوعان:
نوع حساسية جسمه للانسولين ممتازة.. بحيث مجرد ما ياكل اى طعام نشوي او سكري يقوم بنكرياسه بافراز كمية بسيطة جدا من الانسولين فتدخل الجلوكوز الى خلايا الجسم ليحرقها ويحصل على الطاقة اللازمة بمنتهى السهولة
ونوع ثاني احنا السكريين منهم للاسف
حساسية جسمنا للانسولين ضعيفة غالبا لاسباب وراثية
لذلك يضطر البنكرياس انه يفرز كميات مضاعفة من الانسولين لتأدية المهمة
النوعين بتكون قياسات سكرهم طبيعية
لكن الفرق ان الانسولين في دمنا بيكون عالي في البداية
لكن مع مرور السنين البنكرياس بيبدأ يتعب من كثرة افرازه للانسولين
وخلايا بيتا المسئولة عن افراز الانسولين من البنكرياس بيحصل لها نسبة تلف مع الوقت ويقل عددها
وبعد سنين لما كفاءة البنكرياس تقل لمستوى حرج يبدأ سكرنا يعلا وهنا بس ننتبه الى اننا اصبنا بسكر الكبار
اذن اى حد يقدر من بدري يعرف اذا كان سكره مظبوط على حساب ارهاق البنكرياس وللا عشان حساسية جسمه لانسولين ممتازة
ازاى نعرف؟
باجراء تحليل بسيط اسمه هوما اى ار
Homa IR
بيوضح لنا نسبة الانسولين في دمنا
فلو طلعت عالية اذن احنا من النوع الثاني
لو عرفنا كدة من بدري
لو حد قالنا كدة من زمان
كنا اخذنا حذرنا وتجنبنا الاصابة بسكر الكبار
بمجرد تجنب النشويات والسكريات
بكدة نريح البنكرياس ولا يضطر لارهاق نفسه ليل نهار بافراز كميات مضاعفة من الانسولين ترهقه وتقصر عمره
ونعتمد في اكلنا على الخضروات الطازجة مع بروتين ودهون صحية وشوية مكسرات وبذور ومخللات منزلية
ياريت تنصحوا كل اللي تعرفوهم.. بالذات اولادكم واقاربكم.. لو العامل الوراثي موجود من حضرتك لذلك الاحتياط واجب وضروري حتى لا يحدث لهم ما حدث لنا.. لمجرد ان المعلومة كانت غائبة عنا ولم ينبهنا اليها احد
ربنا يحفظكم ويحفظ اولادكم وكل حبايبكم من كل شر
ليست هناك تعليقات:
إرسال تعليق