هل ممكن الشفاء من مرض السكر؟
دة موضوع نسبي
كل واحد مننا عنده رصيد من خلايا بيتا في البنكرياس بتاعه
خلايا بيتا هى المسئولة عن انتاج وتخزين وافراز هرمون الانسولين
الانسولين دوره توصيل الجلوكوز اللي في الدم الى داخل خلايا جسمنا عشان الخلايا تحرقه في وجود الاكسجين اللي بنتنفسه للحصول على الطاقة اللازمة لحياة خلايا الجسم
وكل ما ناكل نشويات اكثر وسكريات خلايا بيتا تفرز انسولين اكثر
وبالتالي الرصيد بيقل
والرصيد دة يشبه رصيد البنك.. كل ما نسرف في الصرف منه يقل اكثر
لكن للأسف الرصيد دة لا يقبل الايداع.. يقبل السحب فقط
طيب نعرف رصيدنا ازاى
عشان نعرف محتاجين نقيس السكر صايم والانسولين صايم في المعمل.. والنتيجتين نضربهم في بعض.. وحاصل الضرب نقسمه على 405
يطلع لنا نسبة مقاومة الانسولين Homa IR
كل ما كان الرقم قريب من 1 نطمئن
لغاية 1.9 معقول
في المرحلة دي سهل نتجنب الدخول في المرض
لكن اكتر من كدة يبقى عندنا مقاومة انسولين ولازم نبدأ نتبع خطة وقائية تجنبنا الاصابة الرسمية بالسكر
مقاومة انسولين يعني خلايا جسمنا اتملت دهون ومبقاش فيها مكان لاستقبال الانسولين فبتقاوم دخوله
فيضطر البنكرياس يفرز انسولين اكتر لاتمام المهمة .. ودة طبعا بيرهق البنكرياس ويقل الرصيد اسرع
عشان كدة الانسولين في الدم لوقسناه حتلاقيه عالي
لكن ممكن يكون سكر الدم طبيعي
لكن بعد سنوات لما الرصيد يبدأ يقل ويصبح البنكرياس غير قادر على افراز المزيد.. حنلاقي في التحليل السكر عالي والانسولين عالي
وفي الاخر حنلاقي السكر عالي والانسولين واطي.. وهنا.. وهنا فقط تظهر علامات السكر المعروفة من عطش وجوع متواصل وخسسان سريع وتعرق وارهاق.. ودي كلها للأسف علامات متأخرة جدا.. لو استنيت لغاية ما تحصل تبقى اهملت صحتك سنوات وسنوات.. وللأسف الشديد اغلب الاطباء بيتعبروا العلامات دي هى اعراض السكر لكن في الحقيقة هى بداية مضاعفات وحالة متأخرة سبقتها سنوات ومحدش نبهنا
يعني لو قسنا سكرنا او سكر ولادنا ولقيناه تمام 100 او 120 دة مش معناه اننا نطمن وخلاص..
لو احنا عندنا بطن او وزننا زايد.. او لو حد من عيلتنا عنده سكر.. لازم نعمل التحليل دة عشان نشوف هل السكر مظبوط والبنكرياس مستريح من غير مجهود.. وللا السكر مظبوط لكن على حساب خلايا بيتا اللي بتفرز اضعاف الكمية العادية عشان تظبط سكرنا؟
نتيجة التحليل دة بتعتبر مؤشر يعرفنا هل ممكن نشفى من السكر وللا خلاص حنعيش طول حياتنا بدون رصيد كافي لهضم النشويات وبالتالي الحل الوحيد اننا نتجنب تناولها
الخلاصة ان تحليل مقاومة الانسولين بيعرفنا مدى الضرر اللي حصل طوال السنين اللي فاتت.. وممكن يكون جرس انذار لينا عشان ناخد بالنا ونبعد عن النشويات ونخس ونتحرك وننام بدري قبل فوات الاوان
ليست هناك تعليقات:
إرسال تعليق