(ملحوظة قبل البدء: يا سلام لو كل مريض سكر يكتب يومياته – وخصوصا اللى بيحاولوا يستغنوا عن الادوية ويظبطوا اكلهم فقط – كدة الناس كلها تستفيد من تجارب الاخرين – انا عن نفسى قررت اكتب هنا يومياتى مع مرض السكر – يمكن تجربتى تفيد حد غيرى فيدعيلى بظهر الغيب – ياسلام .. ياريت – وكمان حاكتب هنا برضه فى نفس الوقت تجربتى مع التخسيس لان الوزن الزائد هو اصلاً سبب المشاكل وهو اللى بيجيب السكر من النوع الثانى – فالتخسيس لازم يكون هدف أى مريض عشان يساعد نفسه وينهى معاناته مع الامراض بصفة عامة والضغط والسكر بصفة خاصة)
………..
لم اكن اعرف ان السمنة وقلة النشاط اليومى وارتفاع ضغط الدم وكثرة النشويات (الخبز فى حالتى) هم عوامل الخطر الثلاثة التى تؤدى للاصابة بمرض السكر – انا اللى ودانى فى داهية انى كنت باكل عيش كتير جدا – 3 ارغفة بلدى فى كل وجبة وساعات اكتر – اكتشفت المرض بالصدفة من خلال تحليل دم طلبه منى أحد الأطباء – ربنا يكرمه – فلولاه ما كنت عرفت – كان ذلك من سنتين (نصف مرضى السكر فى مصر لا يعرفون ان عندهم سكر – ارجوكم من فضلكم اعملوا النهاردة اختبار سكر بخمسة جنيه فى اى صيدلية – يوجد 8 مليون مصرى مصاب بالسكر – وعدد اكبر منهم لسة مش عارفين انهم مصابين بيه – ببساطة لانهم معملوش تحليل سكر لغاية دلوقتى)
ليه الناس اللى بتاكل عيش كتير معرضة للاصابة بالسكر؟
عشان كل ما ناكل نشويات كتير (عيش او رز او مكرونة او حلويات) وجسمنا طبعا يحول كل دة الى جلوكوز – كل ما البنكرياس بتاعنا يفرز انسولين اكتر – الانسولين وظيفته ينقل الجلوكوز لخلايا جسمنا – وبسبب كثرة الانسولين اللى بيروح للخلايا تبتدى الخلايا دى تتكون عندها حاجة اسمها مقاومة الانسولين (IR) عشان تحمى نفسها – وبالتالى الجلوكوز يفضل فى الدم لان الخلايا لم تحرقه – ودة بيخلى البنكرياس يفرز انسولين اكتر – فتزيد الخلايا من مقاومتها للانسولين اكثر – وهكذا نقع فى تلك الدائرة المفرغة المدمرة – وكله بسبب كثرة تناولنا للعيش والنشويات والسكريات عموماً – ياريت كان حد قال لى المعلومات دى من زمان – كنت بطلت عيش كتير ومكنتش مرضت بالسكر (لتفاصيل اكثر اضغط هنا <<)
فى البداية كتب لى الطبيب اقراص تحتوى على مادة metformin – لكنى وجدتها تشبه طعم طباشير او بودرة المونيوم – كما قرأت عن آثاراها الجانبية الضارة بالكلى والكبد فتوقفت عن تناولها بعد اسبوعين فقط – وخصوصا انها لم تؤدى الى اى تحسن خلال تلك المدة (لكنى عرفت فيما بعد انها اقراص مفيدة لخفض السكر لاكثر من سبب – كما انها تساعد على فقدان الوزن – اقراص اسمها التجارى جلوكوفاج)
بدأت أقرأ عن انه من الممكن ضبط مستوى السكر فى الدم عن طريق الغذاء فقط بدون عقاقير – ومن يومها وانا اتبع هذا النظام واسمه LCHF أى كربوهيدرات قليلة و دهون عالية – وبالفعل انخفض السكر تماما وبعد ان كان 180 اصبح لا يزيد عن 100 فقط – وبعد الاكل بساعتين لا يزيد عن 110
المشكلة ان عزيمتى ضعيفة ولا استمر على النظام – فالمفروض ان امتنع تماما عن تناول أى نشويات – لا عيش ولا ارز ولا مكرونة ولا بطاطس – ولا اى مخبوزات او حلويات او مشروبات بها سكر – وان اعتمد فى غذائى فقط على الدهون ثم البروتينات بنسبة أقل – بالاضافة للخضروات
عندما احافظ على تلك الشروط يتحسن السكر عندى ويتراوح بين 100 و 125 ولله الحمد – وبعد ساعتين من الاكل لا يزيد السكر عن 140 – وهذا مثالى
