السؤال عن مهو لو قللنا السعرات الحرارية برضه حنخس، ايه لازمته الكيتو
(الكيتو او اللوكارب هى انظمة عذائية منخفضة النشويات عالية الدهون)
الإجابة :
هي سعرات ولا هرمونات ولا اتنين؟
المفروض فعلاً لما بتنقص سعراتك 3500 سعر حراري يعني تقريباً بيقل رطل من سعراتك.
نظرية السعرات بتقولك نقص 500 سعر حراري، في اليوم عن احتياجك يبقي الاسبوع تخس ما يعادل نص كيلو، يبقي في الشهر 2 كيلو، يبقي في السنة 24 كيلو اشي خيال يا ناس 😃😃
أومال لما الموضوع بسيط كدة ليه بنفشل.
ليه نظرية السعرات خاطئة.
1- ان السعرات الداخلة للجسم مرتبطة باللي خارجه منه.
بمعني نظرية الكالوريز بتفترض ان واحد يقل والتاني حيفضل ثابت وده مش بيحصل.
كل ما حيقل واحد، حيقل التاني، يبقي لما انا بقلل 500 سعر في اليوم، ممكن اخس اسبوع او اتنين و بعدها الجسم حيقلل الحرق، واضطر اقلل تاني والجسم يقلل الحرق تاني و هكذا.
( راجع بوست الريفيد الجزء الأول)
2- الجسم مش نظام مغلق.
نظرية السعرات قايمة علي القانون الاول من الديناميكا الحرارية
الطاقة لا تفني ولا تثتحدث من العدم ولكن تتحول من صورة الي أخري.
شرط التحول الكامل للطاقة ان النظام يبقي مغلق، يعني كل الطاقة اللي في صورة كالوريز، تتحول لخدمة اجهزة الجسم.
لكن اللي حاصل ان الطاقة دي بتتأثر بعوامل كتير في الجسم، و بتتغير من يوم ليوم.
هرمونات زي الانسولين والليبتن والكورتيزول والثيروكسين.
ارتفاع درجة حرارة الجسم، الضغط العصبي، قلة النوم الخ.
وبالتالي الطاقة مش شرط كلها تتحول لخدمة الجسم، ممكن تتحول لدهون ( طاقة مخزنة)
وبالتالي محتاج دايماً تطلع المخزون.
3- تقلل السعرات، بتجوع أكتر
Set weight point.
كل جسم له نقطة في الوزن، النزول عنها او ارتفاع فوقها بيبدأ يقاوم و يرجعك لها.
لما بتخس، بيزود الجوع فتاكل اكتر.
ولما بتزيد بيزود الحرق فتخس.
الانسولين هو اللي يقدر يرفع النقطة دي.
وبالتالي لو قللت، الجسم مش حيسمحلك بده.
4- سعراتك مش زي بعضها
بمعني تأثير قطعة جاتوه 300 سعر حراري علي الجسم مختلف عن تأثير قطعة لحمة بنفس السعرات الحرارية.
ليه؟
علشان ارتفاع الانسولين حيخزن الدهون مع الجاتوه و حتجوع اسرع من لما تاكل اللحمة.
وبالتالي نظرية السعرات تنفع لو الجسم مجرد آلة صلبة لا يحدث بداخلها اي تفاعلات، انما بوضع الكائن الحي و زي ما شرحت يبقي مينفعش نعتمد علي السعرات الحرارية.
لماذا الكيتو.
1- بيقلل الأنسولين، دي حرفيا معناه بيزود معدل الحرق
2- بتاكل لحد الشبع، يعني الجسم مش حيفهم انه في مجاعة.
3- وجدوا ان تكوين 1جم جلوكوز في الكبد، بيحتاج حرق 10 جم دهون و بالتالي للحفاظ على مستوي السكر في الدم مضطر تحرق كتير علشان تعمل كدة.
الخلاصة، لو كان السبب الرئيسي في السمنة تناول سعرات كتير، كان الحل حيبقي تقليل السعرات، بس ده مش بينجح، و اذا كان سبب السمنة زيادة الانسولين يبقي العلاج الفعال الكيتوجينك والصيام المتقطع و ده فعلاً العلاج اللي نجح.
ليست هناك تعليقات:
إرسال تعليق