لسة بتودوا ولادكوا المدرسة؟
أعرف ناس كتير عاقلة قعدت ولادها فى البيت
أنا عن نفسى عايز أقعدهم - فبنوديهم يوم ونقعدهم يوم
لكن الصراحة المفروض يقعدوا خالص - وياريت الوزير يصدر قرار بكدة ويريحنا كلنا
.
لكن هو من إمتى الحكومة بتخاف علينا وللا على ولادنا؟
ما كتير موتوا الشعب ومافرقتش معاهم خالص
موتوا الناس فى عبارات غرقت - وقطارات إتحرقت - وخمسين الف قتيل على الأسفلت كل سنة - عادى يعنى مفيش أى حاجة - حياتنا لاتهمهم من قريب أو بعيد
بالعكس يمكن موتنا يسعدهم - ماهم دايما يعايرونا بكثرة عددنا - على أساس إننا كترنا قوى والصين والهند ولا حاجة جنبنا
مش يمكن الوباء ده جه مصلحة للحكومة؟
وزير الصحة ولا تفرق معاه حياتنا - ولو مات الشعب المصرى كله عادى بالنسبه له - وهو مجهز المقابر الجماعية - خدوا بالكوا - بدل مايجهز التاميفلو
والكام علبة تاميفلو حاططهم فى مستشفى الحميات فقط - اللى أصلا اللى داخلها مفقود واللى خارج منها مولود - واللى يتعدى بقى يورينا شطراته ويهوب ناحيتها
إحتكار يعنى - أما المستشفيات النظيفة المعقمة فممنوع تستلم ولا علبة واحدة - ياسلام على الحكومة لما تمخمخ
أنتوا عايزين إيه؟ الوزير رجل أعمال - حد فهمه - معرفش مين - إن مهمته ينتقد مش يصلح - مكسبه الأساسى من المرضى ومن هم على مشارف الموت - يعنى صحتنا بيزنس بالنسبه له
ووزير التعليم عبارة عن مدفع تصريحات سريع الطلقات - وإشترى 16 مليون كمامة لم نرى منهم كمامة واحدة من أول السنة وحتى اليوم - اللهم إلا فى زياراته المفاجئة للمدارس - حيث تجد التليفزيون كله فى المدرسة فى إنتظار معاليه والطلبة متكممين وتمام التمام - حتى الفراشين وعمال النظافة متكممين - وزيارة مفاجئة والإعلام المصرى كله موجود عن بكرة أبيه - شوف ياأخى محاسن الصدف
.
يعنى من الآخر ماحدش حيخاف على ولادنا زينا
لو كل الطلبة قعدوا فى البيت حيعمل ايه الوزير الهمام؟
هو من ناحيته مش حيقفل المدارس - وكل يوم بيقول عن المصابين بالفيروس إنه عادى ومتوقع - طب إحنا متوقعين منه إيه بقى؟؟؟
وحنستنى لحد إمتى؟
انا من النهاردة مش هخلى ابنى يروح المدرسة متمنعوها احسن
ردحذفعشان نستريح من
الوباء