لكننى لا أخس كثيرا مع هذا النظام – فى البداية خسيت 5 كيلو ثم لم ينزل وزنى عن ذلك – مما احبط عزيمتى فاعود بين الحين والاخر الى تناول النشويات للأسف – فتعلو الارقام – من اسبوع كان السكر صائم 161 وبعد ساعتين من الافطار وصل الى 202 – واليوم السكر صائم وجدته 175 – فقررت أن أتبع اليوم صيام الماء فقط لمدة 24 ساعة – ثم انتقل الى نظام جديد قرأت عنه مؤخرا – وهو نظام ريجيم قاسى يستمر شهرين نتناول فيه 800 سعر فقط فى اليوم عبارة عن خضروات طازجة ومطبوخة مع بيضة مسلوقة وجبنة قريش – ويفضل تناولهم فى وجبة واحدة فى آخر النهار – وقضاء باقى اليوم مع الماء فقط بالاضافة الى المشى او الجرى او ايروبيكس نصف ساعة صباحا كل يوم
أتوقع ان كانت عزيمتى قوية واستمريت على الماء 3 ايام ان يعود السكر الى الارقام الطبيعية باذن الله
بما ان وزنى زائد اذن بجسمى مخزون طاقة كبير – على شكل دهون – يكفينى ليس فقط ليومين 3 بل شهرين وربما اكثر – وما يحدث عندما نصوم هو ان جسمنا بعد ان يستهلك كل الجلوكوز السابح فى الدم والذى تعود الجسم على حرقه للحصول على الطاقة – عندما يجد اننا توقفنا عن امداده بالمزيد من النشويات والسكريات – يبدأ فى اذابة تلك الدهون المخزنة فى اجسامنا ليستمد منها الطاقة البديلة – وهذا الوضع يعطى البنكرياس اجازة ويريحه من افراز الانسولين – فيقل مستوى السكر فى الدم – يقل ولا يختفى لان الكبد يحتفظ بمادة الجلايكوجين glycogen التى يحولها الى جلوكوز عندما يجد ان مستوياته فى الدم قد انخفضت – لكن بعد ان ينفذ هذا الاحتياطى بعد بضعة أيام (الكبد بيكون فيه مخزون من الجلايكوجين يكفى لمدة 3 ايام) يلجأ الكبد الى النظام البديل للحصول على الطاقة من الدهون بدلا من الجلوكوز – هذا التحول يعطينا فرصة ذهبية – فنبدأ فى تناول الدهون مع قليل من البروتينات كمصدر رئيسى لامداد اجسامنا من الطاقة – ونستغنى بذلك عن النسبة الاكبر من النشويات والسكريات مصدر أغلب متاعبنا الصحية بما فيها مرض السكر (ماعدا نسبة بسيطة من النشويات بتدخل جسمنا من بعض الاطعمة الغير نشوية مثل الخضروات ومنتجات الالبان) – كثير من الدهون وقليل من البروتينات لماذا – لان جسمنا قادر على تحويل البروتينات الزائدة عن حاجته الى جلوكوز – وانا عرفت مؤخرا ان تناول اقراص جلوكوفاج بيمنع الكبد من تحويل البروتينات الى جلوكوز ودى ميزة هايلة (عشان ما نبقاش حارمين نفسنا من كل النشويات بينما عمنا الكبد عمال يحول من ورانا البروتين اللى بناكله الى جلوكوز فيبوظ كل اللى عملناه) – بالاضافة للخضروات خضراء اللون – لذلك الطعام المثالى لمريض السكر يتكون أغلبه من دهون مع نسبة أقل من البروتينات
A diet very low in starches and sugars induces several adaptive responses. Low blood glucose causes the pancreas to produce glucagon,[64] which stimulates the liver to convert stored glycogen into glucose and release it into the blood. When liver glycogen stores are exhausted, the body starts using fatty acids instead of glucose. The brain cannot use fatty acids for energy, and instead uses ketones produced from fatty acids by the liver. By using fatty acids and ketones as energy sources, supplemented by conversion of proteins to glucose (gluconeogenesis), the body can maintain normal levels of blood glucose without dietary carbohydrates.
