اوعى تشتري أكل طالع من مصنع

مصانع السيارات مهمة..

مصانع غسالات وثلاجات وبوتاجازات تمام..

مصانع موبايلات وشاشات واجهزة ماشي..

مصانع طائرات واسلحة وذخيرة وقنابل نووية يا حفيظ..

لكن مصانع أكل؟ … ستووووووووب !!!

كله الا الأكل ..

 

إوعى تشتري أكل طالع من مصنع..

– ليه بس ياعم الحاج ؟

– أنا اقولك :

منذ نشأة الصناعات الغذائية وسماحنا لمنتجاتهم بدخول بيوتنا .. دخلت معها من الباب قائمة لا حصر لها من امراض العصرالقاتلة

مصانع الاغذية معمولة عشان تاخد فلوسك وتضحك عليك وعلى ولادك باضافات كيماوية.. شوية الوان ..على طعم صناعي ..على روائح خادعة ..على زيوت مهدرجة وما ادراك ما الزيوت المهدرجة ..على مواد تحنيط لحفظ كل دة من التلف لشهور وسنوات ! (ايوة بيستخدموا مواد تحنيط الجثث.. امال انتوا فاكرين ايه)

أما صحتك فلا تخطر لهم على بال من قريب او بعيد

 

إحمي نفسك وأسرتك

انا معاك الاغراءات صعبة

مليارات تدفع في اعلانات تحاصرك في كل مكان

 

اعلاناتهم دمها حفيف

 

وبيقدمها نجوم مشهورين يبيعون ضمائرهم مقابل مبالغ خيالية

 

وصور الاكل تخليك عايز تمد ايدك في الشاشة وتاكل

 

 

اكلهم لذيذ .. كالسم في العسل

 

كيماوياتهم خلت ولادك مبقوش ياكلوا اكل صحي طبيعي عشان كيماوياتهم ألذ.. فأدمنوا المزيف وكرهوا الطبيعي

 

لكن عمرك ما حتلاقي اعلان يقول لك الحقيقة ..

 

“منتجاتنا اسرع طريق لامراض السمنة والقلب والضغط والكوليسترول والسكر”

 

لو سمعت مرة الجملة دي في اعلان فدة ملوش غير معنى واحد: أحلامك بقى ينزل فيها اعلانات

 

وللأسف الاكل الصحي الطبيعي لا يجد من يعلن عنه

 

لكن في النهاية القرار بايدك ..

إحمي نفسك وأسرتك من اليوم : اوعى تشتري أكل طالع من مصنع