امبارح اتكلمنا عن شركات الادوية اللي كل يوم تطلع لنا بفنكوش جديد لعلاج السكر..
ادوية كلها ضارة بلا استثناء (واخد بالك من بلا استثناء دي؟ يعني بلاش حد يسألني بقى من فضلكم.. كل ادوية السكر ضارة بلا استثناء الا مادة واحدة فقط : ميتفورمين)
وقلنا ان ميتفورمين محتاجين نعرف عنه معلومات اكتر شوية
النهاردة حاوضح لكم باختصار وكلمات مبسطة:
فوائد الميتفورمين للجسم
الجرعة المناسبة كام لحضرتك
وانواع الميتفورمين وايه النوع اللي يناسبك
ميتفورمين اقراص بتسمى منظم السكر
بتقوم بادوار رائعة في الجسم اهمها 3 حاجات:
♥ بتقلل من امتصاص النشويات والسكريات من الامعاء.. وبالتالي تساعد في خفض سكر الدم وفي نفس الوقت تساعد في خفض الوزن
♥ بتقلل من تاثير هرمون الجلوكاجون اللي بيفرزه البنكرياس على الكبد وبالتالي تقل عملية تحويل الجلوكوز (المخزن في الكبد على شكل جلايكوجين) الى جلوكوز مرة اخرى.. وبالتالي يقل سكر الدم الصايم
♥ بتحسن حساسية خلايا جسمنا للانسولين يعني بتقلل مقاومة الانسولين من خلال جعل عضلات الجسم تستهلك جلوكوز اكثر
وهى اقراص آمنة لانها لا ترهق البنكرياس ولا تعصره وتجبره على افراز انسولين كما تفعل الادوية الضارة الاخرى
♥ يتوافر الميتفورمين بتركيزات مختلفة:
500
750
850
1000
طبيبك بيوصف لك الجرعة المناسبة لحالتك وبيحدد لك عدد الاقراص اليومية
لكن بصفة عامة مفروض دايما نبدأ باقل جرعة 500 في اليوم
ليه؟
عشان مادة الميتفورمين بتعمل في البداية شوية تعب في المعدة على ما الجسم يتعود عليها
وبعد اسبوع ممكن نزود الجرعة بالتدريج
طيب الحد الاقصى كام؟
الحد الاقصى 2450 في اليوم يعني 3 اقراص تركيز 850
او قرصين تركيز 1000
♥ طيب هل الميتفورمين نوع واحد؟
لأ نوعين
نوع عادي مفعوله بيستمر ساعتين
ونوع ممتد المفعول بيستمر 12 ساعة وبتميز بانه سهل على المعدة
طيب ايه اللي يناسبني؟
لو حضرتك سكرك بعد بساعتين بيكون عالي فانت محتاج النوع العادي مع بداية كل وجبة
اما لو سكرك صايم الصبح قبل الفطار عالي فانت محتاج انسولين ممتد المفعول قبل النوم ملوش علاقة بالاكل
♥ فاضل نعرف ملحوظة مهمة وهى ان الميتفورمين رغم انه آمن لكن بيسبب مع الوقت مشكلة وهى انه بيقلل من امتصاص الجسم لفيتامين ب12 وطبعا احنا عارفين ان ب12 مهم للأعصاب
عشان كدة من الافضل عدم الاستمرار على الميتفورمين الا لفترة شهور الى ان يصل سكرنا لأقل من 100 صايم و120 بعد الاكل بساعتين
ولو احتجنا نستمر عليه اكثر لازم ناخد فيتامين ب12 وأفضل نوع هو اقراص تحت اللسان مثل دلتافيت 1000 sublingual افضل من الحقن واقراص البلع لان تحت اللسان بتمتصه الشعيرات الدموية ويدخل مباشرة لمجرى الدم دون المرور على الجهاز الهضمي وبدون تعقيدات حقن ب12 وسرنجاتها ولسعتها المعروفة
♥ نتكلم بقى على اسماء الادوية اللي فيها مادة الميتفورمين
طبعا مهم جدا منشتريش اى دواء فيه مادة مضافة للميتفورمين
الاسماء التجارية متهمناش في حاجة.. تهم فقط شركات الادوية لاغراض ربحية مادية بحتة
وانا اتمنى يتعمل قانون يمنع استخدام الاسماء التجارية وتصبح كل الادوية اسمها هو اسم المادة الفعالة بدون لف ولا دوران.. او على الاقل تكون المادة الفعالة هى الاسم الكبير على العلبة اما الاسم التجاري فيكون بخط صغير تحتها حتى يكون المريض على وعى تام بما يتناول من مواد فعالة
كل بلد فيها اسماء مختلفة عن باقي البلدان
لكن عموما الاسم التجاري الاشهر هو جلوكوفاج لانه موجود في كل بلاد العالم تقريبا
لكن هناك مئات الاسماء الاخرى
مثلا في مصر يوجد جلوكوفاج وماكسوفاج وسيدوفاج
بغض النظر عن الاسم التجاري اللي لا يفيدنا في شئ.. ما يهمنا هو المادة الفعالة
عايزين نتعود دايما مناخدش باسم الدوا التجاري المكتوب على العلبة بخط كبير.. لا
نقرأ السطر اللي تحته المكتوب بخط صغير
هى دي المادة الفعالة
لو قريت حاجة تانية مع ميتفورمين اوعى تشتريه
ولو لقيت رقمين يعني مثلا 1000/50 او 850/5 اوعى تشتريه
وكمان حتعرف من السعر
ميتفورمين بيكون بيبدأ من 11 جنيه واغلى حاجة المستورد طويل المفعول ب60 جنيه
اما الاقراص اللي ب100 او 150 واكتر فكل دة ابعد عنه تماما
ليست هناك تعليقات:
إرسال تعليق