اذا لم نلتزم بالنظام ولخبطنا فان اى نشويات فى وجبة واحدة فقط نتناولها سنساعد بذلك الكبد على تجديد مخزونه من الجلايكوجين الذى يحوله الى جلوكوز فنفقد ميزة حرق الدهون مرة أخرى – ونحتاج الى حوالى اسبوعين لتصليح ما افسدناه بسبب تناول النشويات فى وجبة واحدة
من هذا الفهم أبدأ اليوم باتباع نظام الصيام على الماء فقط – ناء فقط بدون أى طعام أو أى مشروبات – فقط ماء طوال ال24 ساعة – فانا بذلك أهدف الى دفع الكبد لاستهلاك مخزونه من الجلايكوجين – هل سيستغرق ذلك يوم؟ يومين؟ ثلاثة؟ – سأعرف عندما يتحول الكبد الى افراز الكيتونات ketones وهى المادة التى يفرزها الكبد لحرق الدهون كمصدر بديل للطاقة – وبما اننى لا املك جهاز قياس الكيتون فى الدم فسيكفينى ان اعرف من خلال مراقبة وزنى – اول 2 او 3 كيلو بيكونوا فضلات سابقة متبقية فى الامعاء الغليظة من الطعام السابق تناوله – لذلك سأعرف ان الكبد قد تحول الى نظام حرق الدهون عندما يبدأ وزنى فى الانخفاض أكثر من 3 كيلو
سٍوف اكتب لكم هنا أولا بأول تطورات السكر معى خلال الايام والشهور القادمة باذن الله – وانت ايضا عزيزى القارئ: اذا كنت مريض بالسكر ياريت تجرب مثلى وتكتب لنا نتائج تجربتك ليستفيد الجميع من تجاربنا الناجحة باذن الله – لعلنا نساهم فى شفاء مرضى آخرين مثلنا
واذا جربتم طريقتى وكتب الله لكم الشفاء ارجو ان تدفعوا أجرتى – وهى ان تطلعوا حاجة لله – تتصدقوا بأى مبلغ للفقراء والمساكين – وان شاء الله الاجر والثواب لكم وان شاء الله أفوز معكم بجزء من الثواب
اليوم الاول (يوم بدء التجربة) 3-3-2015
- قياس السكر: 175
- الفرق فى الوزن: 0
- ملاحظات: بدأت اليوم صيام الماء – على آخر النهار بدأت أجد طعم غريب فى الماء يشبه طعم الكلور – لكن الجميع اكدوا لى ان طعم الماء عادى – يبدو ان هذا الطعم فى فمى انا فقط – وهو مؤشر ان الجسم بدأ يدخل فى حالة ketosis أى تحول من حرق الجلوكوز الى حرق الدهون – ثم اختفى هذا الطعم بعد ساعتين او ثلاثة – قبل النوم كنت مرهق واشعر برأسى خاوى
اليوم الثانى
اليوم ابدأ فى نظام جديد للشفاء باذن الله من مرض السكر عبارة عن 800 سعر حرارى يوميا وفيه نتناول اساسا خضروات من خلال وجبة واحدة فى اليوم فقط – هذا النظام يمكنكم التعرف عليه بتفاصيل اكثر بالضغط هنا
- قياس السكر: 137
- الفرق فى الوزن: -2.1 كجم
- ملاحظات: فى الصباح قمت بنفس شعور الارهاق والخواء لكن بعد شرب ماء شعرت بانتعاش – شربت ماء وخرجت اتسوق – اشتريت مشروم العلبة 800جم ب 11.65ج من اولاد رجب – الطازج غالى فالطبق 200جم ب9.5ج – واشتريت من الخضرى كوسة وجزر وفلفل رومى وقرنبيطة ب6ج فقط (وزنتها بدون ورق ورأس طلعت 3كجم) – وعندى فى البيت بيض – وجبنة قريش فلاحى الكيلو ب12.5ج (لا تشتروا جبنة قريش من السوبرماركت ففيها دسم – الوحيدة بدون دسم هى الجبنة الى تبيعها الفلاحات فى الاسواق فى الصباح) – اكملت شرب ماء حتى السادسة مساءا – تناولت وجبة لذيذة مكونة من شوربة خضار وشوربة قرنبيط وسلطة وقطعة جبنة قريش – لم استطع اكمال الاكل فقد شعرت وكأنى تناولت خروف صحيح – برجليه وودانه بدون مضغ – شعور بالامتلاء عجيب – يبدو ان 24 ساعة ماء فقط جعل معدتى تصغر وتقفل بقت تشبع من أقل حاجة – يا سلام – يا ريتنى كنت عملت كدة من زمان! – بعد ذلك شعرت بدفء لذيذ فى معدتى – غدا ان شاء الله اغرف نصف الكمية كفاية – الساعة 10م تناولت بيضة مسلوقة وجبنة قريش وقرنبيط (القرنبيط مطهى على البخار افضل من المسلوق لان المسلوق بيشرب ماء كثير ويبقى طعمه مبلول) وطماطم وفلفل رومى – مجموع ما تناولته حوالى 800 سعر حرارى
ملاحظات بدءا من اليوم الثالث
- عدلت فى قائمة طعامى لتصبح كالاتى
- الساعة 6م
- تناول نصف الطبخة التالية:
- 80جم لحمة مفرومة نشوحها فى 40جم زبدة مع ذرة ملح – ثم نشوح معها 500جم من أى خضروات بشرط أن تكون خضراء اللون – مثل:
- كوسة (حلقات بقشرها)
- سبانخ (مخرطة أو مجمدة)
- سلق (مخرط)
- ملوخية (طازجة مخرطة او مجمدة)
- بامية
- فاصوليا خضراء (مقطعة)
- قرنبيط مقطع شرائح (الازهار والسيقان)
- كرنب (مخرط)
- وبعدين نغطى الحلة على اقل نار حتى يصبح طرى – حوالى 20-30 دقيقة
- 80جم لحمة مفرومة نشوحها فى 40جم زبدة مع ذرة ملح – ثم نشوح معها 500جم من أى خضروات بشرط أن تكون خضراء اللون – مثل:
- تناول نصف الطبخة التالية:
- الساعة 8م
- النصف الثانى من الطبخة السابقة
- الساعة 10م
- بيضة مسلوقة نصف سوى
- قطعة صغيرة 50جم جبنة قريش فلاحى
- 250جم فلفل رومى اخضر يؤكل طازج
- الساعة 6م
- يمكن اضافة أى توابل حسب الرغبة – فلفل اسود – كبابة صينى – ورق لورا – ملح صينى – شطة – كركم – زعتر
- انا دائما اطحن بذر كتان وانثر معلقة صغيرة على أى طبق طعام مطهى – ففوائده رهيبة وبالذات قدرته العجيبة فى ضبط كل مستويات الدم بصفة عامة وخفض الكوليسترول والدهون الثلاثية بصفة خاصة
- خمس دقائق جرى خفيف jogging – يزيدوا كل يومين 5 دقائق الى ان أصل الى 40 دقيقة باذن الله
- خمس دقائق تمارين بالسوست للكتف والاذرع والصدر – يزيدوا بالتدريج الى ان اصل الى 30 دقيقة باذن الله
8 مارس 2015
بدأت أزود فى سعرات اليوم الى 1200 سعر بدلا من 800
10 مارس
زودت سعراتى مرة أخرى لتتراوح بين 1300-1400 – وبدأت فى تناول لحم البط فهو عالى فى الدهون وهو المطلوب
13 مارس
انخفض السكر صايم الى 88 قبل وجبة المغرب – والسكر بعد ساعتين 112 – هذه الارقام الطبيعية لم ارها منذ سنين – الحمد لله والشكر لله
ما اتناوله من كربوهيدرات لا يتجاوز 40جم – بينما 70% من طعامى دهون و20% يروتينات – مهم الا نأكل بروتينات كثيرة لان الكبد قادر على تحويل البروتينات الى جلايكوجين (جلوكوز) لذلك معظم سعراتى آخذها من الدهون لان الكبد لا يستطيع تحويله الى جلوكوز وايضا حتى اظل فى حالة ketosis وهو النظام البديل للحصول على الطاقة من الدهون بدلا من الجلوكوز – وهذا هو سر نجاح هذا النظام فى خفض سكر الدم بطريقة مذهلة – فقد انخفض السكر عندى كما ترون من 175 الى 88 – وبعد الاكل بساعتين انخفض من 210 الى 112 بفضل الله خلال 10 ايام فقط!
قائمة طعامى اليوم – عبارة عن وجبتين
المغرب (6م)
- حتة صدر بطة – 150جم – مسلوقة على نار هادية جدا لمدة 3 ساعات مع بصلة وطماطماية وفلفلة خضراء وورق لورا وملح وفلفل وكبابة صينى وبذر كتان مطحون
- اخرجت صدر البطة ووضعت فى شوربتها نصف كيلو كوسة مقطعة بقشرها نصف ساعة على نار هادية جدا
- حمرت صدر البطة (فى زبدة او زيت) وكلتها مع نصف الشوربة والكوسة
- طبق سلاطة جبنة قريش: 100جم جبنة قريش فلاحى مفرولة مع زيت زيتون وطماطماية وخيارة مقطعين وبقدونس وشبت مخرطين وكمون وبذر كتان مطحون
- 100جم جبنة شيدر – سايحة على نار هادية جدا
الساعة 10م
- باقى الشوربة والكوسة
- طبق سلاطة جبنة قريش مماثل للسابق
- 1 بيضة مسلوقة
بهذا اكون اليوم اكلت الاتى:
- عدد السعرات: 1360
- الكربوهيدرات: 42جم (12%)
- دهون: 100جم (66%)
- بروتينات: 76جم (22%)
يبدو ان هذا الطعام وتلك النسب مفيدة جدا لمرضى السكر – ففى اليوم التالى انخفض رقم السكر عندى الى 88 صائم و112 بعد ساعتين – بعد ان كان من 10 ايام فقط 175 صائم و210 بعد ساعتين!
16 مارس
المشى نصف ساعة يوميا بيفرق كثيرا – فاصبحت أخس احسن من الاول – يومى 14 و15 خسيت فيهم 2 كيلو تقريبا! بسبب المشى – وهو مفيد جدا ايضا لتخفيض السكر
18 مارس
أمشى يوميا مشى سريع مسافة مقدارها 2.5 كيلومتر – اقطعهم فى نصف ساعة – بالاضافة ل20 دقيقة مشى عادى – وامبارح بدأت أجرى فى آخر دقيقتين (تقريبا آخر 120 متر) – قبل كدة مكنتش اقدر اجرى 5 متر على فكرة – دة خلانى احس انى حرقت طاقة كبيرة جدا – نفسى انقطع بصراحة وبيتهيأ لى انى خلصت اكسجين الحى – وبالفعل النهاردة خسيت ضعف اليوم اللى قبله – بسبب شوية الجرى دول وكمان بسبب انى اكلت سعرات اقل من اليوم اللى قبله (1300 بدلا من 1500) – باذن الله ناوى اواظب على الجرى آخر دقيقتين كل مرة طالما النتائج جميلة كدة
– البط جايب معايا نتائج طيبة – النهاردة حأقسم بطة جديدة 9 قطع على 9 ايام – الوراك 4 قطع والصدر 4 قطع واليوم التاسع الرقبة والكبدة والقلب والقوانص – القطعة باسلقها على نار هادية جدا 3 ساعات مع بصلة وطماطماية وفلفلاية رومى – وبعدين احمرها فى سمن – والشوربة اطهى فيها أى خضار – كوسة وباذنجان مكعبات – او ملوخية او سبانخ او قرنبيط
كدة خسيت لغاية دلوقتى 9.2كجم فى 15 يوم على النظام الهايل دة – بافكر اسميه “رجيم البط” !
20 مايو 2015
بعد اول 15 يوم توقف خفض الوزن للأسف – واستمر 126كجم لمدة شهر كامل لا يتزحزح ولا يقل ولا جرام واحد! – عشان كدة بطلت اكتب هنا لانى ملقيتش حاجة اكتبها – وكمان بطلت اوزن نفسى – لكن نتائج السكر خلتنى اواظب على النظام ولا اتوقف ابداً – واليوم طلبت منى زوجتى بإلحاح ان اوزن نفسى قائلة ان شكلى خاسس – وكانت المفاجأة انى خسيت 7كجم مرة واحدة من غير ما آخد بالى – يعنى كدة خسيت 16كجم فى حوالى 80 يوم
حاليا بآكل بدون ما حسب السعرات زى الأول – لكم نفس الشروط ملتزم بيها – لا نشويات ولا سكريات ولا بقول ولا فواكه – فقط خضروات طازجة ومطبوخة – ولحوم وفراخ واسماك بأى كمية – وبقيت اعمل سلطة بابا غنوج تحححححفة واقلب فيها السطة الخضراء واتناولها مع أى اكل – وسندوتشات خس بالبيض السكرامبلد (بيض مقلب مع جبنة سايحة) – وسندوتشات خس باللحمة المعصجة تجنن – الحمد لله كله اكل لذيذ ومشبع ولا يشعرنى بأى جوع أو حرمان – الغريبة ان انا بطلت رياضة خالص الشهرين اللى فاتوا بعد ما لقيت انى مش باخس – ومع ذلك خسيت 7 كيلو مع انى قاعد فى البيت لا بتحرك ولا بامشى ولا باعمل أى نشاط رياضى حتى فى البيت! – بس كدة انا نفسى اتفتحت تانى للرياضة وحأرجع امارس اى حاجة ان شاء الله حتى تمارين فى البيت باذن الله
24-5-2015
انا لسة برضه لم اعد لممارسة اى رياضة ولا حتى المشى – مش عارف ايه الكسل دة – لكن مع ذلك التخسيس مستمر – بقالى 4 ايام لاحظت انى باخس 100جم كل يوم – والنهاردة خسيت 400جم مرة واحدة – مع انى اليومين دول بآكل سودانى كتير يوميا – طول الليل امام التليفزيون وطبق السودانى كل ما يخلص املاه تانى!
اخترعت اكلة طلعت لذيذة جدا: فاصوليا خضرا متشوحة فى السمن البلدى مع مايونيز بيتى – والطريقة انى باجيب كيلو فاصوليا خضرا وبعد غسيلها باقطعها نصفين وبعدين اشوحها على نار عالية فى معلقة سمن بلدى مع ثوم مهروس وشوية ملح وورق لورا مطحون واقلب لغاية ما تستوى لكن تفضل لسة مقرمشة مش دبلانة – وعلى السفرة باغرف منها فى طبق واقلب معاها معلقة مايونيز – انا اللى عامله فى البيت – حتلاقوا الطريقة على اليمين – ومع الاكلة دى باقلب معاها شوية لحمة مفرومة باشوحها برضه فى معلقة سمن مع معلقة صغبرة ثوم مهروس وقرن فلفل حامى – ما اقولوكوش على الطعامة والجمال – طبق تحفة بجد ومشبع جدا مع سلطة خضرا – وبيخسس آخر حاجة
28-5-2015
وصلت الى 116كجم – يعنى كدة خسيت 19كجم خلال 85 يوم – كل يوم اتاكد اكتر ان السودانى هايل للتخسيس – انا خسيت 10كجم فى الاسبوعين الاخيرين من ساعة مابدأت اكل سودانى – شئ مذهل انا نفسى مش مصدق – كنت فاكر السودانى بيتخن لكن طلع العكس تماما !
—————————————————
سأكتب لكم هنا النتائج اليومية تباعا فى الجدول التالى:
النتائج اليومية للريجيم
| اليوم | الوزن | الكيلوات المفقودة | فرق اليوم (بالجرام) | قياس السكر | فرق السكر |
| 03/03 | 134.8 | 175 | |||
| 03/04 | 132.7 | -2.1 | -2100 | 137 | -38.0 |
| 03/05 | 132.1 | -2.7 | -600 | 154 | 17.0 |
| 03/06 | 131.2 | -3.6 | -900 | 164 | 10.0 |
| 03/07 | 131.0 | -3.8 | -200 | 129 | -35.0 |
| 03/08 | 130.6 | -4.2 | -400 | 138 | 9.0 |
| 03/09 | 130.0 | -4.8 | -600 | 106 | -32.0 |
| 03/11 | 129.3 | -5.5 | -700 | ||
| 03/13 | 129.4 | -5.4 | 100 | 88 | -18.0 |
| 03/14 | 128.5 | -6.3 | -900 | ||
| 03/15 | 127.4 | -7.4 | -1100 | ||
| 03/16 | 127.2 | -7.6 | -200 | ||
| 03/17 | 126.8 | -8.0 | -400 | ||
| 03/18 | 125.6 | -9.2 | -1200 | ||
| 03/19 | 126.0 | -8.8 | 400 | ||
| 05/20 | 119.0 | -15.8 | -7000 | ||
| 05/21 | 118.9 | -15.9 | -100 | ||
| 05/22 | 118.8 | -16.0 | -100 | ||
| 05/23 | 118.7 | -16.1 | -100 | ||
| 05/24 | 118.3 | -16.5 | -400 | ||
| 05/26 | 118.1 | -16.7 | -200 | ||
| 05/27 | 117.9 | -16.9 | -200 | ||
| 05/28 | 116.0 | -18.8 | -1900 |
16-12-2016
للأسف بعد 28-5 السنة اللى فاتت بدأت الخبط ورجعت آكل نشويات فوزنى زاد تانى وكل اللى عملته خسرته – لدرجة ان وزنى وصل الى 134 – زيادة 19 كيلو – نفس اللى خسيتهم بالظبط – ورجعت اتعدى تانى زى زمان بعد ما كانت مقاومتى الطبيعية بقت عالية ومكنتش بتعدى من حد – دلوقتى بقالى 3 اسابيع الانفلونزا والبرد مبهدلنى فخسيت من العيا 10 كيلو – فدة شجعنى وقلت فرصة ابدا اخس من جديد واستفيد من فقدان الوزن اللى حصلى – لذلك نويت باذن الله ابدأ من اليوم – وزنى (124.4 – 1.5 وزن الملابس) = 122.9كجم – مش حآكل خالص النهاردة – حأشرب ماء فقط – لغاية بكرة 6م مساءاً باذن الله – يعنى من آخر وجبة كلتها امبارح 12 بالليل لغاية بكرة 6م يبقى كدة 42 ساعة صيام ماء
الخطة انى من بكرة باذن الله كل يوم آكل خلال 4 ساعات بس – من المغرب لغاية 4 ساعات بعد المغرب – وبعدين اصوم 20 ساعة لغاية مغرب اليوم التالى وهكذا – والاحظ وزنى – طول ما انا بخس اكمل على نفس النظام – واول ما الاقى نفسى بطلت اخس – والمدة بتختلف من شخص للتانى – من تجربتى لا حظت ان انا بافضل اخس اول 15 يوم وبعدين الخسسان يتوقف – ساعتها بقى ابدأ آكل كميات اكبر من الاول مع التركيز على الدهون اكتر – يعنى سعرات اعلى – وابدأ آكل سودانى كتير لان من تجربتى السابقة لقيته بيخسس جدا – كدة ارجع اخس تانى باذن الله – ومهم جدا المشى يومياً لانه بيضاعف التخسيس – بس مش من الاول – لما الاقى نفسى بطلت اخس – يعنى بعد اسبوعين كدة من بدء التظام
17-12-2016
خسيت 2.4كجم فى اول يوم – وزنى الان 120.5كجم الصيام على الماء دة بيجيب نتيجة مذهلة – باذن الله اول وجبة لى حتكون المغرب النهاردة – حاكون كدة بقالى 41 ساعة على الماء فقط – من آخر وجبة كلتها الساعة 12 بالليل اول امبارح لغاية النهاردة الساعة 5م
النهاردة كان فطارى المغرب كالاتى:
- اومليت بالسبانخ
- جبنة قريش
- جرجير
- فلفل رومى
- 2 جبنة مثلثات ميلكانا
وبعدها ب 4 ساعات أكلت :
- سمكة ماكريل مشوية
- جبنة قريش
- جرجير
- فلفل رومى
- 2 جبنة مثلثات ميلكانا
وبينهم اكلت 2 جبنة مثلثات حاف – يعنى اكلت النهاردة 6 جبنة مثلثات ميلكانا
السنة دى فاضل فيها 14 يوم – عندة امل فى الله انى باذن الله استقبل العام الجديد وانا وزنى 115كجم – يعنى اكون فى 15 يوم خسيت 9 كيلو زى ما عملت السنة اللى فاتت – يارب ادعولى – وياريت اللى عاوز يخس يمشى على النظام دة زييى وحيلاقى النتائج مذهلة باذن الله – سواءاً مرضى السكر او الاصحاء اللى بيبحثوا عن الرشاقة – لانه نظام صحى مفيد لكل الناس مش بس مرضى السكر
وباذن الله من النهاردة حأخد نصف قرص الضغط بدلا من قرص كامل – لان قلة الاكل معناها قلة الملح اللى بيدخل الجسم فالضغط بينزل لوحده – عن تجربة شخصية – ويبقى طبيعى بدون حاجة لادوية او على الاقل الاستغناء عن نصف الجرعة – وطبعا غلط اوقف دوا الضغط مرة واحدة – فحاخد نصف قرص لمدة شهر كدة وبعدين اقيس الضغط واشوف النتيجة ان شاء الله
18-12-2016
بدأت من اليوم أصوم صيام اسلامى صحيح – يعنى بدون ماء من الفجر حتى المغرب – اتناول الافطار وقت المغرب ثم وجبة أخيرة بعدها ب4 ساعات – لكن استمر فى شرب الماء الى ما قبل اذان الفجر – يعنى زى الصيام العادى مع فرق واحد ان الاكل مسموح به فقط خلال 4 ساعات – اما الماء فمسموح من المغرب للفجر عادى – وباذن الله الوزن يكون قبل الافطار مباشرةً – خسيت 300جم – وزنى قبل افطار المغرب 120.2كجم
اكلت زى امبارح بالظبط
19-12-2016
النهاردة وزني 119.6كجم – خسيت 600جم – كدة انا خسيت 122.9 – 119.6 = 3.3كجم فى 3 ايام منذ بدأت
نفس الاكل – اصل اومليت السبانخ دة طلع لذيذ جداً بصراحة ومشبع – وكمان السمك الماكريل المشوى – انا باشوى 5 سمكات تحت شواية فرن البوتاجاز – وكل يوم آكل واحدة باردة – لقيت ان طعمها باردة خطير تصوروا؟ – يشبه طعم التونة
20-12-2016
وزنى اليوم 119.4 – خسيت 300جم النهاردة – يعنى لغاية دلوقتى خسيت 3.6كجم فى 4 ايام ولله الحمد
21-12-2016
وزنى اليوم كما هو – يمكن عشان اكلت امبارح ربع رمانة – افتكرتها مش حتعمل حاجة
22-12-2016
وزني النهاردة ١١٩.١ يعني خسيت ٥.٣٠٠ كجم في ٦ ايام
فاضل لي ٤ كيلو علي تحقيق الهدف الاول . اني اخس ٩ كيلو في١٥ يوم . فاضل منهم ٩ ايام . صعب . الا اذا بدات امارس اي رياضة
24-12-2016
وزنى اليوم 188.2 – باقى 3.2كجم على تحقيق هدفى الاول باذن الله بعد 8 ايام (بمعدل 400جم فى اليوم .. يارب)
27-12-2016
بطنى خست بنسبة كبيرة – من زمان مشفتهاش كدة
الكرش عامل اساسى فى الاصابة بمرض السكر – والتخلص منه مفتاح العلاج الحقيقى
عمليات تدبيس المعدة انتشرت جدا رغم اثارها الجانبية المدمرة – سبب انتشارها انها فعالة فى علاج مرض السكر بنسبة عالية – لكن فى الحقيقة نفس اللى بتعمله العملية دى انا هنا بأعمله بدون عمليات ولا أى جرحة – تدبيس المعدة بيخليك تاكل قليل عشان صغروا لك حجم المعدة – طب ما احنا نقلل اكلنا بدون جراحة ونبقى تجنبنا نخاطر العملية واثارها المستديمة المدمرة – فعملية تدبيس المعدة تؤدى للاصابة بارتجاع المرئ للابد – لان عصارة المعدة تفرز كما هى وبنفس الكمية – فى حين انهم صغروا لك المعدة جدا – بوالتالى تطلع العصارة الزائدة لاعلى وتسبب تقرحات وارتجاع دائم 24 ساعة – ومن يقوم بتلك العملية يندم عليها بقية حياته – اذن كل ما تحتاجه عزيزى القارئ هو فقط اتباع نظامى هذا (مع توافر ارادة قوية للاستمرار عليه)
وزنى اليوم 116.8 – يعنى الحمد لله خسيت 1.4كجم فى 3 ايام بمعدل اكتر من 400جم فى اليوم – فاضل لى 1.8كجم على تحقيق هدفى الاول اللى هو 115كجم اول يوم فى السنة باذن الله (بعد 5 ايام)
الغريبة انى من ساعة ما بدأت من 11 يوم لم امارس أى رياضة ولا حتى المشى – فسبحان الله مع ذلك خسيت 6.1كجم – تقريبا باخس بمعدل من 200 الى 400جم يوميا – لو حتى خسيت 200جم فى اليوم وانا عايز باذن الله من اول السنة ابدأ المرحلة الثانية وهى الوصول الى 100كجم – يعنى اخس 15 كيلو على 200جم = 75 يوم (+ 4 ايام احتياطى) يعنى باذن الله على اول الربيع يوم 21 مارس 2017 ربنا يوفقنى واكون حققت هدفى الثانى – لأبدأ الهدف الثالث وهو الوصول الى 80 كيلو – يعنى 20 على 5 = 100 يوم + 5 ايام احتياطى يبقى باذن الله يوم 4-7-2017 احقق هدفى الكبير اخيرا وهو الوصول الى 80كجم – يارب – ادعولى
اكلى اليومى كالاتى:
- الافطار
- سبانخ بالكزبرة الخضراء والثوم
- بيض مسلوق
- سلطة جبنة قريش
- بابا غنوج
- جرجير
- 3 جبنة مثلثات
- السحور (بعد 4 ساعات من الافطار)
- سمكة ماكريل او ربع فرخة او 2 برجر او كوسة باللحمة المفرومة والبيض
- سلطة جبنة قريش
- 3 جبنة مثلثات
- جرجير
يمكنكم معرفة وجبات اخرى كثيرة مناسبة ومتنوعة من خلال الضغط هنا <<
16-1-2017
وزنى اليوم 117 كيلو – بقالى 20 يوم وزنى ثابت مش بينزل – دايما كدة اول 15 يوم التخسيس يكون حلو جدا وبعدين الجسم بيفرمل – لكن انا مش حازهق ولا استسلم – مازلت على نفس نظامى – الجديد بس انى بقيت آكل فول سودانى وفاكهة (برتقال ويوسفى وموز) – لسة باصوم كل يوم افطر المغرب لكن السحور بدلا من 4 ساعات بعد الفطار بقيت افطر بعدها 6 ساعات – يعنى بقيت اصوم عن الاكل لمدة 18 ساعة بدل 20 – ملتزم بنفس اللمنوعات : لا عيش ولا رز ولا مكرونة ولا بطاطس ولا سكر ولا حلويات
اكلى اليومى حاليا :
الفطار على المغرب :
- الباذنجان عامل مشترك فى اغلب الايام باشكاله المتنوعة: مقلى – مخلل – بابا غنوج – مسقعة
- جبنة قريش بالزيت الحار والطماطم والفلفل الرومى والخضرة
- بيض مقلى او اومليت او سكرامبلد او مسلوق
السحور :
- برجر بيتى مشوى متقلب فى طبق طحينة وطماطم
- او فراخ
- او سمك فيليه باسا مشوى فى الطاسة
- خضار : كوسة – سبانخ – ملوخية – باميا
ليست هناك تعليقات:
إرسال تعليق